2 PUOPAOKO 20 - SHEEYU BAIBEL (BSI)

Edom Mai Peihi Reih Souyu

¹ Phateile jütou thaisü, Moab mai, Ammon mai ae puletaoye koa Meun maitao nou Jehoshaphat pei hi soureih soulai tea vere.

² Ko pomai kamaia nou Jehoshaphat hi ve haibüa paoe, “Athai Zai hilova buyu Edom reihmai taoli nou neye soureih soulai tea laire, puletao nou Hazazon Tamar nuhdu (Engedi tea zhih kukhe ali bue) na-a poloure.”

³ Süthaisü Jehoshaphat hai ngaopi shore, ae Mapao hi veachi paoe, alia Judah teidei teitei hisü haliro toumoa lüh-a veachi paolai tea kharochi peiwure.

⁴ Judah teidei hinou hrüa buyu mai hrülai sünou Jerusalem hisü tave Mapao vei soukha khore donou vejüa bure,

⁵ ae puletao hai rathoki vei maisou vejüa bure buh ashu hisü nou tave jüa bure. Veo Jehoshaphat nou puletao nghoujü nou tashu laloure,

⁶ ae haibüa Mapao hi shusoua veachi paoe, “Oh Mapaowo, Etao vei puopaoh Ramai! Nenou deiphao hi buyu tyahrü hrülai vei vedei sü raki vanou khasa-a nou bue. Ne bah hi khouko teitei sü bue, südonou mai lia neye dulou hoe.

⁷ Ne hai Etao vei Ramai nasüe. Nevei Israel maitao nou teidei hai hi talouyu phaki, teidei hai hi hrüa buyu maitaoye nenou hulai peie, ae teidei hainasü ne sawo Abraham vei tyaosholea hi teisa vei panou soure donou peie.

⁸ Puletao nou hai hinou hrüe, ae buh hai hinou neye thore donou hrüe, ae buh hai hinou neye thore donou rathoki ali soukhaitoue, sünasü daivanou souwe toulouzü,

⁹ kaozhou ashi veyu phaki, soureih veyu phaki, rahta ravu moyuma tokaa veyu phaki, neye thoyu Rathoki nghoujü nou tave neye tho-a veachi pao louzü, nenou keinou peia khailupa peire donoue.

¹⁰ “Chuo Ammon, Moab ae Edom maitao nou Etao hi reih huloure. Etao vei puopaoh maitao nou Ejipt teidei hinou tapayu phaki, puletao vei teidei hisü nenou pa talou ba-a Etao puopaoh maitaoye sü panou tasühao-e, ae puletaoye souha moe.

¹¹ Südonou puletao hai süna vei paozho khayu phasoua nenou Etao hi peikhai touyu teidei hinou Etaoye hulailai touwu?

¹² Ne hai Etao vei Ramai-e! Nenou puletaoye sü tudee peio, daiolouzü Etao hi soureih soulai tea taveyu reihmaitao sü Etao nou duloure khouko ha-e. Etao nou dai-e soulai touyu sü sümore, ana Etao nou nevei soukha nasü vuzhi-a nou bue.”

¹³ Süphaki, Judah hi mai hrülai sünou puletao vei chapfü ae nahmai noupu koa Rathoki nghoujü nou la-a nou bue.

¹⁴ Maisou vejüa buyu hrohinou Mapao vei rako nou Zekharia nahpoutu Jahazil hisü koulou loure. Puhvei puopaoh maitao hai Benaiah, Jeiel, ae Mathaniah tea shoshonou kouwe, ae puletao hai Levi khü hinou Asaph vei tyaosholea-e.

¹⁵ Jahazil nou paoe, “Judah ae Jerusalem hinou hrüyu maitao, alia veo Jehoshaphat, Mapao nou paowe neletao ngaopiso, moyuma reihmai alao bure tea chathai taso, daiolouzü soureih soure sü neletao nou soulai moe, ana Ramai nou soua bailai.

¹⁶ Dosho taho puletaoye reih soutawo; puletao nou Ziz hi tapayu ludu hinou palai, ae neletao nou Jeruel hi talouyu vaohro deikho hinou puletaoye ngaolai.

¹⁷ Neletao nou reih sü soulai moe, neletao nou reihna tuloua la-a bulouzü chebaie, Mapao nou neletao thaosou reih sü soupeilai. Judah ae Jerusalem hinou hrüa buyu maitaore, ngaopiso, ae chathai taso; reih sü souta khaio, ae Mapao nou neletaoye kozho peilei.”

¹⁸ Süthaisü Veo Jehoshaphat nou puh pei hai deiphi pfüa nakou loure, ae puhye sa-a Judah alia Jerusalem hinou hrüyu mai hrülai-a pei pfüa nakou Mapao ye sü thore.

¹⁹ Levi khü hinou Kohath ae Korah puonah maitao nou Israel maivei Ramai Mapao ye sü lashu shusoua paoshowe.

²⁰ Thainesho shona sü puletao nou kushuloua Tekoa tea kuyu nuhdu vei vaobvü hisü tare. Puletao nou talaire tea buyu phaki, Veo Jehoshapahat nou puletao hisü haibüa pooe, “Judah ae Jerusalem hi maitaore, Ramai Mapao hi neletao vei lü sü khailo, sükulouzü neletao nou lachü loulai. Puhvei rachipaolawo nou neletao hi paoyu nasü louchelo, sükulouzü neletao nou veiloulai.”

²¹ Puhnou maikhe mai hi chi phalou nou Mapao ye lou soushore donou lou souyu maitaoye panou sheeyu sabanü thouloua reihmaitao nghoujü nou rai-a “Mapao ye paosholo, daiolouzü puh vei leshi zhuvea hai akhai ha-e” tea lou sou poa ta-e.

²² Puletao nou lou soutayu phaki, Mapao nou Judah mai pei hi reih soulai tea veyu Ammon, Moab ae Edom maiye sü soupho rarou khaiwure.

²³ Ammon mai ae Moab mai nou Edom mai pei hi reih soupaloua Edom maiye sü southa khaitoure, süthaisü puletao hai lah puletao haohao nou reih souva tare.

²⁴ Judah maivei reihmaitao nou radeiki hinou reihkhaobu soukhai touyu hinou puletaoye ngaobayu reihmaitaoye zhuyu phaki, puletao hai deiphi hi kaokou thaikhai-a ngaoloue; mai ali koute-a turei palou more.

²⁵ Jehoshaphat ae puhvei reihmaitao nou puletaoye ngaobayu maitao navei khesü pore donou talouyu phaki, puletao nou kikhaorü, touso, sabanü ae muhteiyu navei taoli hai poloure. Puletao nou buh sühisünou natao pore donou teithe asü chaore, ana na khesü pouleyu donou poshalou hore.

²⁶ Teithe adai zhou sü puletao nou Berakah tea kuyu deikho hinou ve jüloure, ae Mapao nou puletaoye donou soupeikhai touyu vah haso teitei donou Mapao ye paoshowe. Südonou deikho sünasü “Berakah” tea kuwe.

²⁷ Süthaisü Jehoshaphat nou puhvei reihmaitao ye süthaipoa sasho-a nou Jerusalem hisü dakhai tare, daiolouzü Mapao nou puletaoye ngaobayu mai jünou vei louyu sü puletao hi peie.

²⁸ Puletao nou Jerusalem hi velouyu phaki, khubvü da-a ae shabe nghoupoa puletao hai Mapao vei rathoki hi taloue.

²⁹ Israel maiye ngaobayu mai pei hisü Mapao nou sa-a reih soupeishe touyu ko sülouyu tyahrü hrülai sü ngaopi shore.

³⁰ Südonou Jehoshaphat nou veo soua buki kaona-a hrüloue, daiolouzü Ramai nou puhye sü kaozhou ashi vere teitei hinou vupeie.

Jehoshaphat nou Veo Souyu Akhai

³¹ Jehoshaphat nou Judah hi ve koulouyu phaki, puh hai po shingou pare, ae puhnou Jerusalem hinou po kaingou hai veo sou-e. Puh vei pfü zhih hai Shilhi nah naotupai Azubah toue.

³² Puh puo Asa nou hrüyu büa puh hai Mapao vei nghingao hinou kaozü nasü soua hrüe,

³³ ana bashara thoyu buh khesü souhalou more. Maikhe mai hai puletao vei tsüle teitei nou peia puletao vei paipaoh Ramai ye sü tholou more.

³⁴ Jehoshaphat nou soupfüyu vah haso teitei hai arai nou poa akhai koute hai Hanani nahpoutu Jehu nou Puopaoh maiko rükhai touyu, süolouzü Israel maivei veo maitao ko rükhai touyu hisü rüthou pei khaitoue.

³⁵ Judah hi veo Jehoshaphat nou vuli Israel hi veo, hashili soua buyu Ahaziah ye koa chavei lathao-a hrüe.

³⁶ Puhai koa Eziongeber vei dzüluki khaiyu fühao hinou dzüluki koa nou soue.

³⁷ Ana Dodavahu nahpoutu Eliezer, Mareshah nuhdu hinou hrüyu puhnou Jehoshaphat hi haibüa rachi paopeie, “Nenou Ahaziah ye koa vah souzhoyu donou Mapao nou nenou soukhai touyu vah haso khesü souhawulai.” Südonou dzüluki khesü pepota-a pfülou shi-a baire.