2 PUOPAOKO 15 - SHEEYU BAIBEL (BSI)

Asa nou Nuh-Teidei Souveipu louyu Vahtao

¹ Obed nahpoutu Azariah hi Ramai vei rako koulou loure,

² ae puhnou Veo Asa ye ve daolai tea tare, alia puhnou haibüa paoe, “Veo Asa, ae Judah alia Benjamin mai hrülai, apai keipeio! Neletao nou Mapao ye koa salai louzü, puhnou neletaoye salai koute peilai. Neletao nou puhye phoulouzü, neletao nou puhye ngaoloulai, ana neletao nou puhye thaowu louzü, puh-a neletaoye thaowua bailai.

³ Teile taoli hai Israel mainou acheche Ramai ye sa-a hrümore, ae puletaoye paodou peire napao mai ha-a chikha khesü sümoa hrüre.

⁴ Ana puletao nou veahoyu vedaoyu phaki, puletao nou Israel maivei Ramai Mapao hisü dakhai vere. Puletao nou puhye sü phouta-e, ae puletao nou puhye sü ngaoloue.

⁵ Sübüa hrüyu teile hi kaonayu sü hayu donou mai ali-a tapa talou louhore, daiolouzü teidei teitei hisü veahoyu ae büraroua hrüa bubaie.

⁶ Tyahrü ali nou tyahrü aliye souchoroa hrüa baie, ae nuhdu ali nou nuhdu aliye souvea nou bubaie, daiolouzü Ramai nou puletao hisü veahoyu ae choroyu sü pove peie.

⁷ Ana neletao louzü khouchilo ae chathai taso, daiolouzü neletao nou souyu vah haso khesü buu peilai.”

⁸ Asa nou Obed nahpoutu Azariah nou paoyu chipao sü chou louyu phaki, puh sü khuveih pare. Puhnou Judah ae Benjamin maivei teidei hi buyu bashara teitei, ae puhnou deichi vanou buyu Ephraim maivei teidei polouyu hinou buyu bashara teitei sü souha khaire. Puhnou Rathoki nghoujü nou buyu Mapao vei posheelabu nahai-a souveipu peie.

⁹ Ephraim, Manasseh ae Simeon mai taoli hai Asa vei vedei hi ve hrülai tea veloure, daiolouzü Mapao nou puhye salai peiyu sü puletao nou ngaoloure. Asa nou puletao mai hrülaiye ae Judah alia Benjamin maitaoye kuve jüloure.

¹⁰ Asa veo nou ve koulouyu po kiangou-a khouh asü zhou sü puletao mai hrülai nou Jerusalem hi ve jüloure.

¹¹ Süzhou teithe puletao nou soureih souyu hinou polouyu kinitao nou poa Mapao ye posheela peie. Kikhaorü kaihnai ae zhaotu thenai hai Mapao hi posheela peie.

¹² Puletao nou puletao vei puopaoh Ramai Mapao ye puletao vei tsüle ae rako teitei nou peia puhye tholai tea chaachou soua vo ali souloue.

¹³ Mai taralia, tsümai-a ae nahlemai-a, moyuma naotu-a ae poutu mai-a Israel maivei Ramai Mapao ye tho moyu maiye sü southawulai.

¹⁴ Puletao nou pai chishoa Mapao zhih hinou vo hainasü soulai tea chaachou souloua shapaloue, süthaisü puletao nou shusoua share ae shabe sü nghoue.

¹⁵ Judah teidei hinou hrüyu mai hrülai sü asa shore, daiolouzü vo hainasü puletao vei tsüle teitei nou peia souloue. Puletao nou Mapao ye sü puletao vei tsüle ae hrümai teitei nou peia tho-e, ae Mapao nou puletaoye sü popeie, alia ha veishi hinou puletaoye kaonayu sü peie.

¹⁶ Veo Asa nou puh paih Maakah koute-a veo pfüpai soua buyu buh hinou pophawure, daiolouzü honapai nou ngaorayu Asherah rapfüpai zhurai souloua tho-e. Asa nou honapai vei bashara sü daodere ae souphe soupho sasaloua Kidron deikho hinou meidei laiwure.

¹⁷ Asa nou Israel maivei teidei hi cheche moyu ratho buh khesü souhakhai toulou more, ana puhvei hrümai teitei hisü puh hai Mapao hinou chilee cheche-a hrüe.

¹⁸ Puh puo Abijah nou Ramai hi soushee-a peithou khaitouyu na teitei sü puhnou Rathoki hi pove khaipeie, ae puhnou sana ae shahu hai sousheeloua Ramai hi peithouyu haikhe teitei-a koa Rathoki hi pove khaipeie.

¹⁹ Puhnou veo soua buyu po shiangou hai soureih soumoe.