1 VEMAITO 6 - SHEEYU BAIBEL (BSI)

Solomon nou Rathoki Souyu

¹ Israel mainou Ejipt thouwua tapa louyu po kaihdai-a raicha, Solomon nou Israel mai hi vekou louyu po adai, Ziv tiyu khouh ahai zhou Solomon nou Rathoki sü soushu ta-e.

² Rathoki khevai sü mitar 27 sho-e, mitar 9 due, ae mitar 13.5 kuwe.

³ Taloure kide nahai mitar 4.5 thou-e, alia mitar 9 ka-e, süsü rathoki kayu deitoue.

⁴ Rathoki vei kivo hai vakou jünou khevai-a dupu hie.

⁵ Vakou vei kivotao, Rathoki vei thailo hisü kide taitai tounou sousühao khaitoue. Rathoki sü sho ali hinou mitar 2.2 ku-a soukhai touyu sho asü bue.

⁶ Sho asü hinou nakayu kide nanou mitar 2.2 kawe, kisho toutsü nanou mitar 2.7 kawe, alia peidukha ki sho nanou mitar 3.1 kawe. Rathoki vei kivo hai kisho alili vei deiphi sü khevai vei kivo jünou poupua soukhaitoue, sübüa kishotao sü kizha thoumoa souchopa khaitoue.

⁷ Poa Rathoki soulaiyu chuhtao hai chuh hepaloua poyu buh hinou kainghou veishi nou soudache khaitoure, südonou Rathoki souyu phaki, hubao moa marei moa hu basei kho liro sümoa souloua baie.

⁸ Kisho akhaina hi talouyu bo hai Rathoki vei khelova nou soukhai toue, ae sühinou phiheadou doupoa nou kisho ahaina ae asü nahi taopawe.

⁹ Sübüa Solomon nou Rathoki sü soucheloue. Puhnou sedar süünou kihikha, kipeikha (ceiling) ae kizha khesü soue.

¹⁰ Kisho asütao hai, kisho ali hinou mitar 2.2 kua nou soukhaitoue, ae süsü Rathoki vei vakou kivo koa nou soukhaitoue, ae kizha hai sedar süünou soupa khaitoue.

¹¹ Mapao nou Solomon veo hi paoe,

¹² “Nenou avei chikha alia kharochi khesü züa bulouzü, Enou ne puo David hi peilai tea chaachou soukhai touyu khesü ne hi peilai.

¹³ Nenou soushu khaitouyu Rathoki hai hinou Enou avei Israel maitaoye koa hrüzho peilai, ae Enou puletaoye sü thaokhai toupeilai moe.”

¹⁴ Sübüa Solomon nou Rathoki sü soucheloue.

Rathoki Khevai Southou Khaitouyu Naveitao

¹⁵ Rathoki vei kivo lüvai hai phi hinou poa tei hi khete hai sedar lukhao nou dakha khaitoue, ae dei sü haosüü nou khu khaitoue.

¹⁶ Rathoki lüvai, Sheesheelai Buh nahai Rathoki thailo vanou soukhai toue. Haina hai mitar 9 sah sho-e, ae sedar süü nou khade pa khaitoue.

¹⁷ Sheesheelai Buh vei nghoujü kide nahai mitar 18 sho-a nou soukhai toue.

¹⁸ Rathoki lüvai teitei hai sedar süü nou zhai-nga veisho-a southou khaitoue; sübüa chuh nou soukhai touyu kivo sü halia zhingao moe.

¹⁹ Rathoki khevai nou Mapao vei Vo Sübvü nasü khaire donou kide ali soukhai toue.

²⁰ Kide haina hai mitar 9 sho-e ae mitar 9 due, alia mitar 9 kua nou soukhaitoue, sütao veishi hai veikayu sana nou meaho khaitoue. Posheelabu hai-a sedar süü nou soupei khaitoue.

²¹ Rathoki lüvai hai sana nou souho khaitoue, ae kikha taloure ludu hisü sana nou hurai souloua rakhaitoue, alia sana nou meakha khaitoue.

²² Rathoki vei kikha veishi alia Sheesheelai Buh ae posheelabu teitei sü sana nou souho khaitoue.

²³ Oliv süü nou shouh ahai pfüyu cherubim khaona zhurai hinou souloua Sheesheelai Buh hisü khaikhaitoue, süna hai ali nou mitar 4.4 sah sho-e.

^24-26 Khaona süna ahai sü zhai-a raibüe ae deitou toubaie. Shouh ahaikhei pfüwe, ae shouh hai mitar 2.2 sho-e, sübüa shouh ahai topayu hai mitar 4.4 sho-e.

²⁷ Süna haisü Sheesheelai Buh hi khaipei khaitoue, sübüa shouh ahai sü topa kide toutsü hinou daiwe, alia shouhpha alilo vatha hai kivo vahi daikhiwe.

²⁸ Shouh pfüyu khaona ahai sü sana nou nahopei khaitoue.

²⁹ Rathoki vei kide veishi hisü shouh pfüyu khaona zhurai, habe alia poupa daothoua zhainga veisho-a southou khaitoue.

³⁰ Alia deiphi teitei hia sana nou meahopei khaitoue.

³¹ Sheesheelai Buh hi taloure bomü hisü oliv süü nou kikhu ahai soukhaitoue; kikhu pei hai tsüphi tea nou soukhaitoue.

³² Kikhuva hisü zhai ngaovei sho-a shouh pfüyu cherubim zhurai, habe, alia poupa nou daothou khaitoue. Daothou khaitouyu khaona zhuraitao, habe, ae poupa, alia kikhu hisü muteiyu sana nou meaho khaitoue.

³³ Kide matsü nahi taloure kikhu bomü süütao hai oliv süü nou soukhaitoue.

³⁴ Sühisü raikhilou veiyu kikhu ahai sü haosüü nou soukhai tou-e,

³⁵ alia kikhu sühi-a zhai ngaoveiyu cherubim khaona zhurai, habe, alia poupa nou daothou khaitoue, sütaosü sana nou meaho khaitoue.

³⁶ Kihikha vei maisou vejüyu buh nahai Rathoki nghoujü nou soukhaitoue, sünasü kivo koa nou chuh sho asü hisü sedar süü nou soukhai toue.

³⁷ Rathoki beidei tayu hai khouh ahai, Ziv tiyu khouh, Solomon nou vekou louyu po adai hinou soushu tae.

³⁸ Khouh acha, Bul tea kuyu khouh, Solomon nou vekou louyu po kiali kousü, Rathoki hai tsüchoda khaitouyu thaifüa souche loure. Solomon nou po anai lou-a nou Rathoki sü soue.