2 PUOPAOKO 19 - SHEEYU BAIBEL (BSI)

Rachipaola-apei Mai Ali nou Jehoshaphat ye Zühyu

¹ Judah hi veo Jehoshaphat nou kaozhou ashi daomoa lah puh ki Jerusalem hisü dakhai veloure.

² Anou rachipaolawo Hanani nahpoutu Jehu nou veo hisü tave loua haibüa paoe, “Mai ashi maiye soukhayu ae Mapao ye ngaorayu maiye babou peiyu hai ne kao-e tea tsüchowu? Nenou soua pfüyu vah haitao donou Mapao nou ne pei hi rarou loure.

³ Sübüa buyuma ne hi haveih sü bue, daiolouzü teidei hi buyu Asherah rapfüpai zhurai ae maikhe mainou tho-a buyu basharatao nenou souhalai khaipeiwure, ae nenou Ramai vei jüpa nasü soure donou phoua bue.”

Jehoshaphat nou Souda Peiyu

⁴ Veo Jehoshaphat hai Jerusalem hinou hrüa buyuma, puh hai puhvei maitaoye puletao vei puopaoh Ramai Mapao hi sapoa dakhai veloure donou sühao poa takoute-a bubaiwe. Puhnou khelo buyu Beershaba nuhdu hinou poa reilova khe Ephraim maivei deichi nuhtao hi khete hai sühaota zhazhawe.

⁵ Puhnou Judah vei nuhdu teitei hisü chiku-apei mai hai dokhai peie,

⁶ ae puletao hi haibüa soulo tea paodou peie, “Neletao nou chikuyu phaki soutaosoua chikupeio, daiolouzü neletao hai mai donou chiku moe, Mapao donou chiku peiwe. Neletao nou chiku peiyu hisü Mapao nou koa loua nou chiku peiwe.

⁷ Mapao ye tsükhoulo, ae tsücho sei-a hrülo, daiolouzü neletao vei Ramai Mapao hai kaozü nasü porei laiyu, soude soukuyu ae seihla poyu haisü aetou moe.”

⁸ Süpei hinou Jerusalem hi veo Jehoshaphat nou Levi mai, napao mai ae Israel mai hi peikhoyu kamai-a panou Mapao vei chikha pfüthoyu ae züveiyu khesü chiku peire donou dopei khaitoue.

⁹ Puhnou puletao hisü haibüa paodou peie, “Neletao nou soupfüyu vah haso veishi hisü Mapao ye tsükhouyu hinou ae chilee cheche-a soulai.

¹⁰ Neletao vei thaihou-jürai mai taralinoua neletao hi taitha dathayu vanou, moa chikha pfüthoyu donou chilou kupeio tea poveyu phaki, puletao hisü chikhatao haibüa bue touyu khesü soutaosoua paodoutou toupeio. Neletao nou haibüa paodou peilou more toulouzü, neletao hi ae neletao vei thaihou jürai maitao hisü Mapao vei lekha rarou nasü ve-a bailai. Ana neletao nou souzü pfüzü nasü soua bulouzü neletao mah laimoe.

¹¹ Napao peichawo Amariah nou rathoyu hilo soupfüre teitei hisü neletao peikhowo nasü soulai, ae Judah vei teidei khowo Ishmael nahpoutu Zebadiah nou teidei khoyu hilo chilou kure teitei hisü puhvei khakhe hinou soulai. Chilou kukhai touyu khesü soupfü tare hisü Levi maitao nou zhua soupfü talai. Südonou khuveilo ae paodou peikhai touyu khesü soutaosoua soulo, ae Mapao panou kaozü soua buyu mai hisü buu peiyu soulou theo.”