2 PUOPAOKO 30 - SHEEYU BAIBEL (BSI)

Tachopa Nüh Nüre donou Soudayu

^1-3 Maikhe mainou Tachopa Nüh hai teile macha soua khouh ngaoraina hisü nüh nülou more, daiolouzü napao maitao hai naanou soure donou soushee-a buyu mai poumore, ae maikhe mai-a Jerusalem hisü ve jülou hore. Südonou Veo Hezekiah, puhvei peikho maitao alia Jerusalem hinou hrüyu maisou nou koa khouh ahai na hinou Tachopa Nüh nülai tea ae-ao souloure. Veo nou Israel ae Judah mai hrülai hi, matsü soua nou Ephraim ae Manasseh maitao hisü kopomaiye seiho Jerusalem Rathoki hinou Israel maivei Ramai Mapao ye tsükhouyu hinou Tachopa Nüh koa nüzho laikhe tea kuta-e.

⁴ Veo ae maikhe mai hai puletao nou tsücho dayu nasü kaore tea lesa shore,

⁵ südonou puletao hai Israel mai hrülai, reilova buyu Dan teidei hinou poa khelo Beershaba koute hrüa buyu mai hrülaiye sü Jerusalem hinou tave raichoki jünou dupua ae chikha thaifüa Tachopa Nüh sü nüzho laishe tea seiko seiho kue.

⁶ Kopo maitaoye sü veo ae puh khenou peikhoyu maitao nou haibüa kharochi peia Israel ae Judah teidei teitei hisü seitare: “Assaria mainou reih hulouyu hinou turei palouyu Israel maitaore, chuo Abraham, Isaak, ae Jakob vei Ramai Mapao hi dakhai velo, sükure toulouzü puh-a neletao hi dakhai velai.

⁷ Neletao vei puopaoh ae thaihou jürai maitao büa neletao vei Ramai Mapao ye louche moyu sü souso. Puletaoye daizhou koute tudee peiyu sü neletao-a süwe.

⁸ Puletao büa neletao hai tsüle khouso, ana Mapao vei chi sü zülo. Neletao vei Ramai Mapao nou teisa vei soure donou soushee khaitouyu Rathoki, Jerusalem hisü tavelo, ae sühinou tave puhye tholo, sükulouzü neletao hi puhvei lekha rarou nasü bupu laimoe.

⁹ Neletao nou Mapao hi dakhai veloure toulouzü, neletao vei tyarai maitaoye ngaobamai nou hukhamai soua nüpoa tayu maitaoye sü zhuvea pei-a panou puletaoye sü lah vei ki hi dakhai ve loulai. Daiolouzü neletao vei Ramai Mapao hai maiye leshi süyu ae zhuvea süshoyu nasüe, ae neletao nou puh hi dakhai ve louzü, puhnou neletaoye sü popeilai.”

¹⁰ Kopomaitao nou Ephraim ae Manasseh nuh teidei hi ae Zebulun teidei hi khete hai taho ko sü paopeie, ana maikhe mainou puletaoye sü zünüa konü peie.

¹¹ Sübüa buyuma Asher, Manasseh, ae Zebulun hi kamai-a nou paochi sü louche-a nou Jerusalem hisü ve-e.

¹² Ramai nou kozho peia Judah hi maitao nou tsüle ali souloua veo ae peikho maitao nou kharochi peikhai touyu nasü züa vah haso khesü soupeie.

Tachopa Nüh Nülouyu

¹³ Khouh ahai na hisü khei thoumoyu Raokhao Nüh nüre donou Jerusalem hi mai alaosou velou jüloure.

¹⁴ Puletao nou Jerusalem hi rah kukheye posheelabu ae pou kainüvei meidei-a thoyu buh veishi soushi-a nou poho Kidron deikho hisü shilaiwure.

¹⁵ Puletao nou khoungao kiadai zhou sü Tachopa louyu vei posheelayu zhaotu nasü datha loure. Naanou soure donou soushee loumoa buyu napao maitao ae Levi maitao hai hrao shore, südonou puletao vei hrümai hai sousheeloua Mapao hi peithou pure, ae chuo puletao hai Rathoki hinou posheela sü meidei-a sheela louveire.

¹⁶ Puletao mai hrülai nou Ramai vei mai Moses vei Chikha thaifüa Rathoki hisü lahkuku nou buzüyu buh hi buloure. Levi maitao nou posheela khaitouyu souzhe sü napao mai hi peie, ae napao maitao nou souzhe nasü posheelabu hi lazü peie.

¹⁷ Daiolouzü Tachopa Nüh vei posheelare zhaotu dathare donou mai alao sou naanou hilo vanou soushee loumore, südonou Levi maitao nou zhaotu sü datha peie, ae zhaotu nasü sousheeloua Mapao hi poa peithou peie.

¹⁸ Süpei nou, nüh nüre donou taveloua buyu Ephraim, Manasseh, Issakhar, ae Zebulun maitao hai mai poulao nou soushee loumoa Tachopa Nüh sü nüre. Südonou Veo Hezekiah nou puletaoye donou haibüa veachi paopeie:

¹⁹ “Oh Mapaowo, Etao vei puopaoh Ramai, nevei zhai aveih hinou puletao vei tsüle teitei nou peia neye thoyu maitaoye sü naanou hilonou soushee loumoa buyuma puletao vei mah sü khaipeio.”

²⁰ Hezekiah nou veachi paoyu sü Mapao nou keipeia puletao vei mah sü khaipeiwure, ae mailia soushi peimoe.

²¹ Jerusalem hi velou jüa buyu Israel maitao nou teithe anai hai asashoa nou khei thoumoyu Raokhao Nüh sü nüe, alia Levi maitao ae napao maitao nou puletao vei khouko teitei nou peia teithetsü sü Mapao ye lou sousho-e.

²² Mapao ye thoyu hi süthaisa-a souveih shopeiyu Levi mai hrülaiye sü Hezekiah nou paosho peie. Maikhe mainou puletao vei puopaoh Ramai Mapao ye paosho-a posheela khesü popei-a teithe anai koute hai khonüh nüloure,

Nüh Nüyu Akhaina

²³ süthai-a maisou sünou teithe anai hai khonüh nüpulai hie tea ae-ao souloure. Südonou puletao hai teithe anai savasho-a nou khonüh nüpuloue.

²⁴ Judah hi Veo Hezekiah nou posheela khaitouyu hinou maisouye panou datoure donou chode theli, ae zhaotu thenai hai peie, alia peikhoyu maitao-a maisouye chode theli ae zhaotu thekirou hai peie. Napao mai taoli hai naanou soure donou soushee loure.

²⁵ Judah teidei hinou hrüa buyu maisou, napao maitao ae Levi maitao, Israel maivei teidei hinou veyu maitao, ae Israel ae Judah teidei hinou ve hrüyu shetumai hrülai-a asa shore.

²⁶ Jerusalem nuhdu hinou buyu mai hrülai sü asa shore, daiolouzü David nahpoutu Solomon teile hinou zhou koute hai haibüa nou khonüh hai nükhai toumo hie.

²⁷ Süthaisü napao maitao ae Levi maitao nou Mapao vei shiha sü maisouye donou khopeie. Ramai nou buyu raki vanou puletao vei veachi sü keinou peie, ae puletaoye sü popeie.