2 PUOPAOKO 25 - SHEEYU BAIBEL (BSI)

Amaziah nou Judah hi Ve Koulouyu

¹ Amaziah hai po kaingou hinou ve kouloure, ae puhnou po kaikü hai Jerusalem hinou veo soue. Puh pfü zhih nou Jehoaddin toue, ae honapai hai Jerusalem hi maipfüe.

² Puhnou Mapao vei jüpa vah khesü soupeie, ana sounüyu ha-a nou soua baie.

³ Puhnou vebuh pa buloua khouko ngaolouyu phaki, puh puoye southayu süthai apei maitaoye sü puhnou southawure.

⁴ Puhnou puletao vei nahmai khesü southamoe, daiolouzü Moses vei Chikha hinou Mapao nou haibüa kharochi peikhai toue: “Nahmai nou mahmo souyu donou pfüpuoye koa southa laimoe, moa pfüpuo mainou mahmo soukhai touyu donou nahmaiye koa southa laimoe; ana lahkuku nou soukhai touyu mah thaifüa thai-a bailai.”

Edom Maiye Reih Souyu

⁵ Süthaisü Veo Amaziah nou Judah maiye save jüloua Jadah ae Benjamin khü hinou puletao vei pfümounah thaifüa mai theli ae mai kaihli pei hi peikho maiye dopa loure. Puhnou po kai payu ae süjünou layu mai hrülai zhih sü rüloue, ae puhnou soureih soulou süyu, rü-nghou polou süyu reihmai 300,000 sapa loure.

⁶ Puhnou süpei hinou Israel maivei reihmai 100,000 hai shahu sühdou 3,400 peia nou ngaloue.

⁷ Ana rachipaola apeimai ali nou veo hisü tave haibüa paoe, “Oh Veo-wo, Israel maivei reihmaitaoye ko-a soureih souso, daiolouzü Mapao nou Reilova buyu Israel maitaoye sü salai moe.

⁸ Nenou puhtaoye salouzü khouko ngaopu lousüe tea tsücho mala-e, ana Ramai nou neye ngaoba mai bah hi thoupei shulai, daiolouzü mai liye veilouyu peire moa hraongu peire khouko sü Ramai bah hi bue.”

⁹ Amaziah nou rachipaolawo hisü noue, “Ana Enou Israel mai hi peikhai touyu shahu taosü daipha soulai?” Rachipaolawo nou haibüa chila peie, “Mapao nou neye sü süjünou pou-a peipu lousüe.”

¹⁰ Südonou Amaziah nou Israel maivei reihmaitaoye ki hi seidakhai hore. Puletao nou Judah mai hi rarousho-a nou lekha soua ki hisü dakhai tare.

¹¹ Amaziah nou khuveipu loua puhvei reihmaitaoye sü saloua Tai vei Deikho hisü reih soure donou tare. Puhnou buh sühisü nou Edom maiye thekirou southaloue,

¹² ae reihmai thekirou nüloure. Puletao nou nülouyu mai thekirou sü Sela nuhdu vei chulea matao hisü sapaloua khaokou deitha khaiwure.

¹³ Ana Amaziah nou ki hi seidakhai tayu Israel maivei reihmaitao nou Samaria ae Beth Horom kohinou buyu Judah maivei nuhdutao hisü reih hulou mai thesü hai southawure, ae navei taoli poloua tare.

¹⁴ Amaziah nou Edom mai jünou reih veiloua dakhai veyu phaki, puhnou puletao vei bashara khesü poloua pove puhvei rah souloua thotare, ae pou kainüvei sü meideia sünasü posheela peire.

¹⁵ Puhnou haibüa soutayu donou Mapao nou rarouloua Amaziah hi rachipaolayu mai aliye seive haibüa paoe, “Ne daisounou lah vei maitaoye vupa peilou hoyu rah kheye sü thotawe?”

¹⁶ Rachipaolawo nanou chi paobe-a buyu hinou Amaziah nou haibüa paore, “Dukinou neye Veo maivei paodou-apeio vahbu nasü thoupeie? Raopu soubaio, molouzü Enou neye southawulai!” Rachipaolawo nou chi paopu more, ana haibüa paowe, “Ramai nou neye souhawure donou souda khaiwure, daiolouzü nenou vah ashi veishi sü soure, ae Enou paoyu achi sü pobare.”

Israel Mai hi Reih Souyu

¹⁷ Judah hi veo Amaziah nou puhvei peipha peiyu maitaoye koa shodo souloua Israel hi Veo Jehu tyao, Jehoahaz nahpoutu Jehoash hisü soureih soulaishe, tea ko paota-e,

¹⁸ Jehoash nou Amaziah hi haibüa chila seive peie, “Daoh vuhli, Lebanon Deichi hinou shube ali nou sedar süübe hi puh nah naotupaiye puh nahpoutu ki khaipeio tea khowe. Süphaki rekhaona nou ta-a buyu hinou shube nasü phi nou deisasa khaiwure.

¹⁹ Amaziah, chuo nenou Edom mai jünou reih veiloure tea khaophu sü soua bue, ana ngasoua ki hinou nasha-a bua baio. Ne daisounou veahoyu nasü lah ne pei hi ae nevei maitao hi povelai touwe?”

²⁰ Ana Amaziah nou paochi sü zübare, daiolouzü puhnou Edom maivei bashara sü thotayu donou Ramai nou puhye sü ngaobamai bah hi thoupeire donou soudawure.

²¹ Südonou Israel hi veo Jehoash nou reih soure donou tare, ae puhnou Judah hi veo Amaziah ye sü Judah teidei, Beth Shemash nuhdu hinou ve reih soure,

²² ae Judah maivei reihmaitao sü hraongu ngaore, ae reihmaitao sü lah ki hi tuve tare.

²³ Israel hi veo Jehoash nou Amaziah ye nüloure, ae puhye Jerusalem hi nüpoa ve-e, ae puhnou Jerusalem kivo sü Ephraim vei robomü hinou Kainghou robomü koute, süsü mitar kaih-ahai phali hai dakhowure.

²⁴ Puhnou Rathoki hi buyu sana, shahu, ae sühi buyu na veishi sü Rathoki khowo Obed Edom vei tyaosholea maitao noupu ae veo vei ki hinou buyu kini teitei-a poloua Samaria hi poa tare.

²⁵ Judah hi veo Amaziah nou Israel hi veo Jehoash thaiyu thai-a po kiangou lihai hrüpu hie.

²⁶ Veo Amaziah nou arai nou poa akhai koute soupfüyu vah haso khesü Judah ae Israel maivei Vemaitao Ko rükhai touyu Larübvü hi rüthou peikhai toue.

²⁷ Amaziah nou Mapao ye aetoumoa khaityayu hinou puhye Jerusalem hinou kamai-a nou hraitare, ae puhnou Lakhish nuhdu hi tutsüho hrüta-e, ana puhye ngaobayu mainou sühi thaitsü ho puhye sü southawure.

²⁸ Puhvei thaiphao sü Jerusalem hi rhei nou pfüve peie, ae puhye sü David vei Nuhdu hinou vemaitaoye daovuyu buh hisü nou poa vupeie.