2 PITAR 2 - SHEEYU BAIBEL (BSI)

Amada Dou-apeimai

¹ Dao raichoki maikhemai hrohi amada rachi paolamai ve-e, alia sübüa amada dou-apeimai hai neletao hrohi velai. Puletao nou kheikhei soua hakalou vei cheche moyu doupeiyu sü poveloua puletaoye khailupa peiyu Mapaoye sü motoulai, alia südonou puletao nou lah puletao pei hi sü thashoa hakayu povelai.

² Sübüa, maitalinou puletao vei khakha ludu thaifüa talai, alia puletao vanou kukhe mainou acheche Ludunaye sü paoshilai.

³ Puletao vei loküyu süna vanou, puletao nou neletaoye amada chipaonou souha-souka peilai; puletao pei hi mah dukhairesü dao raichokinou soudapoa koure, alia puletaoye Souhawure nasü zhaihepoa bure!

⁴ Mah souyu rakivamai taoye Ramai nou tudei moa khaimoe, ana puletaoye sü meizai buh hi laithoure, sühinou puletaoye sü teizhi hinou phukhaiwu-a Chikuyu Teithe sünasü panou khoa buwe.

⁵ Ramai nou daoraiki deiphao naye sakhai-a phapeimoe, ana ramai loumoyu maikhe maitao vei deiphao süna pei hisü dzüdu povepeie; puhnou khailu peiyu sümaitaowo louzü acheche Ko paodouyu Noha ea kukhe mai anai sütaobaie.

⁶ Ramai nou Sodom ea Gomorrah nuhdu sühai pei hi mah dukhaiwu-a sühaiye sü meinou souhawure, alia sübüa ramai loumoyu maitao pei hi dai palaisa touyu zhai nasü soungao peire.

⁷ Mai ashi taovei khakhayu zhaido sünanou souvea-a buyu maiveina Lotye puhnou khailu papeie.

⁸ Maiveio sünasü puletao hrohinou hrüe, alia puletao vei ashi vah sütaosü ngaoloua ea chouloua teithe tsünou puhsü le veashoa bue.

⁹ Südonou ramaiye süyu maiye kakua puletao vei veahoyu hinou khailu palou laisa touyu ea mai ashimaiye kakua Chikure Teithe donou hukhahi khailaisa touyu sü Mapaowo nou süwe.

¹⁰ Koulihsoua ke-zhe züpa thaifüa khulou souyu maitao ea Ramai vei khakhehi hrübayu maitaoye Ramai nou tudeilai. Amada dou-apeimai haitaosü khuveiwe ea khaophu souwe, alia khouko ava buyu rakimaiye paoshiyu halia pimoe. Süjüwo puletao nou sütaoye sou ahraopeie.

¹¹ Amada dou-apeimai haitao jünou koushoa khou-chihyu rakivamaitao-a Mapaowo nghojünou puletao pei hi sou ahrao peia mah dukhai moe.

¹² Ana mai haitaowo pfüna tsünou vah soua tsü hayu rekhaosou kua panou niloure ea southeare donou nakoubaie; puletao nou sükhai moyu talisü puletao nou sou ahrao peia duwe. Rekhaosou kua puletaoye souhawulai.

¹³ Alia puletao nou souvea peiyu süna donou puletaoye veayu nou paorü peilai. Puletaoye donou vayu touyuhai teiva hinou puletao ke-zhe züpa tali souyu süsüe; ha teitei hinou puletao vei amada ludu hinou ta-a, puletao nou neletaoye koa tou-shoyu hai ahrao ea zhih soushiyu süsüe.

¹⁴ Puletao nou khakhapfü moanou kukhe hataliye zhunü moe; puletao nou mah sounüyu hai hakia khramoe. Puletao nou lelouho maiye shohi süthailou peiwe. Puletao lehai loküyu hinou soudouwu chere. Puletao hai Ramai nou chapeiyu nahmaitaoe!

¹⁵ Puletao hai acheche ludu nasü thaowu-a motare; zümoyu vah souyu vanou ngaolouyu poushanaye leshiyu Beor nahpoutu Balaam vei luduna thaifüa puletaosü tare,

¹⁶ ana puhye sü puh mah vanou züpeire. Puhvei rheisüh sünanou emai lapainou pao-a avoyu rachi paolamai süna vahsü panou nukhaire.

¹⁷ Mai haitao hai thekeikeiyu dzühoung kue ea teikhai teirünou hüpfüa laiyu teihao kue; puletaoye donou thouthoulai teizhi buh süsü Ramai nou souda khaire.

¹⁸ Puletao nou khaophu souyu ea voyuchi paowe, alia kao-zü moyu hinou hrüyu maikhemai hronou chubünou tupaloua buyu puletaoye sho hinou muloure donou ke-zhe züpa vahnou chaowe.

¹⁹ Amada dou-apeimai haitaonou mai sütaoye sü mado soupeire apaopeiwe, ana lah puletaosü hakayu zhaidovei kilai soua bue; daiolouzü maitali hai puhye kolouyu sünavei qila baie.

²⁰ Maikhe mainou puletao hi buyu Eletao Mapao ea Khailu-apeio Jisu Khrista vei tsü süna vanou deiphao vei ashi khouko süna hinou tupa louyu thainou khailou sütao hinou muloua sütaonou puletaoye kolou khailouzü, sükuyu mai haitao vei hrümai hai shurai jünou akhai nanou shikou shotare.

²¹ Mai haitaoye donou acheche ludu nasü süloua puletao hi peikhai touyu sheeyu chikha süna hinou tarei tayu jüwo, acheche ludu süna sükhai moyu sünanou veikousho laihie.

²² Puletao hi payu sünanou tsümai rachi hinou paoyu hai chechewe touyu sü pongaowe, süolouzü: “Seinou lah puhnou rüpakhai touyu sühi khaivewe,” ea “Vo hai konai hinou panou nare donou likhei dzü khüpei baie.”