1 VEMAITO 7 - SHEEYU BAIBEL (BSI)

Solomon Veo vei Ki

¹ Solomon veo nou lah puhye donou ki ali souloue, ae puhnou sünasü po kiasü loua nou soue.

^2-3 Puhnou Lebanon vei Vaohro Ki teanou ali souloue, sünasü mitar 44 sah sho-e, mitar 22 due, alia mitar 13.5 hai kue. Ki süna hai lu asü soua sedar süü nou deka soukhai toue, lu ali hinou deka kiangou loue, ae sedar süü nou kizha alia kipei veishi hi thoukhai toue.

⁴ Kivo ahai khehinou vabomü lu asü soua phakhaitoue.

⁵ Kikhu bomü alia vabomü veishi hinou kai adai soua kivo holo hailo parei-a nou soukhai toue.

⁶ Puhnou Deka vei Ki aduli hai mitar 22 sah sho-a ae mitar 13.5 jha dua nou souloue. Süna hai deka noupu loua kijü haochopa khaitoue.

⁷ Vebuh buyu kide, Solomon nou chidei peiyu Chikuyu Buh hai sedar süü nou dei hinou poa kipei hi khete soukhai toue.

⁸ Solomon nou lah bure ki nasü Chikuyu Buh thailo vanou ki kukhe büa soukhai toue. Puhnou ki raibüa panou puhvei chapfü, Ejipt hi veo nahnaotupai panou bure donou soupei khaitoue.

⁹ Ki haitao alia chikubu ki aduna hai veishoyu chuh nou beikhei hinou poa kipei hi khete soukhai toue. Chuh sütao hai deikhe nou popaloua süvaa nou deibütoua vade lou-a soukhai toue.

¹⁰ Beikhei souyu chuhtao hai chuh poyu buh hinou dusho-a soukhaitoue, kamai nou mitar 3.5 sho-e ae kamai-a nou mitar 4 sho-e.

¹¹ Chuh sütao pei hinou chuh kainghou souchitou touloua khokhai toue, ae sedar nou kizha southou khaitoue.

¹² Veo vei chikubu, Rathoki lüvai chikubu alia Rathoki hi taloure kide navei kivotao hai chuh sho asü hinou sedar süü nou kizha sho ali ali tea nou soukhaitoue.

Huram nou Soure Vah

¹³ Veo Solomon nou mai ali, Tair nuhdu hinou hrüyu shara souvei shoyu Huram tea kuyu naye sü panou baosahu vei vahtao hai panou soure donou seiho kupove-e.

¹⁴ Puh puo hai hrüh shomo-a thaire, puh-a Tair nuhdu hinou huvah souveiyu mai ali-e. Puh pfü hai Naphtali touyu khü hi maipfüe. Huram hai huvah souyu hinou kaishoyu alia süvei shoyu mailie. Veo Solomon nou puhye panou baosahu vei vah souyu hi zhupeio tea kuyu sü ae-ao tea vepeie.

Baosahu vei Deka Ahai

¹⁵ Huram nou baosahu nou deka ahai kuloue, süna ahai hai kuyu nou mitar 8 ae haorüyu nou mitar 5.3. Sühai sü Rathoki vei bomü hi shukhaitoue.

¹⁶ Süthai-a puhnou baosahu nou deka sühai pei hi khaire donou mitar 2.2 ku-a soukhai toue.

¹⁷ Deka ahai kheinou pei hisü hurai nou zhai veisho-a southou khaitoue,

¹⁸ alia vajüshithou zhai hinou hao ahai southou khaitoue.

¹⁹ Deka pei vasü lily poupa zhai büa mitar 1.8 sah sho-a nou southou khaitoue,

²⁰ ae sünasü hao-a nou hurai zhai soua soukhai touyu pei hi pokhai toue. Hao ahai sou-a khaiyu hisü vajüshithoutao kaih ahai daothou khaitoue.

²¹ Huram nou baosahu vei deka ahai sü Rathoki hi taloure vei bomü hi soukhai peie: deka ali hai Jakhin (puhnou soushupeie) tea rüloua nou khelova khaipeie, alia deka ali hai Boaz (puhvei khouko) tea rüthouloua reilova khaipeie.

²² Lily poupa zhairai hinou soukhai touyu nasü deka peitaoh hi khaipeie. Sübüa deka ahai sü souche loue.

Baosahu vei Dzükhao

²³ Huram nou baosahu nou dzükhao ali hai mitar 2.2 thou-a, mitar 4.4 müka-a alia mitar 13.2 hao-a nou souloue.

²⁴ Dzükhao vei khupe teitei hisü baosahu nou lu ahai hai hrao zhai hinou souloua khupe hi jühao khaitoue.

²⁵ Dzükhao nasü baosahu nou soukhai touyu chode kiahai phao hi khaikhai toue, chode asü nou reilova reiwe, asü nou teinghi loulova, asü nou khelova, ae chode asü nou teinghi palova reiwe; chode sütao veishi nou teikou hai lüvai bukhai-e.

²⁶ Dzükhao vei tha shouyu hai milimitar 75 shouwe. Puhvei khupe hai chapai zhai büa soukhai toue alia lily poupa pahpayu zhai büa daothou khaitoue. Dzükhao hai sühchovou 40,000 loulousü hinou soukhai toue.

Baosahu vei Choluki

²⁷ Huram nou baosahu nou choluki kirou souloue; süsü ali nou mitar 1.8 sho-e, mitar 1.8 due, alia mitar 1.3 ku-e.

²⁸ Sütao hai sah-jha-a deitou-a soukhai toue,

²⁹ ae süü kakouyutao hisü khaosouveo, chode alia shouh pfüyu khaona zhurai nou daothou khaitoue; süütao vahi khaosouveo ae chode zhurai daothou khaitouyu reilo ae khelova paraizho nou southou khaitoue.

³⁰ Cholukitao hai baosahu nou lukiphi adai ae lukiphi kayu sü southoukhai tou-e. Kainghou adai hisü baosahu nou tsülayu sü souloua raikhao adai khaikhai toue, ae sünasü poupa daothou khaitoue.

³¹ Raikhaotao pei hisü haorüa nou southou khaitoue. Haina hai choluki pei hinou sentimitar 45 kua nou soupa khaitoue, ae sentimitar 18 thou-e. Khupe hai soukhithou khaitoue.

³² Lukiphitao hai sentimitar 66 kuwe; sütao hai kakouyu süü khe hinou bue, ae lukiphi hi thaithouyu süü hai choluki koa nou soupa khaitoue.

³³ Lukiphitao hai rheiluki phi zhai rai-e; lukiphi hi souhao khaitouyutao hai baosahu nou soukhai toue.

³⁴ Choluki vei kainghou adai khevai hinou tsüla khaitoue, sütao hai choluki hi southou pakhai toue.

³⁵ Choluki ali vei peitao hinou sentimitar 22 phali hai souhao vekhai toue; sütao hai choluki soukhoure donou koa ali soua southou pakhai toue.

³⁶ Choluki vei khupe dakha veyu hisü shouh pfüyu khaona, souveo alia habe zhurai hinou zhainga veisho-a daothou khaitoue.

³⁷ Haibüa cholukitao sü soukhai toue, sütao hai zhai raibüa soukhaitoue.

³⁸ Huram nou raikhao kirou hai-a soupeie, sütao hai choluki chekhei donou soupeie. Raikhao ali nou mitar 1.8 haowe, ae sühchovou 800 phali hai loulousü hinou soukhai toue.

³⁹ Puhnou choluki angou hai Rathoki vei khelova khaitoue, kukhe angou sü reilova khaitoue; dzükhao nasü puhnou khelova teinghi palo khaipeie.

Rathoki hi Khaitouyu Natao

^40-45 Huram nou lee, hakuyu khaocha, ae khaosou khesü soupeie. Puhnou Veo Solomon ae Mapao vei Rathoki donou soure vahtao sü souche peie. Puhnou haitao hai soupeie: Deka ahai Deka ahai pei hi khaosao zhai büa southou khaipeie Deka pei hi hurai zhai büa southou peie Deka pei hi baosahu nou vajüshithou zhairai-a 400 southou peie, lu ahai hisü kaih kaih loua nou soupeie Choluki kirou Raikhao kirou Dzükhao Dzükhao khaire donou chode kiahai Lee, hakuyu khaocha, ae khaosao. Rathoki donou na haitao hai Huram nou Veo Solomon donou baosahu veitya nou soupeie.

⁴⁶ Veo nou haitao hai Jordan Deikho, Sukkoth ae Zarethan kohinou pa souloue.

⁴⁷ Solomon nou poyu sana ae hutao hai dou-a doukhai more daiolouzü na pouleyu vanou choshalou hore.

⁴⁸ Solomon nou na haitao hai Rathoki donou tea sana nou souloue: posheelabu, Ramai hi posheela peiyu raokhao khaibu,

⁴⁹ Sheesheelai Buh nghoujü hi meivabvü khaibu kirou, khelova nou angou ae reilova nou angou; poupa, meivabvü, meibea;

⁵⁰ pai, poukai ngiyubvü, khaosao, poukai nüvei thouyu khao, ae meithou thouyu bvü; alia Sheesheelai Buh hi taloure vei kikhu sü sana nou southou khaitoue.

⁵¹ Sübüa Veo Solomon nou Rathoki souche louyu phaki, puh puo David nou Mapao hi peithouyu shahu, sana, ae na kukhetao hai Rathoki vei na khaiyu kide hi pothou khaipeie.