1 VEMAITO 18 - SHEEYU BAIBEL (BSI)

Elijah ae Baal vei Rachipaolayu Maitao

¹ Teile daotu thaisü, teirü moyu po asü navasü Mapao nou Elijah hi paoe, “Ne Veo Ahab hi tawo, ae Enou teirü sü seive peilaire.”

² Südonou Elijah nou Ahab hi vere donou tare. Samaria hi tokaayu hai shisho loure,

³ südonou Ahab nou veo vei ki khoyu hi peikhowo Obadiah ye sü kure. (Obadiah hai Mapao ye soutaosoua thoyu mai alie;

⁴ ae Jezebel nou Mapao vei rachipaolayu maitaoye southayu phaki, Obadiah nou rachipaolayu mai kaihli hai saloua me ahai souloua, me ali hinou mai raingou raingou hai lyaqulu hinou poku khaipeie, ae puhnou puletaoye touso ae dzü hai peie.)

⁵ Ahab nou Obadiah hi paoe, “Ahai koa nou dzüla payu ae deikho veishi hisü kikhaorü touyu poudai hai buhayu zhuta laikhe, sübüa rheitao ae rheisü khesü panou thaimoa khailou laishe.”

⁶ Puhai nou ae-ao souloua teidei sü zhutare; Ahab nou teidei alilova tare, ae Obadiah nou alilo vatha tare.

⁷ Obadiah nou ludu ta-a buyu teile hinou puhnou Elijah ye daoloure. Obadiah nou puhye sü zhuh shiloure, puhye nakou khurüloua puh hi noue, “Ne apaopu Elijah movu?”

⁸ Elijah no puh hi chila peie, “Ouvai, E-e. Ne taho nevei paopu Ahab veo hi E haihi bue tea paopeio.”

⁹ Obadiah nou paoe, “Enou dai mah soupei khaitoua ne kilai Eye Ahab vei bah hi thoupeia panou southalai touwe?

¹⁰ Hria buyu nevei Ramai Mapao zhih hinou chaachou soua paowe, süolouzü veo nou neye deiphao hi buyu tyadei veishi hisü phoutare, ae tyadei sünahi mainou neye ngaomoe tea paoyu phaki, Ahab nou neye ngaomo cheche-e tea panou chaachou souwe.

¹¹ Ae nenou chuo Eye panou Elijah sü hai hi bure tea panou paonüwu?

¹² Hakinou Mapao vei rako nou neye Enou sümoyu buh ali hi Enou buh hai hinou tayu thainou sapoa talouzü kabülai? Süthaisü, Enou Ahab hi ne hai hi bue tea paopeiwua puhnou neye ngaomo louzü puhnou Eye southa bailai. E taibuki nou soutaosoua Mapao ye tsükhoua thoyu mai alie touyu licho peio.

¹³ Jezebel nou Mapao vei rachipaoyu maiye southayu phaki, Enou rachipaoyu mai kaihli, me ahai soua mai raingou raingou nou lyaqulu hi poku khaitoua Enou puletaoye touso ae dzü peia nou bue touyu ne sümovu?

¹⁴ Südonou ne kabüa Eye taho veo hi ne hai hi bue tea paopeio tea kharochi peiwe? Puhnou Eye southa bailai.”

¹⁵ Elijah nou puh hi chila peie, “Enou kuvah soua buyu Mapao sü hriyu thaifüa zhou teithe Enou veo sü daovu zülai touyu hai chaachou soua paowe.”

¹⁶ Südonou Obadiah nou taho Ahab hi paopeie; ae Ahab nou Elijah ye daore donou tare.

¹⁷ Ahab nou Elijah ye tave daolouyu phaki, Ahab nou puh hi paoe, “Israel maiye souvea kayu nasü hai hi bure!”

¹⁸ Elijah nou puh hi haibüa chila peie, “Enou Israel maiye souvea moe; ana nenou souvea baie, ae ne puo kihikhamai nou baie. Daiolouzü nenou Mapao vei kharochi sü zü moe, ae Baal vei bashara sü thotare.

¹⁹ Südonou chuo Israel mai hrülaiye Karmel Deichi hinou Eye tave daopeio tea kharochi peio. Baal vei rachipaolayu mai 450 ae Asherah rapfüpai vei rachipaolayu mai 400, Vepfüpai Jezebel ye thaikoyu maitao-a kupoa velo.”

²⁰ Südonou Ahab nou Israel mai hrülai ae rachipaolayu maitaoye sü Karmel Deichi hi kupoa nou ve jüloure.

²¹ Elijah nou maisou hi takouloua nou paoe, “Teile kasho neletao nou tsüle ahai soua bukou laige? Mapao hai Ramai-e toulouzü puhye tholo; ana Baal nou Ramai baie toulouzü puhye tholo.” Ana maisou sünou chi lia raomore.

²² Süthaisü Elijah nou paoe, “Mapao vei rachipaolayu mai hai E lah likhei baire, ana Baal veo rachipaolayu mai hai 450 buhie.

²³ Chode ahai pove peio; Baal vei rachipaolayu maitaoye panou chode ali polo, sünasü dathaloua vasa toulo, ae süü phao hi popa khailo, ana mei thou saoso. E-a sübütoua chode kukhe nasü souloulai.

²⁴ Süthaisü Baal vei rachipaolayu maitaoye panou puletao vei rah hi veachi paokhaio, ae E-a Mapao hi veachi paolai, alia veachi paoyu keipeia mei seikou peiyu nanou Ramai-e tea polai.” Maisou sünou süsü kaore tea shapaore.

²⁵ Süthaisü Elijah nou Baal vei rachipaolayu maitao hi paoe, “Neletao hai mai pouyu thaifüa chode ali poloua sourai-o. Neletao vei rah hi veachi paokhaio, ana süü hisü mei thouso.”

²⁶ Puletao nou chode sü poloua souda loure, ae Baal hi hea touchü koute hai veachi paoe. Puletao nou “Oh Baal, Etaoye chila peio,” tea shapaore, ae posheelabu sü chohaore. Ana chila sü peimore.

²⁷ Hea touchü kouyu phaki Elijah nou puletao ye konüa paoe, “Pai chipua nou veachi paokhaio! Puh sü rah-e! Puh sü tsücho-a buyuma sülou hoe, moa so-a bubulai, mokhaiyuma buh kukhe hi veita bulai! Molouzü puh hai zhi-a memua nou bulai, neletao puhye kailo!”

²⁸ Südonou rachipaolayu maitao nou paichipua veachi paore ae puletao vei naanou thaifüa kho ae kaiti poloua lah puletao vei vasou sü zhe soupare.

²⁹ Puletao nou heamajü, ae koukhe koute sü shusoua ra-a nou veachi paoe, ana chila aliro peimore, paikho lia choua choumore.

³⁰ Süthaisü Elijah nou maisou hi paoe, “Ahi tanghi koulo,” ae maisou nou puhye sühao loure. Soushi khaitouyu Mapao vei posheelabu nasü puhnou soushupu loure.

³¹ Elijah nou chuh kiahai, “Ne zhih hai Israel tea kulai,” tea Mapao nou paopeiyu, khü che hinou chuh alili hai Jakob vei nahpoutu kiahai vei zhih thaifüa poloure.

³² Ae puhnou Mapao ye thore donou chuh haitao nou poa posheelabu sü souloure. Ae puhnou posheelabu pehao teitei sü dzü litar kiadai loulou süyu phasü deibvü hethou loure.

³³ Süthaisü puhnou süü hai posheelabu phao hi khailoure, chode sü dathaloua vasa saloua süü phao hi khailoure. Puhnou paoe, “Dzükhou adai poloua posheela laiyu süüphao hisü lazü peikhaio.” Puletao nou dzü poloua lazü peire.

³⁴ Ae puhnou paopue, “Chua dzü poloua lazüpu peio” — ae puletao nou sübüa soupu peie. “Chua bakha ali soupuraio,” tea puhnou paoe, ae puletao nou soupeie.

³⁵ Posheelabu hi lazüyu dzü sünou kükou deibvü hekhai touyu sü phouloure.

³⁶ Koukhe posheelare teile kouyu phaki, rachipaolawo Elijah nou posheelabu hi takouloua veachi paoe, “Oh Mapao, Abraham, Isaak ae Israel maivei Ramai, zhou teithe ne hai Israel maivei Ramai nasüe, ae E hai nevei kilai-e ae hai khesü nevei kharochi thaifüa soua baie touyu sü panou sülo.

³⁷ Oh Mapao, Eye chila peio, Enou khoyu sü keinou peio, sükulouzü mai haitao nou ne hai Mapao Ramai nasüe touyu sü panou sülo, ae nenou puletaoye ne hi sa-a dakhai veloue touyu sü panou sülo!”

³⁸ Süthaisü Mapao nou mei seikou peire, ae posheela peikhai touyuna, süü, chuh, ae deinai sü taoloure, alia pehao hi dzü lazü khaitouyu teitei sü chathewure.

³⁹ Maikhe mainou haisü zhingaolou khaie, puletao nou pei pfüa nakoure ae haibüa paoe, “Mapao hai Ramai süe; Mapao likhei Ramai sü baie!”

⁴⁰ Elijah nou maikhe mai hi paoe, “Baal vei rachipaolayu maitaoye nülo; mai lia panou tupa louso!” Maikhe maitao nou puletaoye sü nüloure, ae Elijah nou homaitaoye sü Kishon Rei hi sakou loua southawure.

Teikoyu Akhai

⁴¹ Süthaisü Elijah nou Ahab hi paoe, “Chuo taho ha phoutoulo; teirü shisho vere kho sü Enou choure.”

⁴² Ahab nou ha toure donou tare, ae Elijah nou Karmel Deichi vasü taopa loua puhnou pei pfüa nakou khoubou ahai kohi khailoure.

⁴³ Puhnou puhvei kilai mai hi paoe, “Tapa zai hilova zhukhaio.” Kilaio nanou taho zhuloua dakhai ve paoe, “Enou halia zhingao moe.” Elijah nou sübüa bakha anai koute hai taho zhukhaio tea paoe.

⁴⁴ Bakha anai vusü puhnou haibüa paoe, “Enou teihao bahzü deitouli hai zai hinou khaopa-a zhingaoe.” Elijah nou puhvei kilai nahi paoe, “Taho Veo Ahab hisü teirü kou puhye ngiloumo jünou rheiluki pfüloua tutawo tea paopeio.”

⁴⁵ Teile daotuli buyu thaisü ratei veishi hai zhitei tea teihao chaoho loure, teikhei hüpare, ae teirü hai shishoa rükoure. Ahab nou rheiluki pfüloua Jezreel hi veloure.

⁴⁶ Mapao vei khouko nou Elijah pei hi velou peia puhnou puhvei sah nou khya vealoua Ahab jünou rai-a Jezreel hi tuveloue.