1 VEMAITO 20 - SHEEYU BAIBEL (BSI)

Sairia Maiye Soureih Souyu

¹ Sairia hi Veo Benhadad nou puhvei reihmai me veishi sü save jüloure, vemai shiahai alia puletao vei rheitao ae rheiluki noupu puhye soukhawe, ae puhnou Samaria hi soureih soure donou huloure ae haoloure.

² Ae puhnou Israel hi Veo Ahab vei nuhdu hisü kopomaiye panou haibüa ve paore, “Benhadad nou paowe,

³ süolouzü nevei shahu ae sana; nevei hüveiyu naotu maitao ae pfüphao veiyu nahmaitao sü aveie.”

⁴ Israel hi Veo Ahab nou haibüa chila peie, “Avei paopuwo, Veo Benhadad hisü puhnou paoyu büa avei na veishi sü puhvei baie tea paopeio.”

⁵ Haithai-a kopomai nanou Ahab hi Benhadad nou haibüa paoe tea paopure, “Enou ne hi seive nevei shahu ae sana; nevei hüveiyu naotu maitao ae pfüphao veiyu nahmaitao sü aveie tea paopeire.

⁶ Südonou dosho, chu teile phahi avei peikho maitaoye seive panou nevei ki ae nevei peikho maitao ki sü panou zhutalai, ae na matsüyu veishi sü panou poloulai.”

⁷ Süthaisü Veo Ahab nou teidei süthai-apei mai hrülaiye sü kuloua nou paoe, “Neletao-a sülo, süolouzü mai haina nou Etaoye soukanghi peilai loure, daiolouzü puhnou kopomaiye seive avei shahu, sana, alia avei chapfü ae nahmaitaoye sü khore, ae süsü Enou aetou baie.”

⁸ Süthai-apei maitao ae maisou nou haibüa chila peie, “Puhye sü panou paowo, süsü aetou peiso.”

⁹ Südonou puhnou Benhadad vei kopomaina hisü paoe, “Avei paopu veo hisü puhnou paorai nasü aetouwe, ana ahai nasü aetou louhore tea paopeio.” Kopomai nanou tare, ae süthai-a dakhaive haibüa

¹⁰ Benhadad nou paowe tea paopure, “Enou avei reihmai taoli saloua nevei nuhdu nasü tave souhawulai ae puletao vei bah hinou soushi khaitouyu na khesü panou potawulai. Enou haibüa soupeimoyu thaio ramaiye panou Eye southa-o.”

¹¹ Veo Ahab nou chila peie, “Benhadad veo hi paopeio, süolouzü checheyu soureihmai ali hai reih soumo jüo khaophu soumoe, ana reih souche louyu thainou khaophu soua baiwe.”

¹² Benhadad nou puhye koa soureih souyu vemaitaoye sa-a sahpao hinou touso-a bukinou Ahab vei chila sü ve puh hi paopeie. Puhnou puhvei maitao hisü talou nuhdu nasü soureih soure donou soudalo tea kharochi peie.

¹³ Ae süteile hinou rachipaolayu mai ali nou Veo Ahab hi ve haibüa paoe, “Mapao nou haibüa paowe, süolouzü reihmai me dushoyu vanou ngaopiso! Enou zhou teithe neye veilouyu sü peilai, ae nenou E hai Mapao süe touyu süloulai.”

¹⁴ “Thaonou süthaisa-a reih sü soulai?” tea Ahab nou noue. Rachipaolawo nou chila peie, “Mapao nou haibüa paoe, ‘Nuh teidei khowo khehinou buyu reihmai nahleyu maitao noulai.’ ” “Thaonou reihmaitaoye süthaisa-a talai,” tea veo nou noue. “Nenou satalai,” tea rachipaolawo nou chila peie.

¹⁵ Süthaisü puhnou teidei khowo khehinou nahle-a buyu reihmaitao sü kupa loure, ae puletao hai mai 232 bue, süthaisü puhnou Israel maivei reihmai hrülaiye kupayu phaki, puletao hai mai 7,000 bue.

¹⁶ Benhadad ae puhye soukhayu vemai shiahai sü puletao vei sahpao hinou touso zhi-a buyu hea teile hinou soureih hai soutare.

¹⁷ Nahleyu soureih maitao nou rai-a takoure. Benhadad nou reihkhaomai seitayu maitao nou tave Samaria hinou reihmai me ali hai tapare tea paopeie.

¹⁸ Puhnou haibüa kharochi peie, “Puletao nou soureih soulai tea veyuma, moa kaonayu sü khore donou veyuma hria nou puletaoye sü nükhailo.”

¹⁹ Nahleyu soureih maitao nou rai-a takou-e, ae puletaoye Israel maivei reihmaitao nou thaifü poa takoue.

²⁰ Puletao nou reih duyu mai alili jünou puletao nou veiloue, ae Sairia mai sü tutare, ae Israel mainou puletaoye thaihu tare, ana Sairia hi Veo Benhadad nou rhei pfüloua rheipfüyu reihmai kamai-a saloua tureipa loure.

²¹ Ae Israel hi Veo Ahab nou tapa rheitao ae rheiluki khesü poloure, ae Sairia mai taoli hai southawure.

²² Süthaisü rachipaolawo nou Veo Ahab hi paoe, “Ne dakhaiho nevei soureihmai sü soutaosoua nou khailo ae kabüa soureih soulai touyu tsüchoda-a bulo, daiolouzü Sairia hi veo nou daohko khonü khana teile hi soureih souvepulai.”

Sairia Mainou Ahai Chenasoua Soureih Souyu

²³ Veo Benhadad vei peikho maitao nou puh hi paoe, “Israel maivei rah sü deichi hi vei rah-e, südonou Israel mainou Etao jünou veiloure. Ana Etao nou deikho hinou soureih soua bailouzü, puletao jünou veilou süe.

²⁴ Chuo haibüa soulo: vemai shiahai sü puletao vei vahbu hinou popalaio, ae puletao thaosü reihmai peikhomai thoulo;

²⁵ ae neye thaowua tutayu reihmai zhoua save jülo, raichoki rhei ae rheiluki zhoutoua tudalo. Sükua deikho hinou Israel maiye reih soulai, ae zhovuo Etao nou puletao jünou veilou süe.” Veo Benhadad nou puletao vei chipao sü kaore tea poloure.

²⁶ Benhadad nou khonü khyana khouh sü Sairia mai ye save jüloua Israel mai ye soureih soure donou Aphek nuhdu hisü ve buloure.

²⁷ Israel mai-a kuve jüloua souda loure; puletao nou tapa me ahai souloua Sairia mai hilova rei-a nou fühao souloua buloure. Israel mai sü houmaitao nghoujü hinou chokhome titou ahai büa baie, ana Sairia mai louzü deiphao dushoa buphou loure.

²⁸ Rachipaolayu mai ali nou Veo Ahab hi veloua paoe, “Mapao nou haibüa paoe, ‘Sairia mai nou Eye deichi hi rah baie, ae deikho hi rah moe tea paoyu donou puletao vei reihmai haizhoua buyuma Enou veilouyu sü ne hi peilai, ae ne alia nevei maitao nou E hai Mapao süe touyu pa süloulai.’”

²⁹ Teithe anai koute hai Sairia alia Israel maitao nou alinou aliye zhua puletao vei fühao hinou bue. Teithe anai zhou nou puletao hai reih souta-e, ae Israel mainou Sairia maivei reihmai the kaihli hai southawure.

³⁰ Hria tupa louyu maitao nou Aphek nuhdu hi tuvere; ae nuhdu vei kivo sünou kaokou mai 27,000 sü deithare. Benhadad-a nuhdu hisü tuvere ae nuhdu thailova buyu kide ali hinou tuchüa nou bue.

³¹ Puhvei peikho maitao nou tave haibüa paoe, “Israel maivei vemaitao hai maiye zhuvea süwe tea Etao nou chou-e. Südonou Etaoye soukousah banouloua ae rai nou Etao vei te hi phuloua Israel maivei veo hisü taho daowo, sükulouzü puhnou nevei hrirai pomoa khailupeia sümoe.”

³² Südonou puletao nou soukousah banou loure ae rai nou te hi phuloure, ae Ahab hi tave paoe, “Nevei kilaio Benhadad nou zhuvea puhye southa peiso tea kho-a bure.” Ahab nou chila peie, “Puh chua hria buhivu? Veire, puh sü ajürai baie!”

³³ Benhadad vei peikho maitao nou kabülaisa tea vuzhia buyu hinou süsü veire tea poloure, ae Ahab nou puhsü “Ajürai baie,” tea paoyu haibüa chi paoha touloure, “Nenou paoyu büa Benhadad sü ne jürai baie.” “Puhye ahi save-o,” tea Ahab nou kharochi peire. Süthaisü Benhadad nou puh hi vere, ae Ahab nou puhye koa panou puhvei rheiluki hisü pa buloure.

³⁴ Benhadad nou puh hi paoe, “Apuo nou ne puo hinou polouyu nuhdu khesü Enou ne hi dakhai peilai, ae apuo nou Samaria hinou hupobuh soukhai touyu büa nenou Damaskas hinou hupobuh sü soukhailo.” Ahab nou chila peie, “Haibüa vo soukhai loulai toulouzü, Enou neye panou lahdo soupeilai.” Ahab nou puhye koa vo souloua panou puhye sü tare.

Rachipaolawo nou Ahab ye Aetoumoyu

³⁵ Mapao nou kharochi peia rachipaolayu maime hinou rachipaolayu mai ali nou puhvei samai ali hi puhye khoukhaio tea lühpeie, ana puhnou soubare,

³⁶ südonou puhnou hona hisü paoe, “Nenou Mapao vei kharochi zübayu donou, chipeikhaodu nou neye sü buh hai hinou tapayu phaki nütouloua bailai.” Mai honanou buh sühinou tapayu phaki chipeikhaodu nou puhye sü southawure.

³⁷ Süthaisü rachipaolawo nanou mai kukhe ali hi veloua paoe, “Zhuvea nou Eye dapeio!” Mai honanou puhye sü dashi shopeiwure.

³⁸ Südonou rachipaolawo sü tare, ae ludu hinou puhye panou shilou hore zhai souloua Israel mai hi Veo ye daore donou kho-a buloure.

³⁹ Veo nou ludu hi takouyu phaki, puhnou shusou veo ye kuloua nou paoe, “Oh puo veo, ne kilai Enou soureih souyu hisü ta-e, ae soureih souyu mai ali nou ngaobamai ali nüloua ahi save khaipeie ae haibüa paoe, ‘Mai hai nasü khotou toulo, hakinou puhye panou tuta louzü, puhvei hrirai thaosü nevei hrirai nou polai, moyuma shahu thesü hai ne hinou zhotoulai.’

⁴⁰ Ana Enou vah kukhe hinou zhoha loure, ae puhye panou tuta loure.” Veo nou puh hi paoe, “Ne lah nevei chi sü kuloure, südonou ne sü veahoyu hai ngaoyu chide.”

⁴¹ Süthaisü rachipaolawo nou puh pah hopfüa buyu sah sü phawure, ae veo nou puh hai rachipaolayu maire tea zhiloure.

⁴² Rachipaolawo nou veo hi paoe, “Mapao nou haibüa paoe: ‘Daiolouzü Enou southawo tea ne hi kharochi peikhai touyu mai nasü nenou phapeiwure. Südonou nevei hrirai sünou puhvei hrirai thaosü poloulai, ae puhvei reihmaitaoye panou talouyu donou nevei reihmaitao sü souhawulai.’ ”

⁴³ Israel hi veo sünou levea nou Samaria hi puhvei ki hisü dakhai tare.