2 PUOPAOKO 2 - SHEEYU BAIBEL (BSI)

Rathoki Soutare donou Soudayu

¹ Solomon veo nou Mapao ye thore Rathoki ali ae puhnou bure donou veo maiki ali soulai tea lela loure.

² Puhnou mai therainai hai panou nakhe povere donou, ae mai thesüa kaihrou hai panou vah souyu maitaoye zhupeire donou dokhaiwure.

³ Solomon nou Tair hi Veo Huram hi haibüa chi paota-e, “Nenou apuo David nou bure veo maiki souyu phaki sedar süü seive peiyu büa E-a soukha peio.

⁴ E avei Ramai Mapao ye tsükhouyu hinou Rathoki ali soulai tea bue. Sünasü sheeyu buh ali soua avei maitao ae Enou pou kainüvei meideia Ramai ye thore donou, tobai soumoa raokhao posheelare donou, teithetsü shona ae khoukhe, Soteithe zhou, ae khouh ashu ngaolouyu vei khonü hi, alia sheeyu teithe teitei hi Ramai Mapao tsükhoua thore donou-e. Puhnou teisa nou haibüa soulo tea Israel mai hi kharochi peikhai toue.

⁵ Enou rathoki nasü dusho-a soulai tea bue, daiolouzü Etao Ramai hai rah kukhe jünou dupu hie.

⁶ Ana Ramai ye panou bure ki sü mai alinoua soupei louhoe, daiolouzü raki teitei hai-a puhye donou bulouzü-e. Enou soure rathoki nasü pou kaivei meidei-a puhye posheelare donou sou-a bailai.

⁷ Südonou chuo Eye sana, shahu, baosahu, ae hu, alia daiyu, papayu ae hoyu sah poa vah soulou süyu maiye seive peio. Puhye sü apuo David nou Judah ae Jerusalem hinou dopakhai touyu shamara soulou süyu maitaoye koa panou vah soulai.

⁸ Eye Lebanon hinou sedar süü, saipres süü, ae juniper süü seive peio, daiolouzü nevei vahsou maitao hai vah souveih sho-e touyu Enou süwe. Avei kilai maitao sü seiho nevei kilai maitaoye panou soukha peilai,

⁹ daiolouzü Enou soure rathoki nasü khupasoua dusho-a soure donou süü alao hai loulai.

¹⁰ Süü daoyu nevei kilai maitaoye panou toure donou Enou neye sü southou metric ton thehai, barlithou metric ton thehai, darkhadzü litar theraidai, ae oliv theadzü litar theraidai hai seive peilai.”

¹¹ Süthaisü Veo Hiram nou Solomon hi haibüa seiko hinou chila sü rüloua seive peie, “Mapao nou puhvei maitaoye leshiyu donou puletao pei hi neye panou veo soupeie.

¹² Raki ae daiphao sou-apeio Israel maivei Ramai Mapao ye sü paosholo! Puhnou David veoye hasü shoyu, veishi sükulou süyu tsü pfüyu, Mapao donou rathoki ali soure donou ae lah puhnou bure veo maivei ki ali soure donou dokai bushoyu nahpoutu ali peie.

¹³ Enou tsü veishoyu ae shara souveih shoyu mai ali Huram tea kuyu maipu naye ne hi seive peiwe.

¹⁴ Puhvei pfü hai Dan khü hinou hrüve-e, ae puh puo hai Tair maitya-e. Puh hai sana, shahu, baosahu, hu, chuh, ae süü khesü poa vah soulou süwe. Süpei hinou puh hai daiyu, maomüyu ae hoyu sah khesü poa vah soulou süe. Puh hai haibüa soulo tea paoyu thaifüa larücha tyatyali daothou lousüe. Puhnou apaopu, ne puo David nou soudakhai touyu shamara soulou süyu maitaoye koa vah soulou süe.

¹⁵ Südonou chuo nenou peilai tea paokhai touyu southou, barlithou, darkhadzü, ae oliv theadzü khesü seive peio.

¹⁶ Nenou jüpayu sedar süü sü Etao nou Lebanon deichi hinou daopeilai, ae süü sütao sü Etao nou phupaloua zai pei hinou poa Joppa hi koute pokou peilai, ae buh sühi sünou nenou Jerusalem hisü povelo.”

Rathoki Soutayu

¹⁷ Puh puo David nou maipei phouyu büa Veo Solomon nou Israel maivei teidei hinou hrüyu shetumai hrülaiye sü maipei phou-e. Maipei phouyu hisü shetumai hai kiphao 153,600 bue.

¹⁸ Puhnou mai 70,000 hai panou na pfüre donou, mai 80,000 hai deichi hinou pa chuh daore donou ae mai 3,600 hai panou vah souyu maitaoye zhu peire donou vahbu thoupeie.