2 PUOPAOKO 26 - SHEEYU BAIBEL (BSI)

Judah hi Veo Uzziah

¹ Süthaisü Judah hi mai hrülai nou po kiarou payu Amaziah nahpoutu Uzziah panou puh puo thaosou ve kouloure.

² Amaziah thaiyu thai, Uzziah nou Elath nuhdu nasü podakhai loua soushupu loue.

³ Uzziah nou po kiarou hinou pa ve kouloue, ae puhnou po raingouahai hai Jerusalem hinou veo soue. Puh pfü zhih nou Jekoliah toue, ae honapai hai Jerusalem hi maipfüe.

⁴ Puh puo büa puhnou Mapao vei nghingao hinou vah aveih khesü soue.

⁵ Puhye paodou-apeio Zekhariah hria buyu koute hai puhnou Mapao vei kuvah sü lenou sho-a soupeie, ae Mapao nou puhye shiha peie.

⁶ Puhnou taho Philistin maiye reih soua Gath, Jamnia, ae Ashdod nuhdutao vei kivo khesü dakho peie, ae puhnou Ashdod nuhdu pehao hi buyu nuhdutao ae Philistin maivei nuh teidei hinou nuhdu khesü soushu peie.

⁷ Ramai nou puhye soukha peiyu donou puhnou Philistin mai, Gurbaal hinou hrüa buyu Arab mai, ae Meun maitao jünou reih veiloue.

⁸ Ammon mainou Uzziah ye kikha peiwe, ae puh hai khouko busho pare, sübüa puhnou zhih tayu hai Ejipt hi koute puh zhih hai chouvere.

⁹ Uzziah nou Jerusalem nuhdu hi talouyu Kainghou Robomü, Deikho Robomü, ae kivo kainghou teitei hi reihkhaobu kushoa nou soukhai loure.

¹⁰ Puhnou rekou hia reihkhaobu taoli soukhai peie, ae dzükhao-a taoli hepeie, daiolouzü puh vei kikhaorü taoli hai Shephelah deichi phi ae deikho hinou bue. Puh hai tatayu jüpa shoe, südonou puhvei maitaoye deichi hi rashibe sholo ae deikho deiveih hi shinamara thoulo tea süpeie.

¹¹ Süpei hinou puhvei reihmai me hai dushoa nou bue, ae puletaoye me-me soua puhvei rü-apeio Jeiel ae Maaseiah puhai nou veo vei peikhowo Hananiah vei khakhe hinou vah sü soue.

¹² Reihmai sütao hai peikhoyu mai 2,600 nou süthaisa-a nou bue.

¹³ Puletao vei khakhe hinou soureih veishoa soulou süyu reihmai 307,500 bue.

¹⁴ Uzziah nou puhvei reihmai hrülaiye rü, heung, peirü, sabanü, voulou, ae louthou sü peie.

¹⁵ Puhnou Jerusalem hinou shara soulou süyu maiye panou reihkhaobu hinou ae kushoa soukhai touyu kivo pei hinou kalou süyu voulou ae chuh dushoyu poa lailou süyu navei khesü soupaloue. Puh zhih hai tasho paloure ae khouko-a veisho pare, daiolouzü Ramai nou puhye khupasoua soukha peie.

Uzziah nou Khaophu Souyu donou Ramai nou Tudeeyu

¹⁶ Ana Veo Uzziah nou dusho pakhaie, puh hai khaophu soutare, südonou puh sü kaodu tare. Puhnou puhvei Ramai Mapao ye ngaophu moa Rathoki hi talou pou kainüvei deiyu posheelabu hinou meidei-a posheelare donou taloue.

¹⁷ Ana napaowo Azariah nou khoushoyu ae khuveih shoyu napao mai raicha saloua nou Veo ye thaifü louloua

¹⁸ puhye sü nuchaore. Puletao nou paoe, “Veo Uzziah, nenou Mapao hi pou kainüvei meidei-a posheelare nasü nevei vah moe. Vah hainasü Aaron vei tyaosholea hinou hrüveyu napao maitao panou soure donou soushee khaitoue. Sheeyu buh haina hinou vakou tapalo, daiolouzü ne hai Ramai Mapao hinou soumahwure, ae puhvei shiha sü ne hi bupu khailai more.”

¹⁹ Pou kainüvei meidei-a posheelare donou Rathoki hinou Uzziah sü puh bah hinou pou kainüvei meideiyu meibvü nasü poa posheelabu hinou la-a nou bue. Puhnou napao maitao hisü rarou loure, ae sübüa buyu hinou puh pu va loukhaora sou sü soupare.

²⁰ Azariah ae napao kukhe maitao nou Veo Uzziah pu hinou loukhaora soupayu sü ngaopisho-a nou zhu-a bue, ae süthaisü puletao nou puhye sü Rathoki hinou thashoa vakou hupawure. Puh-a thasho-a nou tapare, daiolouzü Mapao nou puhye sü tudee peie.

²¹ Veo Uzziah thaimo koute puh hai loukhaora sou sü soua puh sü sheemore, südonou puh sü Rathoki hi velou loushi-a lah puh ki hinou bue, ae puhvei vah haso teitei sü puh nahpoutu Jotham panou nuh teidei sü khasa-a hrüe.

²² Uzziah nou soupfüyu vah teitei hai Amoz nahpoutu rachipaolawo Isaiah nou rükhai toue.

²³ Uzziah thaiyu thai, puhye sü veo maitao daovuyu buh hinou daovu peie, ana puhnou loukhaora souyu donou veo maitao vei khüh hisü pothou vupei moe. Puh nahpoutu Jotham nou puh thaosou pa veo souloue.