1 VEMAITO 8 - SHEEYU BAIBEL (BSI)

Vo Sübvü Rathoki hi Poveyu

¹ Chuo Veo Solomon nou Israel mai khü teitei hinou süthai-apei maitao hai Jerusalem hi kuve jülou-a Mapao vei Vo Sübvü nasü David Nuhdu hinou Rathoki hi pove thoure donou kharochi peiwure.

² Puletao mai hrülai nou Sahpao Nüh nüyu teile, Ethanim tea kuyu khouh anai zhou sü vejü loure.

³ Süthai-apei maitao velou jüche loukhai-e, napao maitao nou Vo Sübvü nasü poloure,

⁴ alia Rathoki hi povere donou potare. Levi maitao ae napao maitao nou Mapao nou buyu Sahpao alia sühi buyu na khesü poa Rathoki hi thoukhaire donou poloure.

⁵ Veo Solomon alia Israel mai hrülai nou Vo Sübvü vei nghoujü hinou tave jüa buloure, alia zhaotu ae kikhaorü hai chosha louhoa posheela peie.

⁶ Süthaisü napao maitao nou Vo Sübvü sü poloua Rathoki hi polou Sheesheelaibu, shouh pfüyu khaonatao phi hi khaiwure.

⁷ Khaona sütao vei shouh nou Vo Sübvü ae potayu süüpotao hai holoure.

⁸ Potayu süüpotao vei pei hai maitaralia Sheesheelaibu hinou la-a bulouzü zhingao baie, ana buh kukhe hio zhingao moe. (Potayu süüpo sütao hai chukoute-a buhie.)

⁹ Vo Sübvü khevai hisü Moses nou Sinai Deichi vanou poveyu chu ahai baimoa nou na kukhe ali-a hae, haisü Ramai nou Israel maiye Ejipt hinou sapa louyu phaki koa vo soukhai touyu nasüe.

¹⁰ Napao maitao nou Rathoki thaokhaiwua tayu phaki, teihao nou Rathoki sü lou phoutao loure,

¹¹ ae Mapao vei ava sünou varouloure, ae napao maitao sü dakhailou vah soulou shire.

¹² Süthaisü Solomon nou haibüa veachi paoe: “Mapao, nenou teinghi sü ratei hi soukhai peie, anou newo louzü teihao ae teizhi hrohinou hrüre donou doloure.

¹³ Chuwo, Enou neye donou khupa shoyu Rathoki ali sou khaitoure, teisa neye panou hrüre buh soupeiwure.”

Solomon nou Maikhemai hi Chidoh Souyu

¹⁴ Maikhe mainou sühinou la-a bue, ae Veo Solomon nou puletao hi reiloua Ramai vei ha sü puletaoye donou khopeie.

¹⁵ Puh nou paoe, “Israel mai vei Ramai Mapao sü paosholo! Puhnou apuo David hi haibüa chaachou soukhai touyu nasü souvete peie,

¹⁶ ‘Enou avei maitaoye Ejipt hinou sapalouyu teile hinou Eye thore donou rathoki soure buh aliro Israel maivei teidei hinou dopa khaipei moe, ana avei maikhe maiye panou khopeire donou David ye doloue.’ ”

¹⁷ Solomon nou haibüa paopue, “Apuo David nou Israel maivei Ramai Mapao ye thore rathoki sü soushure donou souda poa koue,

¹⁸ ana Mapao nou puh hi paoe, ‘Nenou Eye donou rathoki souyu hai jüpayu sü kao-a baie,

¹⁹ ana neye panou soulai moe. Sünasü ne nahpoutu ye panou avei rathoki sü soulai.’

²⁰ “Alia chuo Mapao nou puhvei chipao sü vetere. Enou apuo thaosü vekou loure, ae Enou Israel maivei Ramai Mapao ye thore Rathoki sü souloure.

²¹ Enou Etao vei puopaoh maitao nou Mapao ye koa Ejipt teidei hinou tapayu phaki vo soukhai touyu chuh nasü thoukhai touyu Vo Sübvü khaire donou-a rathoki hinou buh souda peiwure.”

Solomon vei Veachi

²² Süthaisü Solomon nou maikhe mai nghoujü nou takou posheelabu nghoujü hinou bah laloua

²³ haibüa veachi paoe, “Israel maivei Ramai Mapao, neye raiyu Ramai kukhe lia rakiva hia ae deiphaova hia hae! Nenou nevei maikhe maiye koa vo soupeie ae puletao nou puletao vei tsüle teitei nou peia ne chi züyu phaki nenou nevei tobai soumoa buyu leshi nasü ngaopeiwe.

²⁴ Nenou apuo David hi chaachou soukhai touyu nasü zhou teithe souvete peie.

²⁵ Alia chuo, Israel maivei Ramai Mapao, Etao nou ne chi züa bulouzü, nenou apuo David hi puhvei tyaosholea maitaoye panou Israel maiye khasa-a hrükoute peilai tea chaachou soukhai touyu kukhetao-a panou vete louyu sü soupeio tea Enou ne hi veachi paowe.

²⁶ Chuo, Oh Israel maivei Ramai, nenou nevei kilai apuo David hi paoh khaitouyu veishi sü panou veteyu soupeio.

²⁷ “Ana Oh Ramai, ne cheche vuzünou deiphao hi hrülou süvu? Zhukhaio ratei veishi-a neye donou khamoe, südonou kabüa Enou souyu Rathoki haisü neye donou khalai?

²⁸ Mapao, avei Ramai, E sü nevei kilai baie, avei veachi sü keipeio, Enou zhou ne hinou khoyu khesü aetou peio.

²⁹ Neye thore donou nenou dopa khai touyu Rathoki hai nasü hea-khei soumoa khopeio. Enou Rathoki haina hi reiloua veachi paoyu phaki, avei pai sü keipeio.

³⁰ Avei veachi alia avei maitao nou buh haina hi reiloua veachi paoyu khesü keinou peio. Nenou buyu rakiva nou Etao nou khoyu khesü keipeio ae Etaoye khaipeio.

³¹ “Mai alinou kinapa mai ali hi soumahwure tea paodu peiyu phaki, Rathoki haina vei posheelabu hinou tave puh hai mah hae tea chaachou souyu phaki,

³² Oh Mapaowo, nenou rakiva nou keiloua nevei kilai maitao vei mah-zü khesü zhupeio. Mahyu mai nasü puhnou ngaozü thaifüa tudee peio, ae mah hayu maiye sü puhvei acheche thaifüa soungaopeio.

³³ “Nevei Israel maitao nou ne nghingao hinou mah souwua puletao nou ngaobamai nghoujü nou hraongu ngaore toulouzü, ae puletao nou ne hi dakhai veloua alia Rathoki haina hinou tave tainou souloua ne hi veachi paoyu phaki,

³⁴ puletao vei akho sü rakiva nou keipeio. Nevei maitao nou mah soukhai touyu khesü khaipeio, ae puletaoye sü nenou puletao vei puopaoh hi peikhai touyu teidei hisü sa-a dakhai vepeio.

³⁵ “Nevei maitao nou ne nghoujü nou mah souyu vanou nenou teirü sü nuchao khailouzü, ae puletao nou leda loua Rathoki hai hinou tave veachi paoyu phaki,

³⁶ raki vanou puletao paisü keipeio. Veo vei mah alia Israel maivei mah khesü khaipeio. Puletaoye panou acheche hi taloure sü doupeio. Süthaisü, Oh Mapaowo, nenou teisa panou puletao vei teidei soure donou peikhai touyu teidei hisü teirü koupeio.

³⁷ “Hakinou teidei hi tokaa velouzü moyuma rahta rahvu velouzü, moa thoudzü khesü teikhai teirü ashi moyuma khazü nou souha louzü, moyuma ngaobamai nou soureih souve louzü, moa maikhe mai hi sounou ashi veyu phaki,

³⁸ puletao nou veachi paoyu sü keinou peio. Nevei Israel mai tarali noua ledaloua levea nou Rathoki hai hinou bah lapoa veachi pao louzü,

³⁹ puletao vei veachi sü nenou buyu raki vanou keinou peio, puletao vei mah sü khaipeio, ae soukhapeio. Ne likhei deiphao maivei tsüle hai süa baie. Mai alili hisü puletao nou ngaozü thaifüa peio,

⁴⁰ sükulouzü nenou Etao puopaoh mai hi peikhai touyu teidei hisü Etao nou ne chi züa teisa nou hrüa bulai.

^41-42 “Kadoua buyu vakou maitao nou nevei zhih tayu ae nenou nevei maitao vah soupei khaitouyu khesü chouloua Rathoki hai hinou tave ratho-a veachi paolouzü,

⁴³ puletao vei veachi sü keipeio. Nenou buyu raki vanou puletao nou khoyu sü kei peio ae puletaoye soukha peio, sükulouzü deiphao mai hrülai nou neye sülou-a Israel mai büa ne chi sü züloulai. Süthaisü Enou soukhai touyu Rathoki hai nasü neye thore buh nasüe touyu hai puletao nou süloulai.

⁴⁴ “Nenou nevei maitaoye taho ngaoba maiye reih soukhaio tea kharochi peiyu phaki, ae puletao nou buh taraki buyuma nenou dopa khai touyu nuhdu ae Enou Rathoki soukhai touyu nahi reiloua veachi paolouzü,

⁴⁵ puletao vei veachi sü raki vanou keipeia panou reih sü veilouyu soupeio.

⁴⁶ “Nevei maikhe mainou ne nghoujü nou mah soulouzü — ae mah soumoyu mai aliro hazeire toulouzü — ae nevei lekha rarou hinou puletaoye panou ngaobamai nou veiloua puletaoye doushoyu teidei hi hukhamai soua nüpoho khailouzü, sübüa teidei süna hai doushoa buyuma,

⁴⁷ nevei maitao nou veachi paoyu sü keipeio. Puletao nou teidei sühinou ledalou-a ne hi veachi paolouzü, puletao nou daizhou koute mah soure ae vah ashi soure tea mah lalouzü, puletao vei veachi sü keinou peio, Oh Mapao.

⁴⁸ Teidei süna hinou puletao nou cheche-a leda loure toulouzü, ae nenou Etao vei puopaoh maitao hi peikhai touyu teidei, nenou dopa khaitouyu nuhdu, ae Enou Rathoki soukhai touyu hilova reiloua veachi paolouzü,

⁴⁹ puletao vei veachi sü nenou buyu raki vanou keinou peio alia puletaoye zhuvea peio.

⁵⁰ Puletao nou ne nghoujü nou mah souyu ae ne jüphi souyu veishi sü khaipeio, ae ngaoba maitaoye panou puletaoye zhuvea peiyu sü soupeio.

⁵¹ Puletao hai nevei mai baie, nenou puletaoye Ejipt teidei hinou, mei keitutua buyu hinou sapa peiyu maitao-e.

⁵² “Ramai Mapaowo, nevei Israel maitao ae puletao vei veo ye sü tobai soumoa zhuvea peiyu sü soupeio, ae puletao nou ne hi veachi pao-a soukha khoyu sü keipeio.

⁵³ Daiolouzü nenou puletaoye sü nevei mai soure donou dopaloure, nenou Etao vei puopaoh maitaoye Ejipt hinou sapa peiyu phaki, nenou ne kilai Moses hinou süsü puletao hi paohpeiwure.”

Solomon vei Akhai Veachi

⁵⁴ Solomon nou Mapao hi veachi pao cheyu thai, puhnou khoukhe-a bah la-a buyu posheelabu nghoujü hinou tashu laloure.

⁵⁵ Puhnou pai chishopoa buh sühinou vejüa buyu maitao donou Ramai vei shiha sü khopeie. Puhnou haibüa paoe,

⁵⁶ “Mapao ye paosholo, puhvei chipao thaifüa puhvei maitaoye kaonayu sü peie. Puhnou puhvei kilai Moses hi paokhai touyu veishi sü souche peie.

⁵⁷ Etao Ramai Mapao panou teisa Etaoye koa bupeiyu sü soupeio; puhye panou Etaoye thaokhaiwua tayu moa malaiyu sü soupeiso;

⁵⁸ Eletaoye panou puh chi züyu sü soulo, sübüa teisa nou Etao hai puh jüpa hinou hrüa bulo, ae puhnou Etao puopaoh hi peikhai touyu chikha khesü züa hrülo.

⁵⁹ Etao Ramai Mapao panou avei veachi hai nahai teisa lichoyu sü soupeio. Teisa nou puhvei zhuvea sü Israel maikhe maitao alia puhvei veo hi bupeio, teithe teithe puletao nou moshilaiyu hisü.

⁶⁰ Sükulouzü deiphao hi tyahrü hrülai nou Mapao likhei Ramai sü baie, kukhe lia hae tea süloulai.

⁶¹ Nevei tsüle veishi nou cheche-a Etao vei Ramai Mapao peilo, puhvei chikha ae kharochi teitei nou zhou teithe nenou chi züa buyu büa zülo.”

Rathoki Poa Peithouyu

⁶² Süthaisü Veo Solomon alia maikhe maitao nou Mapao hi posheela peie.

⁶³ Puhnou kikhaorü 22,000 hai posheela peie, ae zhaotu 120,000 hai chavei lathao-a buloure donou posheela peie. Sübüa veo ae puhvei maitao nou Rathoki sü Ramai bah hi thaothou peie.

⁶⁴ Süzhou teithe hinou Rathoki toutsü hi chikubuh ae Rathokipa veishi hai sousheeloua thaothou peie, süthaisü puhnou meidei-a posheelayu, thoudzü vei posheela ae chavei lathao-a hrüloure vei posheela khesü peie. Puhnou haibüa souyu hai baosahu vei posheelabu nasü posheela haitao popeire hai taileyu donoue.

⁶⁵ Rathoki hinou Solomon alia Israel mai hrülai nou Sahpao vei Nüh hai teithe anai koute hai nüh nüe. Sühisü mai alao soumoa dousho-a reilova nou buyu Hamath hi taloure Ludu ae khelova kou Ejipt maivei deirai hinou hrüyu maikhe sü velou khonüh nüe.

⁶⁶ Teithe acha zhou sü Solomon nou maikhe maitaoye sü linaonao vei ki hi seitawure. Mai hrülai nou puhye paosho peie ae sashoa nou lahkuku vei ki hi dakhai tare, daiolouzü Mapao vei hra hai puhvei kilai David hi alia Israel mai hi peie.