1 VEMAITO 3 - SHEEYU BAIBEL (BSI)

Solomon nou Ratsü Khoyu

¹ Solomon nou Ejipt hi veoye chavei loure donou puh nah naotupaiye naloure. Puhnou honapaiye panou bure puhvei ki, Rathoki, ae Jerusalem kivo souche loumo koute hai panou David vei Nuhdu hinou bure donou save khailoure.

² Mapao nou bure rathoki sü souchelou mohie, südonou maikhe mainou posheela khesü buh tyatali hinou posheela peia nou bue.

³ Solomon nou Mapao ye leshi-e alia puh puo David nou paodou peiyu khesü chi züe, ana puh-a kikhaorü khesü dathaloua posheelabu alao hinou posheela peia nou bubaie.

⁴ Vuli Solomon nou Gibeon hi posheela soure donou tare, daiolouzü sühisü zhih takayu posheelabu nasü bue. Raichokia puhnou buh sühinou meidei-a posheela souyu hai alao soumoa soure.

⁵ Süzhou khei Ramai nou puh mekou hinou taveloua puh hi noue, “Enou neye donou dai peiyu ne jüpawe?”

⁶ Solomon nou chila peie, “Nevei dushoyu zhuvea leshi hai ne kilai apuo David hi ngaopeie, ae puh-a chilee chechea hrüe ae tsüle sheesha tea neye koa hrüe. Chu-a nevei dushoyu lesha nasü puh hi peipua puhye nahpoutu peia zhou teithe panou puh thaosou pa vebuh buloue.

⁷ Oh Ramai Mapaowo, E nahle sho-a buyuma alia kabüa vedei sü khasa-a hrülai touyu sümoyuma nenou Eye apuo thaosoua panou vekou loue.

⁸ Nenou dopa khaitouyu nevei maitao, chosha louhoa buyu maitao hrohinou nevei kilai Enou bue.

⁹ Südonou aveih ashi sükuloure ae kaozü hinou nevei maitaoye khasa-a hrülou süyu vei ratsü sü nekilai ahi peio. Sükumo louzü nevei mai haizhou buyu sü Enou kabüa khasa-a hrülou khailaige?”

¹⁰ Sübüa Solomon nou khoyu sü Mapao nou süloua lesa shore,

¹¹ ae puhnou Solomon hi paoe, “Nenou hrüh shoyu moa hangiyu moa ngaoba zhuba maitaoye panou thaire khoyu thaosü, haibüa maikhe maiye kaozü hinou khasa-a hrüloure vei ratsü kholouyu vanou,

¹² nenou khoyu nasü Enou ne hi peilai. Raichoki hrüa buyu maitao alia haithai naki hrüve laiyu maitao jünou la-a Enou neye sü ratsü ae tsüdo aveih hai peilai.

¹³ Alia nenou khomoyu na-a Enou ne hi peilai: nevei hümai teitei hinou vemai kukhe jünou pua kinangi alia tsükhouyu sü ne hi peilai.

¹⁴ Süpei hinou nenou ne puo David zhai büa avei chikhatao ae kharochi züa talouzü, neye sü hrüh shoyu hai-a peipulai.”

¹⁵ Alia Solomon nou kaishuyu phaki, Ramai nou puhye zhiho mekou nou keawe touyu hai süloue. Süthaisü puhnou Jerusalem hi veloua Mapao vei Vo Sübvü nghoujü hinou meidei-a posheelayu ae chavei lathao-a buloure vei posheela hai posheela peie. Süthaisü puhnou puhvei peikhoyu maitaoye panou khonüh nüe.

Solomon nou Tahtei Shoyu Chilou Kupeiyu

¹⁶ Teitheli khakhapfü mai ahai nou Veo Solomon nghoujü hi tave laloure.

¹⁷ Naotupai alinou paoe, “Oh apaopuo, asapai ahai sü ki ali hinou hrüzho-a nou bue; alia Enou puhye koa bukinou nahpoutu ali naloue.

¹⁸ Alia teithe asü thaisü puh-a nahpoutu ali naloure. Sübüa ahai likhei ki sühisü bua baie, mai kukhe mai ali-a hae.

¹⁹ Süthaisü khei teitheli puhnou puhvei nahtou sü khupeia puh nahtou sü thaire.

²⁰ Puhnou kheitoutsü phahinou kaishuloua thaiyu nahtou nasü ahi pokou khaipei-a hriyu avei nahtou nanou poa tare.

²¹ Alia shona kaishu Enou puhye nao peilai touyu phaki, nahtou sü thai-a ngaoloua baire. Enou nahtouye soutaosoua zhuyu phaki, nahtou nasü anah more.”

²² Alia naotupai ali nanou paoe, “Moe, hria buyu nahtou nasü avei nah baie, thaiyu nahai puhvei nah-e.” Sübüa puhai nou veo nghoujü hinou shaova-a nou bue.

²³ Süthaisü Veo Solomon nou paoe, “Ne hai mai ahai kheinou hria buyu nahtou sü lahvei-e tea khawe, ae thaiyu nahtou hai mai ali navei-e tea paore.”

²⁴ Veo nou seiho khoche sü panou potare, ae khoche poveyu phaki,

²⁵ Veo nou haibüa paoe, “Hria buyu nahtou nasü ahai soua daode zhipeio.”

²⁶ Pfü acheche nanou nahtouye leshi leyu donou veo hisü haibüa paoe, “Puo Veowo, zhuvea nou nahtou nasü southa peiso, nahtou sü honapai hi peio.” Ana naotupai kukhe nanou haibüa paoe, “Nahtou nasü ahai mai ali hia peiso; ahai soua daode zhipeio.”

²⁷ Süthaisü veo nou paoe, “Nahtou sü southaso! Nahtou nasü pfütsü pai hi peio— honapai nou pfü acheche nasüe.”

²⁸ Israel maitao nou Solomon vei chidei sünasü choulouyu phaki, puletao nou puhye sü tsükhou shore, daiolouzü Ramai nou puh hi kaozü hinou soupfü loure vei ratsü hai peiwe touyu sü süloure.