2 PUOPAOKO 3 - SHEEYU BAIBEL (BSI)

¹ David veo, Solomon vei puo, puhnou Rathoki soure buh nasü soudakhai peie. Sünasü Jerusalem hi Moriah deichi, Jebus puona Araunah vei thaibuh, raichoki Mapao nou David hi zhu ngaopeiyu buh hinou-e. Veo Solomon nou Rathoki soushu tayu hai,

² puhnou veo koulouyu po adai navei khouh ahai na hinou souta-e.

³ Solomon veo nou rathoki souyu nahai mitar kainai sa sho-e, ae mitar akü hai jha du-e.

⁴ Talou daore kide nahai jha duyu hai rathoki jha duyu deibüa mitar akü-e, ae mitar raingou adai hai ku-e. Kihikha sü veikayu sana nou meaho khaitoue.

⁵ Kide matsü nasü sedar süü nou dakha khaitoue ae süpei sü veikayu sana nou meaho khailoua süna pei hisü zhai veishoa habe ae huraizhao zhai daothou khaitoue.

⁶ Veo nou Rathoki nasü muteiyu chuh ae Parvaim hinou poveyu sana nou pothou nga veisho-a soukhaitoue.

⁷ Puhnou rathoki vei kivotao, kizhahtao, kikha talouyu ludutao ae kikhu khesü sana nou meaho khaitoue, ae kivo teitei hisü shouh pfüyu khaona khenou zhainga daothou peikhai toue.

⁸ Kide khevai buyu sheesheelai buh nahai Rathoki jha duyu deibüa sa ae jha hai mitar akü bue. Sheesheelai buh vei kivo teitei hai sana metric ton kai loua mea khaitoue,

⁹ ae sana gram 570 nou hushu sou-e, alia kipei hi buyu kidetao-a sana nou meaho khaitoue.

¹⁰ Puhnou vah souyu maitaoye panou shouh pfüyu khaona ahai sü hu nou souloue, ae süna pei hisü sana nou mealoua sheesheelai buh hi khaitoue.

^11-13 Shouh pfüyu khaona sühai sü kikha talouyu ludu hinou holo ali ae hailo ali tea khaikhai toue. Khaona ali nou shouh ahai pfüwe, ae shouh ali nou mitar 2.2 (feet anai-da) so-e, shouh süsü topoa kou kide toutsü hinou holo ae hailo vei sü deipoa bue. Khaona sühai vei shouh nou hopoa buyu hai mitar akü bue.

¹⁴ Sheesheelai buh hi haosah nahai züzüyu sah ae na kukhe loua soukhai toue, sünasü teidai, maomüyu ae hoyu zhusa nou thoukhai toue, alia shouh pfüyu khaona khesü haosah sühi nga daothoupei khaitoue.

Baosahu nou Souyu Deka Ahai

¹⁵ Veo nou Rathoki kijü hisü deka ahai mitar kiangoua-da sahso-a souloua shula khaitoue. Deka sühinou mitar 2.2 saso-a nou souchopa khaitoue.

¹⁶ Souchopa khaitouyu dekava hisü puhnou hurai zhai büa nga southou peikhai toue ae baosahu nou vajüshithou zhai soua kaihli hai southou khaitoue.

¹⁷ Deka sühai sü kikha taloure ludu pe hinou shula peikhai toue: teinghi loulova buyu deka nasü Jachin tea zhih sapei khaitoue, ae reilova buyu deka nasü Boaz tea zhih sakhai toue.