2 PUOPAOKO 18 - SHEEYU BAIBEL (BSI)

Rachipaolawo Mikaiah nou Ahab ye Paopiyu

¹ Judah hi veo Jehoshaphat hai toungi shopare ae zhih-a tasho loure; ae puhnou puhvei kihikhamai ae Israel hi veo Ahab vei kihikhamai koa heisha souzho loure.

² Po taoli thaisü Jehoshaphat nou taho veo Ahab ye kealai tea Samaria nuhdu hisü tare. Jehoshaphat ae puhnou salaiyu maitaoye tsükhouyu hinou Ahab nou kikhaorü taoli dathaloua koa khonüh nüe. Puhnou veo Jehoshaphat ye Gilead teidei hinou buyu Ramoth nuhdu nasü koa reih hulou laishe tea kure.

³ Puhnou noue, “Ne Eye koa Ramoth nuhdu pei hi reih soulai moge?” Jehoshaphat nou chila peie, “Nenou soulai touyu nasü E-a aetoua bubaie, ae avei reihmaitao sü nevei baie. Ahai koa nou reih soulai.”

⁴ Süthaisü puhnou paopue, “Ana rai-a nou Mapao hi nourai laishe.”

⁵ Südonou Ahab nou rachipaola peiyu mai kaihdai phali kupo veloua nou puletao hisü nou-e, “Ramoth hi taho reih soulaiho bailaige?” “Taho reih soua vei-e, Ramai nou neye veilouyu sü peilai” tea puletao nou paoe.

⁶ Ana Jehoshaphat nou noupue, “Mapao vei rachipaola-apei mai kukhe hinou noupu loure mai hadou?”

⁷ Ahab nou chila peie, “Mai ali bupu hie, Imlah nahpoutu Mikaiah. Ana Enou puhye ngaora-e, daiolouzü puh hai ahi teithe ali koute-a veiyu sü paopei moe, shiyu khaiko nou pao-a baiwe.” “Ne sübüa paoyu kaomoe” tea Jehoshaphat nou chila peie.

⁸ Süthaisü Veo Ahab nou puhvei peikhomai ali kuloua nou rachipaolawo Mikaiah ye thashoa hai hi save-o tea lütawure.

⁹ Israel hi Veo ae Judah hi Veo puhai mai ahai nou Samaria hi talouyu robomü pe hinou buyu thaibuh hi sünou Veo maivei na sü tupfüa vebuh hisü nou bue, ae rachipaolayu maitao nou puhai nghoujü nou rachi sü paopeia bue.

¹⁰ Puletao hrohinou mai ali, Kenaanah nahpoutu Zedekiah nou hu nou kai souloua haibüa paoe, “Mapao nou haibüa paoe, ‘Nenou haina poloua Sairia maiye sü southakhai touloulai.’ ”

¹¹ Rachipaoyu kukhe maitao-a raibütoua paoe, “Ramoth hisü taho reih soukhaio, nenou ngaloulai. Mapao nou ne hi veilouyu nasü peilai.”

¹² Süphaki, Mikaiah ye taho kutayu peichawo nanou puh hi paoe, “Rachipaolayu mai hrülai hai veo nou ngaloulai tea paokhai toure, südonou ne-a puletao nou paoyu raibüa paopeiyu nanou vei-a bailai.”

¹³ Ana Mikaiah nou chila peie, “Mapao hai hriyu thaifüa, Ramai nou ahi paoyu nasü E pao-a bailai.”

¹⁴ Puhnou Veo Ahab nghoujü veyu phaki, veo nou puh hi noue, “Mikaiah, veo Jehoshaphatye koa ahai taho Ramoth hi reih soulaiho soumoyu-a veilai?” Mikaiah nou chila peie, “Taho reih sou-o, Mapao nou ne hi veilouyu sü peilai.”

¹⁵ Ana Ahab nou chila peie, “Ne Mapao vei zhih hinou ahi chi paoyu phaki acheche hinou paopeio. E ne hi vu kazhou haibüa paolai?”

¹⁶ Mikaiah nou chila peie, “Zhaokhomai ha-a nou zhaotu khesü raroupoa tayu büa Israel maivei reihmaitao hai deichi vanou raroupoa buyu Enou zhingaoe. Ae Mapao nou haibüa paoe, ‘Mai haitao hai süthai-apei mai hare, puletaoye panou kaona-a lah ki hi dakhai tawo.’ ”

¹⁷ Ahab nou Jehoshaphat hi paoe, “Enou ne hi pao movu, mai haina hai havei touyu ali-a paopei moe, teisa nou ashi sünou pao-a baiwe.”

¹⁸ Mikaiah nou paopue, “Chuo Mapao nou paoyu chipao sü keilo! Raki hinou Mapao hai puhvei vebuh hinou bua Enou zhingaoe, ae puh pehao hisü rakivamai nou lapoa nou bue.

¹⁹ Mapao nou paoe, ‘Neletao thaonou Ahab ye sü züloua saho Ramoth hinou southa peilaige?’ Rakivamai kamai-a nou ali paoe, ae kukhe nanou tyakua nou paoe.

²⁰ Süthaisü rakivamai ali nou Mapao vei nghoujü hi takouloua haibüa paoe, ‘Enou puhye sü seiloulai.’ ‘Kabüa ne soulai’ tea Mapao nou noue.

²¹ Rakivamai nanou chila peie, ‘Enou taho Ahab vei rachipaolayu mai hrülaiye sü panou mada-a rachi paopeilai.’ Mapao nou paoe, ‘Taho soukhaio, nenou ngaloulai.’ ”

²² Mikaiah nou haibüa akhai chi paoe, “Südonou chuo zhukhaio, Mapao nou nevei rachipaola peiyu maitao hisü dayu rako thoupeiwure; ae Mapao nou neye sü panou hakatare donou souda khaiwure.”

²³ Süthaisü rachipaolawo Zedekiah nou takou Mikaiah ye sü phacha peiwua puh hi noue, “Dukinou Mapao vei rako sü ahinou tare, ae neye duki kea-e?”

²⁴ “Ne kihikha talou tutsüa bulouzü süzhou teithe hinou nenou süloulai” tea Mikaiah nou chila peie.

²⁵ Süthaisü Veo Ahab nou puhvei peikhomai ali hi “Mikaiah ye nüloua poho nuhdu sühi Teidei Khowo Amon, ae veo nahpoutu Joash hi peio.

²⁶ Puhai hi puhye sü hukhaki hi thoukhaio, ae E dakhai vemo koute puhye sü raokhao ae dzü likhei peia baio tea paopeio” tea kharochi peie.

²⁷ Mikaiah nou paoe, “Ne kaozhou vei-a dakhai ve loure touyu thaio, Mapao nou ahi pao moe touyu sülai.” Puhnou süthai-a paopue, “Mai hrülai Enou paoyu haisü keipeio.”

Ahab nou Thaiyu

²⁸ Süthaisü Israel hi veo Ahab ae Judah hi veo Jehoshaphat puhai hai Gilead teidei hi buyu Ramoth nuhdu nasü reih huloulai tea tare.

²⁹ Ahab nou Jehoshaphat hi paoe, “Reihbu hi talouyu phaki, Ewo louzü maiye panou shimore donou sabanü tyakua banou loulai, ana neolouzü veo maivei sabanü thoulo.” Südonou Israel mai hi veo sü maiye panou shimore donou sabanü tyakua thouloure.

³⁰ Sairia hi veo nou puhvei rheiluki pfüyu peikho maitao hisü mai kukheye reih dusho, ana Israel mai hi veo likhei dua baio tea kharochi peie.

³¹ Südonou puletao nou veo Jehoshaphat zhingao louyu phaki, puletao mai hrülai nou puh hai Israel mai hi veo phare-e tea tsücholoua puhye sü thaihu koure. Ana Jehoshaphat nou shusoua rayu phaki, Ramai Mapao nou puhye sü vupa peie ae puhye thaihu kouyu maitaoye sü panou thaikhai tare.

³² Rheiluki pfüyu peikho maitao nou puhye ngaolouyu phaki, puh hai Israel maivei veo more touyu süloua thaihu koupu more.

³³ Ana Sairia mai ali nou puhvei voulou kapayu hisü nou Israel maivei veo sü puhvei rü ae khaokayu kohinou puhye sü zhiwure. Südonou puhnou puhvei rheiluki pfüyu na hisü paoe, “Reihbu hinou Eye vakou sapapeio, daiolouzü Eye zhipeiwure.”

³⁴ Süzhou heamazü sü reih shishoa soure, ae veo nou puhvei rheiluki hinou Sairia mai hilova eihtea nou zhupoa nou bue, ae teinghi louyu phaki, puhsü thaitare.