2 PUOPAOKO 29 - SHEEYU BAIBEL (BSI)

Hezekiah nou Judah hi Veo Souyu

¹ Hezekiah nou Judah hi pa veo koulouyu phaki puh hai po kaingou pare, ae puhnou Jerusalem hinou po kaikü hai veo soua bue. Puh pfü hai Zekhariah nah naotupai Abijah toue.

² Puhnou puh paoh David Veo büa Mapao nou jüpayu vah haso khesü soupeie.

Rathoki Sousheeyu

³ Hazekiah nou veo soulouyu po araina khouh ngaorai hinou Rathoki kikhu sü houpeiwure, ae shi-a buyu Rathoki khesü soushupu peiwure.

⁴ Puhnou napao maitao ae Levi maitaoye Rathoki vei teinghi palova kijü hi kuve jüloure,

⁵ ae puletao hi haibüa paoe, “Oh Levi maitaore, chuo neletao lahye sousheelo, ae neletao puopaoh Ramai Mapao vei Rathoki nasü soushee peikhaio. Rathoki hi sheemoa buyu na veishi popa laikhaio.

⁶ Etao puopaoh maitao nou Etao vei Ramai Mapao ye sü louchelou more, ae puhvei nghingao hinou vah ashi khesü souwure. Puletao nou puhye sü thaowure, ae Mapao nou buyu buh hisü puletao nou puletao vei zhu pfüa vaitare.

⁷ Puletao nou Rathoki kikhu sü khuwure, ae meivabvü sü sounghi khaiwure, alia pou kainüvei sü meidei peimore, ae Israel maivei Ramai Mapao hisü meidei-a posheela peimore.

⁸ Hai vanou Mapao vei lekha rarou nasü Judah ae Jerusalem hi vere, ae puhnou soupfüyu vah khesü mai hrülai nou ngaopi shore. Hai khesü neletao mai hrülainou sükhai touwe.

⁹ Etao vei puopaoh maitaoye sü soureih souyu hinou southawure, ae Etao vei nahmai ae maipfü maitaoye sü hukhamai soua nüpoa tare.

¹⁰ “Chuo Enou Israel maivei Ramai Mapao ye koa vo ali thoulai tea ale laloure, sübüa soulouzü puhnou Etao pei hi raroupu paimoe.

¹¹ Anah maitaore, teile souha puso. Neletaoye panou Mapao hi pou kainüvei meidei-a ae maikhe maiye sapoa puhye thore donou dopapei khaitoue.”

^12-14 Levi mai haitao hai buh sühinou bue: Kohath vei khü hinou Amasai nahpoutu Mahath, ae Azariah nahpoutu Joel; Merari khü hinou Abdi nahpoutu Kish ae Jehallelel nahpoutu Azariah; Gershon khü hinou Zimnah nahpoutu Joah ae Joah nahpoutu Eden; Elizaphan khü hinou Shimri ae Jeuel; Asaph khü hinou Zekhariah ae Mattaniah; Heman khü hinou Jehuel ae Shimei; Jeduthun khü hinou Shemaiah ae Uzziel.

¹⁵ Mai haitao nou puletao vei thaihou jürai soua buyu Levi maitaoye sü kuve jüloure, ae puletao hai naanou soure donou soushee loure. Süthaisü Veo nou puletao hi kharochi peikhai touyu thaifüa Rathoki sü Mapao vei Chikha thaifüa soushee tare.

¹⁶ Napao maitao nou Rathoki kikha hisü talou soushee tare, ae sheemoyu na teitei sü Rathoki kijü hi popa khaipeie. Sühinou Levi maitao nou poloua nuhdu poa lapa Kidron deikho hi laiwure.

¹⁷ Puletao nou Rathoki sousheeyu hai khouh ngaorai khoukha ali zhou nou souta-e, ae teithe acha zhousü kou Rathoki hai soushee cheloue. Süthaisü Rathoki hi rathore donou soudayu hai teithe achali loupua nou sou-e, sübüa khoukha kiarou zhou sü Rathoki hai soushee cheloue.

Rathoki Sousheeloua Sathoupu Louyu

¹⁸ Süthaisü Levi maitao nou Veo Hezekiah hi tave haibüa paoe, “Etao nou naanou soua Rathoki nasü sousheeche peiwure, ae meidei-a posheelare posheelabu, sheeyu raokhao khaire taibel, ae sühi poa vah soure na teitei sü soushee chewure.

¹⁹ Veo Ahaz nou Ramai ye louche moa buyu teile hinou potayu likhaotao-a Etao nou sousheeloua pothou khaipeiwure, ae sütao hai Mapao vei posheelabu nghoujü hi khaipei khaitoue.”

²⁰ Süthaisü Veo Hezekiah nou nuhdu hi süthai-apei maitaoye sü kuve jüloua puletao hai Rathoki hisü vere.

²¹ Veo vei kihikhamai vei mahmo ae Judah teidei hinou hrüa buyu maitao vei mahmo khaipeire donou alia Rathoki sousheere donou puletao nou chode anai, zhaotu anai, zhaotoutu anai, ae nghitu anai hai pove posheela peie. Veo nou Aaron vei tyaosholea hinou hrüveyu napao maitaoye hrikhaonatao sü posheelabu hinou posheela peio tea paopeie.

²² Napao maitao nou raikha soua chodetao sü dathaloue, süthaisü zhaopoutao, süthaisü zhaokütao dathaloua posheelabu vasü zhe lazü peie.

²³ Akhai khasoua puletao nou nghitutao sü poloua veo ye panou sühi rathore donou taveloua buyu maitaoye sü panou bah deiloure.

²⁴ Süthaisü napao maitao nou nghitu sü dathaloua sütao vei zhe nou posheelabu hisü maikhe maivei mahmo khaipeire donou lazü peie, daiolouzü Israel mai hrülai donou meidei-a posheela peiyu ae mahmo khaipeire donou posheelayu sü soupeio tea veo nou kharochi peie.

²⁵ Mapao nou Veo David hi veo vei rachipaolawo Gad ae Nathan panou paodou peiyu thaifüa veo nou Levi maitaoye poa lou souyu basei noupu Rathoki hi khaipeie.

²⁶ Levi maitao nou David nou poa lou souyu basei khesü poloua bure, ae napao maitao nou shabe poloua la-a nou buloure.

²⁷ Süthaisü meidei-a posheela peio tea Veo Hezekiah nou kharochi peie, ae meidei-a posheelayu phaki, maikhe mainou Mapao ye paoshoyu lou soue, alia lou souyu maitao nou shabe nghou-a ae poa lou souyu basei teitei noupu Mapao ye lou sousho-e.

²⁸ Meidei-a posheelayu nasü taoche loumo koute hai maisou nou ratho-e, ae lou souyu maitao-a lou sou-a nou bue.

²⁹ Süthaisü Veo Hezekiah ae mai hrülai nou nakou khoukhü loua Ramai ye tho-e.

³⁰ Veo ae süthai-apei maitao nou Levi maitao hi Veo David ae rachipaolawo Asaph nou Mapao ye lou soushore donou dapapei khaitouyu loutao nou Mapao ye sousho tea paopeie. Puletao nou sasho-a Mapao ye lou soushore, ae puletao nou nakou khoukhü loua Ramai ye tho-e.

³¹ Süthaisü Hezekiah nou maikhe mai hi paoe, “Chuo neletaoye sü soushee peiwure, südonou Mapao hi kalo vei posheela khesü pove peio.” Maikhe mainou paochi züa soupeie, ae kamai-a nou hrikhaona hai pove meidei-a posheelare donou pove peie.

³² Maikhe mainou Mapao hi meidei-a posheelare donou pove peiyu hai chode rainai, zhaotu kaihli, zhaotuti kaih ahai;

³³ ae maikhe maiye panou toure donou pove posheela peiyu hai chode kaihrou ae zhaotu thesü pove peie.

³⁴ Ana napao maitao hai mai chileyu donou posheela peiyu hrikhaona haitao sü datha khailou hore. Südonou napao kukhe maitao nou naanou soure donou soushee loumo koute hai puletao vei thaihou jürai soua buyu Levi maitao nou puletao vei vah souche loumo koute soukha peie. (Levi maitao hai napao maitao jünou naanou soure donou soushee-a buyu hai chilee cheche puhie).

³⁵ Meidei-a posheela peiyu jünou pua napao maitao nou soure vah sü maisouye panou toure donou posheela peikhai touyu southeatao meideire ae meidei-a posheelare donou peikhai touyu zhaoh hai-a lazü peilai. Haibüa Rathoki nasü Ramai ye thore donou sousheepu loue.

³⁶ Veo Hezekiah ae maisou hai lesa shore, daiolouzü Ramai nou puletaoye soukha peiyu donou vah haitao sü thasho-a nou soucheloue.