2 PUOPAOKO 17 - SHEEYU BAIBEL (BSI)

Jehoshaphat nou Ve Koulouyu

¹ Jehoshaphat nou puh puo Asa thaosü pa veo souloure, ae puhnou Israel maiye dure donou puhvei vedei sü soukhousho-a khailoure.

² Soureih maiye panou loulou hore donou kaopo veishoa pokhai touyu Judah vei nuhdutao, Judah teidei kainghou hinou buyu nuhtao hi, ae Asa nou reih soua Ephraim mai hinou polouyu nuhtao hisü puhnou puhvei reihmaitao sü khailoure.

³ Jehoshaphat nou puh puo vei hrü araina thaifüa hrülouyu donou ae Baal rahye tho moyu donou Mapao nou puhye shiha peie.

⁴ Puhnou puhvei puopaoh Ramai ye tho-e, Ramai vei chikha khesü züa hrüe, ae Israel maivei veo maitao nou hrüyu büa puh hai hrü moe.

⁵ Südonou Mapao nou puhvei vedei sü souduso peie, ae maikhe mainou puhye sapeina khesü pove peie, südonou puhsü hangi shopare ae maikhe mainou puhye sü tsükhou shopeie.

⁶ Puhnou Mapao ye thoyu hai chahri shoe, ae puhvei kuvah souyu hisü khuveih shoe, alia cheche moyu rahtaoye thoyu buh teitei, ae Asherah rapfüpai vei bashara veishi sü Judah teidei hinou souha khaitou peie.

⁷ Puhnou veo soulouyu po asü navasü puhnou Judah teidei hi panou paodou peire donou puh khenou buyu peikhomai haitaoye seita-e: Benhail, Obadiah, Zekhariah, Nethaniel, ae Mikaiah.

⁸ Puletaoye sü Levi mai akü ae napao mai ahai nou koa sata-e. Levi maitao hai Shemaiah, Nethaniel, Zebadiah, Asahel, Shemiramoth, Jehonathan, Adonijah, Tobijah, ae Tobadonijah, alia napao mai ahai zhih nou Elishama ae Jehoram.

⁹ Puletao nou Mapao vei Chikha Larübvü nasü poloua Judah teidei teitei hi tasühao-a maikhe maiye paodou peie.

Jehoshaphat vei Aduso

¹⁰ Judah pehao hi buyu vedei teitei sü Mapao nou Jehoshaphat ye panou ngaopiyu sü soupeia puh hi soureih soumore.

¹¹ Philistin hi kamai-a nou Jehoshaphat hi shahu taoli ae sapeina kukhe-a loua nou pove peie, alia Arab mainou zhaotu 7,700 ae nghitu 7,700 hai pove peie.

¹² Jehoshaphat hai sübüa shoshonou dulailai pare. Puhnou Judah teidei teitei sü kaopo poa souveisho khailoure, ae kini pojü khaiyu nuhdutao-a soukhai loure.

¹³ Judah hi buyu nuhdu taoli hi hai puhnou kini alao sou pojü khailoure. Jerusalem hi puhnou soureih souyu hi lamoshoyu peikho maitao hai

¹⁴ khü-khü thaifüa khailoue. Judah mai khü hi Adnah nou reihmaitao peikhowo sü soue, ae puh khehinou reihmai 300,000 bue.

¹⁵ Puhvei khe hi hai Jehohanan nou peikhowo sü soua puhvei khakhe hinou reihmai 280,000 bue,

¹⁶ ae puh thaisho hai Zikri nahpoutu Amasiah nou reihmai 200,000 peikhowo sü soue. (Amasiah hai Mapao vei kuvah soulai tea lahnou khaloue.)

¹⁷ Benjamin khü vei reihme hi hai Eliada nou peikhowo nasü soue, puh hai soureih souveih shoyu reihmai ali-e, ae puhvei khakhe hinou reihmai 200,000 bue,

¹⁸ ae puh khe hinou Jehozabad nou reihna tutoupfüa buyu reihmai 180,000 pei hinou khasa-a nou bue.

¹⁹ Mai haitao nou Jerusalem hinou veo vei kuvah sü sou-e, ae süpei hinou veo nou Judah vei nuhdu veishi hisü reihmai taoli hai khaipei khaitoue.