2 PUOPAOKO 10 - SHEEYU BAIBEL (BSI)

Reilova buyu Khütao nou Aetou Moyu

¹ Rehoboam nou Shekem hisü holai tea tare, daiolouzü reilo buyu Israel mai hrülai nou puhye panou veo soure donou buh sühinou tave jüa nou bue.

² Nebat nahpoutu Jeroboam nou haibüyu ko hai choulou khaie, (daiolouzü süphaki puh hai Solomon veo hinou tutsüho Ejipt hinou bue) puhnou Ejipt hinou dakhai vere.

³ Südonou puhnou Israel mai hrülaiye saloua Rehoboam hi ve haibüa paore,

⁴ “Ne puo nou Etaoye panou veashoa nou hrüe. Nenou Etao vei koupo hai jünou southapei louzü ae Etaoye panou hai jünou vapua hrülouzü, Etao hai nevei khakhe hinou chilee chechea teisa nou hrüa bailai.”

⁵ Rehoboam nou chila peie, “Eye panou kabüa soulai touyu tsücho loure donou teithe asü peio. Süthai nou ahi dakhei ve-o.” Südonou maikhe mai hai tara tare.

⁶ Veo Rehoboam nou puh puo Solomon vei paodou-apei maitao hi “Kabüa mai haitao hi chila peilai” tea nou-e.

⁷ Puletao nou haibüa chila peie, “Nenou mai haitaoye leshi pei-a sousava peilouzü, ae chi lako aveih nou chalapei louzü, puletao hai teisa nou chilee cheche-a nevei khakhe hinou hrüa bailai.”

⁸ Ana puhnou tsümaitao chi sü po moa puhye koa hrüpayu nahlemai mai chi nou poloua baire.

⁹ Puhnou puletao hisü nou-e, “Puletao vei koupo southa peio tea paoyu maitao hisü kabüa E chila peilai? Eye paodou peio.”

¹⁰ Nahle maitao nou haibüa paodou peie, “Nenou puletao hisü haibüa paolo: Abah toutu nakhayu na-a apuo vei khya jünou dupu hie.

¹¹ Apuo nou neletaoye panou pfüyu koupo pei hi Enou thoupu peilai hi-e. Apuo louzü neletaoye süüra nou poa da baie, ana Enou neletaoye cho-ha dayu süüpo nou poa dalai.”

¹² Teithe asü thaisü, Jeroboam ae Israel mai hrülai hai Veo Rehoboam hi puhnou paoyu thaifüa ve-e.

¹³ Veo nou tsümaitao nou paodou peiyu chi nasü polou moa maikhe mai hisü chi la ashi sünou pao-a baire.

¹⁴ Puhnou maikhe mai hisü nahlemaitao nou paodou peiyu nasü thaifüa haibüa paoe, “Apuo nou neletaoye koupo sü panou pfüe, Enou süpei hinou thoupu peilai hie. Puhnou neletaoye süürou nou da-e; Ewo louzü neletaoye rhei poa dayu süüpo nou dalai.”

¹⁵ Ramai Mapao vei lelina thaifüa rachipaolawo Shiloh puona Ahijah nou Nebat nahpoutu Jeroboam hi paopeiyu chipao khesü panou vepare donou veo nou maikhe mai chi sü pobare.

¹⁶ Israel maitao nou veo hai puletao vei chi sü kei peilai more touyu sü zhingao loukhai-e, puletao nou veo hisü haibüa paore, “Etao nou David hinou dai ngaore bue? Etao hai Jesse vei nahpoutu maitao hinou kikaa ngaore halia ha-e. Oh Israel maitaore, lahkuku vei ki hi dakhai tawo. Rehoboam ye panou lavei ki sü zhulo.” Sübüa Israel maitao hai linaonao vei ki hisü dakhai tare.

¹⁷ Ae Rehoboam hai Judah maivei teidei hi buyu Israel maitao hi likhei veo soua baire.

¹⁸ Süthaisü Veo Rehoboam nou veavah souyu maitao peikhowo Adoniram ye Israel maitao hi seive-e, ana puletao nou puhye sü chuh nou deithawure. Sübüa soupei khai-e Rehoboam hai thashoa puhvei rheiluki hi taopa loua Jerusalem hi tuve loure.

¹⁹ Süthai sünou reilova buyu Israel maitao hai David vei kihikha maiye vamoa soureih soutare.