2 PUOPAOKO 21 - SHEEYU BAIBEL (BSI)

¹ Jehoshaphat hai puhvei puopaoh maitao koa züzhi tare, ae puletaoye koa David vei Nuhdu hinou poa vupeie. Ae puh nahpoutu Jehoram nou puh thaosou pa ve kouloue.

Judah hi Veo Jehoram

² Jehoshaphat nahpoutu veo Jehoram hai thaihou mai arou bue: Azariah, Jehial, Zekhariah, Azariahu, Mikael, ae Shephatiah.

³ Puletao vei puo nou puletaoye sana, shahu, ae muteiyu nataoli peie, alia veishoa soukhai touyu Judah vei nuhdu chekhi hai puletaoye panou khore donou khaipeie, ana Jehoram hai nahpohtu tsükhanayu thaifüa Jehoshaphat nou puh thaosoua panou veo souloure.

⁴ Jehoram nou vebuh pa buloua duso payu phaki, puhnou puhvei thaihou mai hrülai ae Israel mai hi süthai-apei mai kamaia southawure.

⁵ Jehoram nou veo soulouyu phaki, puh hai po shiahai pare, ae puhnou Jerusalem hinou po acha veo sou-e.

⁶ Puhnou Veo Ahab ae lsreal maivei vemai ashi maitao nou tayu büa tare, daiolouzü puhnou Ahab vei nahnaotu mai aliye naloure, puhnou Mapao vei nghingao hinou vah ashi khesü soure.

⁷ Sübüa soua buyuma Mapao nou David ye koa puhvei tyaosholea maitaoye panou teisa nou Israel maiye khasa-a hrülai tea vo soukhai touyu donou David vei kihikha maiye sü souha nümore.

⁸ Jehoram nou veo soua buyu teile hinou Edom mainou Judah mai pei hisü reih soutare ae puletao hai lado souloua vedei soushu loure.

⁹ Südonou Jehoram nou puhvei peikhomai taoli saloua rheiluki pfüa Edom mai hi reih huloue, ana Edom mainou puletaoye sü sühao loure, ana khei nou puletao hai tupa loue.

¹⁰ Südonou Edom mainou Judah mai khakhe hi bumoa lado souloure. Teile süphaki Libnah nuhdu hi hrüa buyu maitao-a puhvei khakhe hi bulai more tea khaitya pare, daiolouzü Jehoram nou puhvei paipaoh Ramai Mapao ye sü thaowure.

¹¹ Puhnou süpei hinou Judah teidei hisü basharaye thoyu buhkhe-a soushu peire, ae Jerusalem hinou hrüa buyu maikheye sü panou mahmo soutare.

¹² Rachipaolawo Elijah nou Jehoram hi seiko ali haibüa rüloua seive-e: “Nenou ne puo Jehoshaphat ae Judah hi veo Asa nou tayu büa tamoyu donou nevei puopaoh David Ramai Mapao nou neye sü malaiwure.

¹³ Ne hai Israel maivei veo maitao ae Ahab kihikhamai nou Israel maiye süthai mahta peiyu büa nenou Judah ae Jerusalem maiye sü süthai mah peia panou Ramai ye sü louchelou more. Ne jünou veipua buyu nevei thaihou maitao koute-a nenou southawure.

¹⁴ Südonou Mapao nou nevei maitao, ne nahmaitao, ae nevei khapfü maitaoye sü tudee peilai alia nevei buyu navei khesü souhawulai.

¹⁵ Neye panou veashoyu sou ashi soua teithe teithe hi sou shilailai soushi lailai talai.”

¹⁶ Philistin ae Arab mai kamai-a nou Sudan maiye koa zaidu pehao hinou hrüa bue. Mapao nou puletaoye panou veo Jehoram pei hi soureih soure donou sühpeie.

¹⁷ Puletao nou Judah teidei hi soureih hulou veo ki hi buyu kini teitei sü poloure, alia veo vei nahmaitao ae maipfü maitaoye sü hukhamai soua nüpoa tare, puh nahpoutu nakhayu Ahaziah likhei shokhai peia baire.

¹⁸ Haibüa nou vepayu thaisü Mapao nou Jehoram hisü soushoyu sou ashi sünou seive peie.

¹⁹ Puhvei sou nasü shosho nou soushi lailai poa po ahai kouyu phaki puh sü veasho-a nou thaire. Puopaoh maitao hi soupeiyu zhai büa puhye sü tsükhou-a meideia puhvei thaiphao sü puhvei maitao nou reipei more.

²⁰ Jehoram nou po shiahai payu phaki veo kouloue, ae po acha hai Jerusalem hinou veo soue. Puh thaiyu phaki maili nouro dongai pfüa levea moe. Puhye sü David vei nuhdu hinou vupeie, ana veo maivei khüh hinou vupei moe.