1 VEMAITO 22 - SHEEYU BAIBEL (BSI)

Rachipaolawo Mikaiah nou Ahab ye Paopi Peiyu

¹ Po asü koute hai Sairia ae Israel mai hai reih soumoa kaona-a nou bue,

² ana po asü kousü Judah hi Veo Jehoshaphat nou Israel hi Veo Ahab ye daore donou tare.

³ Ahab nou puh khe hinou buyu peikho maitao hi noue, “Ramoth Gilead hai Etao vei teidei baie touyu netao sühomoe? Ae Etao nou Sairia hi veo vei bah hinou podakhai loure donou halia soumoa bubailaiwu?”

⁴ Ahab nou Jehoshaphat hi noue, “Ne Eye koa Ramoth Gilead hi soureih soulai moge?” Jehoshaphat nou Ahab hi chila peie, “Esü neye büa bubaie, avei maitao sü nevei baie, ae avei rhei khesü nevei rhei büa bubaie.

⁵ Ana Mapao hinou rai-a noulou laishe.”

⁶ Südonou Veo Ahab nou rachipaolayu mai kaihdai phali hai kuloua puletao hi noue, “Enou Ramoth Gilead hi reih souyu veiho shi-e?” Puletao nou chila peie, “Taho reih soua vei-e, Mapao nou neye veilouyu sü peilai.”

⁷ Ana Jehoshaphat nou noue, “Hai hi Mapao vei rachipaolayu mai kukhe hi noupu loure hadou?”

⁸ Ahab nou haibüa chila peie, “Mapao vei leli nasü noupu loure mai ali bupu hie. Puh sü Imlah nahpoutu Mikaiah toue. Ana Enou puhye ngaora-e; daiolouzü puhnou avanou haliro vei-a paopei moe, ana ashi khaikho nou paopei-a baiwe.” Jehoshaphat nou paoe, “Veo, ne sübüa paoyu kaomoe.”

⁹ Süthaisü Ahab nou puhvei peikhomai aliye thasho-a nou Mikaiah ye kupoa nou ve-o tea kharochi peie.

¹⁰ Israel hi veo ae Judah hi veo Jehoshaphat sü Samaria hi taloure rokhubomü, thou dayu thaibu hisünou vemai vei na tupfüa vebuh hinou bue, ae rachipaolayu maitao nou puhai nghoujü hinou rachipaola-a nou bue.

¹¹ Puletao hrohinou mai ali, Kenaanah nahpoutu Zedekiah nou hu nou soukai souloua paoe, “Mapao nou haibüa paoe, ‘Nenou Sairia maiye souhakhai touloumo koute, hai nanou poa puletaoye souha loulai.’”

¹² Rachipaolayu mai kukhe hrülai-a sübütou tea paopeie. “Ramoth Gilead hi talou reih soua veilo; Mapao nou neye veilouyu sü peilai.”

¹³ Süphaki Mikaiah ye kutayu nanou puh hi paoe, “Rachipaolayu mai hrülai sü veo nou veiloulai tea paokhai toure, südonou ne-a sübüa paoyu-a vei bailai.”

¹⁴ Ana Mikaiah nou chila peie, “Mapao hai hriyu thaifüa Mapao nou ahi paoyu nasü E pao-a bailai.”

¹⁵ Puh nou Veo Ahab nghoujü hi veyu phaki, veo nou puh hi noue, “Mikaiah, Veo Jehoshaphat ahai koa nou Ramoth Gilead hi reih hulou laiho, bailaige?” Mikaiah nou chila peie, “Reih hulou khaio, Mapao nou neye veilouyu sü peilai.”

¹⁶ Ana Ahab nou puh hi paoe, “Nenou ahi Mapao zhih hinou paoyu phaki, cheche hinou paopeio. Enou ne hi vu kazhou sübüa paolai?”

¹⁷ Mikaiah nou paoe, “Enou Israel maivei reihmaitao hai zhaotu nou zhaokhowo hayu büa deichi vanou poraroua tayu sü zhingao-e, ae Mapao nou paoe, ‘Mai haitao sü süthai-apei hare; puletaoye panou kaonaphi tea nou ki hi dakhai tawo.’ ”

¹⁸ Ahab nou Jehoshaphat hi paoe, “Puhnou ahi haveih ali-a paolai moe tea Enou ne hi paomovu? Puhnou teisa sü shi-a pao baiwe.”

¹⁹ Mikaiah nou haibüa paopue, “Mapao nou paoyu chi sü keilo! Rakiva nou Mapao sü puhvei vebuh hi bue, ae rakivamaitao nou puhye sühao poa buyu sü Enou ngao-e.

²⁰ Ae Mapao nou paoe, ‘Thaonou Ahab ye lalupoa saho Ramoth Gilead hinou southa peilaige?’ Rakivamai ali nou ali pao, ae kukhe nanou tyakua nou pao-a nou bue,

²¹ süthaisü rakivamai ali nou Mapao nghoujü takou laloua haibüa paoe, ‘Enou puhye lalu peilai.’

²² ‘Kabüa nou soulai?’ tea Mapao nou puh hi noue. Rakivamai nanou haibüa chila peie, ‘Enou taho Ahab vei rachipaolayu mai hrülai hisü dayu rako thoupeilai.’ Mapao nou puh hi paoe, ‘Ne taho sübüa soupeio, ae nenou veiloulai.’ ”

²³ Ae Mikaiah nou haibüa akhai chi paoe, “Mapao nou nevei rachipaolayu mai hrülai hisü dayu rako peiwure; ana Mapao nou neye sü panou hakare donou soudawure.”

²⁴ Süthaisü Kenaanah nahpoutu Zedekiah nou takou Mikaiah ye sü baitu hi phapeiwua puh hi paoe, “Daisouyu teile hinou Mapao vei rako sü Eye thaokhaiwua neye keage?”

²⁵ Mikaiah nou chila peie, “Nenou kikha lüvai talou kide ali hinou tuchüa bulouzü süloulai.”

²⁶ Veo Ahab nou puhvei peikhomai ali hi haibüa kharochi peie, “Mikaiah ye nülo, ae puh ye nuhdu vei peikhowo Amon, ae veo nahpoutu Joash hi save peio,

²⁷ ae Veo nou haibüa paowe tea paopeio, ‘Mai hainaye hukhaki hi thoukhaio, ae Enou kaozhou vei-a dakhai vemo koute puhye raokhao ae dzü peia nou bulo.’ ”

²⁸ Mikaiah nou paoe, “Nenou kaozhou vei-a dakhai velouyu thaio, Mapao nou Eye chaku peimoe touyu sülo.” Ae puhnou paopue, “Enou paoyu sü mai hrülai nou süpeio!”

Ahab Thaiyu

²⁹ Süthaisü Israel hi Veo Ahab ae Judah hi Veo Jehoshaphat nou Ramoth Gilead nuhdu hisü soureih soure donou tare.

³⁰ Ahab nou Jehoshaphat hi paoe, “Ahai nou soureih soutayu hisü, maiye panou Eye zhu shilou hore zhai souloulai, ana ne louzü vemai na tupfülo.” Südonou Isarel hi veo nou puhye panou zhu shilou hore zhai souloua reihbu hisü tare.

³¹ Sairia hi veo nou puhvei rheiluki pfüyu peikhomai shiahai hisü Israel hi veo ye likhei dua baio, mai kukheye reih souso tea kharochi peie.

³² Südonou peikho maitao nou Veo Jehoshaphat ye ngaolouyu phaki, puletao nou haisü Israel maivei veo phare tea puhye dure donou thaihu koure. Ana Jehoshaphat nou shusoua rapayu phaki,

³³ Sairia hi peikho maitao nou puh sü Israel maivei veo more touyu süloua reih hukoupu moa dakhai tare.

³⁴ Ana Sairia vei reihmai ali nou puhvei voulouthou sü tarasoua kapayu hinou Israel hi Veo Ahab vei rü ae khaohoyu kohinou kapeiwure. Südonou puhnou puhvei rheiluki pfüyu na hisü paoe, “Reihbu hinou Eye vakou sapa peia baio, daiolouzü Eye zhipeiwure.”

³⁵ Veo Ahab nou heamajü sü puhvei rheiluki hinou Sairia mai hilova zhipoa koukhe koute sü bue. Puhvei zhimü hinou zhe kükou puhvei rheiluki phi veishi sü nawure, ae koukhe kou puh sü thaire.

³⁶ Ae teinghi loutayu phaki Israel maivei peikho maitao nou haibüa kharochi peire, “Mai hrülai nou linaonao vei ki hisü dakhai tawo!”

³⁷ Sübüa veo sü thaire, ae Samaria hi pove puhye sü daovu peie.

³⁸ Puhvei rheiluki sü Samaria hi dzübvü hinou pove dzükhü sheepeie, ae Mapao nou paokhai touyu thaifüa puh zhe sü sei nou laitoue, ae khakhapfü maitao nou dzü khüe.

³⁹ Veo Ahab nou soupfüyu vah teitei, puhnou puhvei ki hi paongi nou poa zhainga southouyu ae puhnou nuhdu soushu khaitouyu veishi hai Israel hi Vemaitao vei Hrüko Larübvü hi rüthou peikhai toue.

⁴⁰ Ahab nou thaiyu thai, puh nahpoutu Ahaziah nou puh thaosou pa vekou loue.

Judah hi Veo Jehoshaphat

⁴¹ Israel hi Veo Ahab nou ve louyu po adai kousü Asa nahpoutu Jehoshaphat nou Judah hi vekou loue.

⁴² Jehoshaphat nou po shiangou payu phaki, puhnou Jerusalem hinou po kaingou sü veo soue. Puh pfü zhih sü Shilhi nahnaotupai Azubah tie.

⁴³ Puhnou puh puo Asa bütou tea hrüe ae puhnou Mapao nghingao hinou kaozü nasü soupfü peie; ana teidei hi cheche moyu rathobuh khesü souhalou more, ae maikhe mai hai buh sütao hinou ratho-a posheela khesü meidei peia nou bubaie.

⁴⁴ Jehoshaphat nou Israel hi veo ye koa chavei lathao-a nou hrüe.

⁴⁵ Jehoshaphat nou soupfüyu vah veishi, puhvei khuveih ae puhnou soureih soutayu teitei sü Judah hi Vemaitao vei Hrüko Larübvü hi rüthou peikhai toue.

⁴⁶ Puhnou puh puo Asa vei teile hi cheche moyu rathobuhtao hinou buyu khakhamai ae khakhapfütao hai souha peie.

⁴⁷ Edom maivei teidei hisü veo hai ha-e, ana Judah hi veo nou teidei khowo sü dothou peiwe.

⁴⁸ Veo Jehoshaphat nou zaidu hi tare dzüluki sü souloua Ophir hinou sana panou pfüre donou seita-e; ana Eziongeber hinou pepoloua tapu more.

⁴⁹ Süthaisü Ahab nahpoutu Ahaziah nou puhvei maitaoye panou Jehoshaphat vei maitaoye koa sata peire donou paoe, ana Jehoshaphat nou ba-a baire.

⁵⁰ Jehoshaphat sü thaire, ae puhye vemai vei khüh, David Nuhdu hinou daovu peie, ae puh nahpoutu Jehoram nou puh thaosou pa vekou loue.

Israel hi Veo Ahaziah

⁵¹ Judah hi veo Jehoshaphat nou vekou louyu po anai kousü Ahab nahpoutu Ahaziah nou Samaria hinou Israel maivei veo souloue, ae puhnou Samaria hinou po ahai sü veo soue.

⁵² Puhnou puh puo Ahab, puh pfü Jezebel, ae Nebat nahpoutu Jeroboam nou Israel maiye süthaisa-a mahmo souyu büa Mapao vei nghingao hinou mah sü soutare.

⁵³ Puhnou Baal rah ye thotare, ae puh puo nou soupfüyu büa Israel maivei Ramai Mapao vei lekha sü soupa peie.