1 VEMAITO 4 - SHEEYU BAIBEL (BSI)

Solomon vei Peikhomaitao

¹ Solomon nou Israel mai veishi hi veo soure,

² ae mai haitao nou puhvei peikho maitaoe; Zadok nahpoutu Azariah nou napao soue.

³ Shisha vei nahpoutu Ahijah alia Elihoreph nou chikubu hi rü-apeio sü soupeie Ahihed vei nahpoutu Jehoshaphat nou rü-apeio soue.

⁴ Jehoiada nahpoutu Benaiah nou Reihmai Peikhowo sü soue. Zadok alia Abiathar nou napao soue.

⁵ Nathan nahpoutu Azariah nou teidei peicha maitao peikhowo sü soue, Nathan nahpoutu Zabud napao nou veo vei paodou-apeio soue.

⁶ Ahishar nou veo vei kilai maitao hi peikhowo sü soue, alia Abda nahpoutu Adoniram nou taitsü poa vah souyu hi peikhowo sü soue.

⁷ Solomon nou Israel maitao hinou teidei kho-apeio mai kiahai dopaloue. Puletao nou veo alia puhvei kikhamaiye panou toure vei touso pove lapeie. Mai alinou khouh alili vei pove peie.

⁸ Mai sütao zhih alia puletao nou khore teidei haitaoe: Benhur: Ephraim maivei nuh teideitao

⁹ Bendekar: Makaz, Shaalbim, Beth Shemesh, Elon, alia Beth Hanan nuhdutao

¹⁰ Benhesed: Arubboth ae Sokoh vei nuhdutao alia Hepher vei teidei veishi

¹¹ Benabinadab, puh hai Solomon vei nahnaotu Taphath ye naloue: Dor vei teidei teitei

¹² Ahilud nahpoutu Baana: puhnou Taanak, Megiddo alia Bethshan vei teidei teitei, Zarethan nuhdu nghiyu, Jezreel nuhdu vei khelo, Abel Meholah ae Jokmeam nuhdu koute

¹³ Benzeber: Gilead teidei hi buyu Ramoth nuhdu, Jair vei khü, Manasseh vei tyaosholea maitao vei nuh teitei, ae Basham vei Arzob deizetao, nuhdu rairou, hu nou rokhubomü soukhai touyu ae chuh nou kivo khokhai touyutao

¹⁴ Iddo nahpoutu Ahinadab: puhnou Mahanaim vei deizetao

¹⁵ Ahimaaz, puhnou Basemath ye naloue, hai-a Solomon vei nahnaotu ali-e: puhnou Naphtali teidei khoe

¹⁶ Hushai nahpoutu Baana: puhnou Asher deize hilo ae Bealoth vei nuhdu khoe

¹⁷ Jehoshaphat, Paraoh nahpoutu: puhnou Issakar teidei khoe

¹⁸ Shimei, Ela nahpoutu: puhnou Benjamin vei teidei khoe

¹⁹ Geber, Uri nahpoutu: puhnou Gilead teidei, Amor mai hi veo Sihon alia Og, Bashan teidei hi veo nou khasa-a buyu teideitao hai khowe. Mai haitao kiahai pei hinou teidei khowo mai ali hai khaikhai toue.

Solomon nou Veo Souyu phaki Vasayu

²⁰ Judah alia Israel maitao hai chosha louhoa buyu zaipe hi vünai zhoua bue; puletao nou touso-a vasho-a nou bue.

²¹ Solomon vei vedei Euphratis Rei hinou poa Philistia hi koute alia Ejipt maivei deirai hi koute buyu tyahrü teitei nou loue. Puletao nou puh hi kikha peie ae puhvei hümamai teitei hinou puhvei khakhe hinou hrüe.

²² Solomon nou teithe ali hinou touso ngaoyu hai southou litar thengou, thoubu litar the kirou,

²³ hübo veiyu chode kirou, kikhaorü nou kai, alia zhaotu kaihli, süpei hinou kho-shu, ae hou sü louwe.

²⁴ Solomon vei vedei hai Euphratis rei teinghei loulo Tiphsah hinou teinghei loulo Gaza hi koute-e. Euphratis vei teinghei loulo buyu veo maitao hrülai puhvei khakhe hinou bue, alia kinapa soua buyu tyadei veishi hisü kaona-a hrüa bue.

²⁵ Puhnou hria buki sasü Judah alia Israel maitao nou veahoyu daomoa kaozhou vei-a hrüe, lahkuku vei kihikha mai hai kipei bua darkhashi ae doushibe hai bue.

²⁶ Solomon vei rheiluki pfüre donou rhei hai theraidai bue alia reihmai nou pfüre rhei thekiahai bue.

²⁷ Solomon vei teidei khomai kiahai taonou khouh alili hai puletaoye panou Veo Solomon alia puhvei ki hinou buyu maitaoye panou toure donou koyu touso khesü pfüve peiwe

²⁸ Teidei khomaitao nou puletao vei zha hai süthou alia rhei panou toure rouvo koutea pfüla peiwe.

²⁹ Ramai nou Solomon hi ratsü ae dokai, alia tsüsü hai chosha louhosou peikhai toue.

³⁰ Solomon nou tsüveiyu hai Ejipt maivei teinghei palo ae teinghei loulo tsüveiyu maitao jünou veipu hie.

³¹ Puhnou Ethan, Ezrahit, ae Heman, Kalkol, alia Darda, Mahol nahpoutu maitao jünou tsüdo veipu hie, alia pehao hi buyu tyahrü hrülai hisü puhvei zhih hai tare.

³² Puhnou tsüchi thehsü alia lou thehli jünou la-a dapa peie.

³³ Puhnou süübe, proube, Lebanon hi buyu sedar süübe hinou kivo hinou paopayu proube vanou paopeie; puhnou hrikhaona, raohou, nghou ae kha donou paopeie.

³⁴ Deiphao hi vemai hrülai nou puhvei tsüveiyu hai süloua maikhe mainou puhye sapeina alao seive peie.