2 PUOPAOKO 31 - SHEEYU BAIBEL (BSI)

Hezekiah nou Rathoyu Zhai-hrü Soudayu

¹ Nüh nüche louyu thai, nüh buh hi velouyu Israel mai hrülai nou Judah teidei veishi hisü taho rah kukhe thore donou chuh shokhai touyu, Asherah rapfüpaiye thoyu basharatao, ae acheche moyu ratho buh teitei sü soushi khaiwure. Haibütoua puletao hai buh kukhe hi buyu Judah, Benjamin, Ephraim ae Manasseh teidei teitei hia soushi khaitou peiwure. Süthaisü puletao mai hrülai nou linaonao vei ki hi dakhai tare.

² Veo Hezekiah nou napao maitao ae Levi maitaoye meme soua zhipaloua nou lahkuku nou soure vah thaifüa kamai-a panou posheela peiyu sü meidei-e, kamai-a pou kainüvei meidei-e, khekhe mai-a panou Rathoki hinou rathoyu sü süthaisa-a soue, ae kamai-a Mapao ye lou sousho-a puh kalo sü pao-a panou vah soutapue.

³ Veo nou lah puhnou kiyu kikhaorü hinou shona ae koukhe meidei-a posheelayu, Soteithe hi posheelayu, khouh Ashu vei Nüh hi posheelayu ae khonüh kukhe hi Mapao vei chikha thaifüa posheelayu teitei sü popa posheela peie.

⁴ Süpei hinou, Veo nou Jerusalem hinou hrüa buyu maitao hisü puletao nou peinüa buyu posheela khesü napao maitao ae Levi maitao hi pove sheela peio, sükulouzü Mapao vei chikha thaifüa puletao nou souzü vah teitei sü liche-a souche loulai.

⁵ Kharochi peiyu sü maikhe mainou chou louyu phaki, Israel mai hrülai nou sapeina hai shinamara ngao louyu arai khana, darkhadzü, oliv theadzü, laivoudzü, ae puletao vei dou-lao hinou ngaolouyu veishi hinou pove posheela peie; ae puletao vei buyu na teitei hinou taith (tithes) sü pove peie.

⁶ Judah teidei hinou hrüa buyu mai hrülai nou puletao vei kikhaorü ae zhaotu taith sü pove peie, ae sapeina-a taoli hai pove peie, sükhesü puletao nou puletao vei Ramai Mapao hi sousheelou-a peithou peiwure.

⁷ Maikhe mainou sapeina khesü pove peiyu hai khouh asüna hinou poa khouh anai koute hai pove peie.

⁸ Veo Hezekiah ae peikho maitao nou pove peikhai touyu nakhesü ngaolouyu phaki, puletao nou Mapao ye paoshore, ae maisou-a puletao nou paosho peie.

⁹ Maikhe mainou pove peikhai touyu sapeinatao donou Veo nou napao maitao ae Levi maitao hi cha-e,

¹⁰ ae Zadok vei tyaosholea hinou hrüveyu napao peichana Azariah nou puh hi haibüa chila peie, “Maikhe mainou Rathoki hi sapeina pove peiyu hai Etao nou tou louyu thai-a alao sou lipa-a bue. Mapao nou puhvei maitaoye shiha peiyu donou haikhe teitei sü Etao nou ngaoloue.”

¹¹ Veo Hezekiah nou Rathoki pe hinou kini khaire ki ali soulo tea lüpeie, ae puletao nou kini pojü khaire donou ki ali souloue.

¹² Maikhe mainou pove peiyu sapeina ae taith teitei sü ki sühi pothou khailoue. Ki haina khore donou Levi puona Konaniah ye sü doloure, ae puhye soukha peire donou puh thaihou Shimei ye vahbu thoupeie.

¹³ Veo Hezekiah ae napao Peichana Azariah nou Konaniah ae puh thaihou Shimeiye vah soukha peire donou Levi mai haitao kirou sü dopaloue: Jehiel, Azaziah, Nahath, Asahel, Jerimoth, Jozabad, Eliel, Ismakiah, Mahath, ae Benaiah.

¹⁴ Rathoki vei teinghi palova robomü khoyu hi peikhowo Levi puona Imnah nahpoutu Kore nou Ramai Mapao hi maikhe mainou peinüa pove peiyu sapeina khesü pojü peiwe, ae Sheesheelai hi posheela peire posheela nakhesü zhupeiwe.

¹⁵ Nuhdu kukhe hinou hrüa buyu napao maitao, tsümai ae nahle mai souku moa puletao nou ngaozüa buyu khesü peipha peiyu hi puhye Eden, Miniamia, Jeshua, Shemaiah, Amariah, ae Shekaniah hai maitao nou soukha peie. Puletao nou puletao vei thaihou-jürai Levi maitao-a touso sü puletao vei vah thaifüa raibütoua zhazhi peie.

¹⁶ Po shirou payu ae süjünou la-a buyu poutumai hrülaiye sü puletao vei vahbu na thaifüa Rathoki hinou vah souyu mai hrülaiye sü zhazhi peie.

¹⁷ Napao maitaoye khü thaifüa vah zhipeiwe, ae po kai jünou layu Levi maitao hai puletao vei vah thaifüa me me sou zhipeie.

¹⁸ Puletao mai hrülai hai puletao vei chapfü, nahmai ae puletao hi buyu mai noupu zhih rüthouyu hisü rüthou-e, daiolouzü teile tara hia puletao nou sheeyu vah sü soure donou souda-a buloure donoue.

¹⁹ Aaron vei tyaosholea maitao hi peikhai touyu nuhdutao ae süpehao hi buyu hiphao noupu peikhai touyu teideitao hinou buyu napao mai hrülai, Levi khü hi zhih rüthou khaitouyu kihikhamai hrülaiye sü touso hai zhipeie.

²⁰ Judah teidei teitei hi Veo Hezekiah nou kaozü vah nasü soupeie, ae puhvei Ramai Mapao nou jüpayu vah khesü soupeie.

²¹ Puhnou Rathoki donou souyu vah teitei ae chikha thaifüa soupfüyu teitei hai puhvei tsüle ae hrümai veishi nou Ramai hi pei-a soupfüyu donou puh hai savayu ngaoloude.