2 PUOPAOKO 27 - SHEEYU BAIBEL (BSI)

Judah hi Veo Jotham

¹ Jotham nou veo soulouyu phaki puh hai po kaingou pare, ae puhnou Jerusalem hinou po kiarou hai veo soue. Puh pfü zhih nou Jerushah toue, puh sü Zadok nah naotupai-e.

² Puh puo Uzziah büa puhnou Mapao vei nghingao hinou vah haso aveih khesü soupeie; ana puh puo büa puhnou Rathoki hi pou kainüvei sü meidei-a posheela moe. Anou maikhe mai hai vah ashi khesü soua bubaie.

³ Jotham nou Mapao vei Rathoki Reilova Robomü nasü soupeie, ae Jerusalem nuhdu hi Ophel tea kuyu kivo nasü puhnou soupeie.

⁴ Puhnou Judah deichitao hinou nuhdu khesü soushu peie, ae vaohro hi-a reihkhaobu ae kipeitaoh khesü soupeie.

⁵ Puhnou Ammon maivei veoye sü reih soua veiloue. Süthaisü puhnou Ammon maiye panou po asü koute hai po ali hinou shahu sühdou 3400, southou matric ton 1,000 ae sühthou matric ton 1,000 hai puhye panou peie.

⁶ Jotham hai khoupu lailai pare, daiolouzü puhnou puhvei Ramai Mapao chi sü soutaosou züloue.

⁷ Jotham nou soupfüyu vah kukhetao, puhnou soureih souyu, ae puhnou tayu veishi hai Israel ae Judah hi vemaitao vei larübvü hi rüthou khaitoue.

⁸ Po kaingou hinou Jotham nou pa veo souloue, ae puhnou po kiarou hai Jerusalem hinou veo soua bue.

⁹ Puh thaiyu thai, puhye sü David vei Nuhdu hinou poa vupeie, ae puh nahpoutu Ahaz nou puh thaosou pa vebuh thaoloue.