1 VEMAITO 16 - SHEEYU BAIBEL (BSI)

¹ Süthaisü Mapao nou rachipaolawo Hanani nahpoutu Jehu hi Baasha vanou haibüa paoe:

² “Enou neye hazholia moyu hinou popa avei Israel maiye süthaire donou soupeie. Ae chuo nenou Jeroboam büa mahmo khesü soutare ae avei maitaoye süthaisa-a mah soutare. Puletao vei mahmo sünou avei lekha rarou sü soupa peiwure,

³ ae Enou nevei kihikha maitaoye sü Jeroboam kihikha maitao büa souhawulai.

⁴ Nevei kihikhamai taralinoua nuhdu hinou thailouzü puhye sü sei nou touloulai, ae vakou nou thailouzü rashopeiki panou touloulai.”

⁵ Baasha nou soupfüyu vah veishi hai Israel hi Vemaitao vei Hrüko Larübvü hi rüthoupei khaitoue.

⁶ Baasha nou puhvei puopaoh maitaoye koa zhitare, ae puhye Tirzah hinou daovu peie, alia puh nahpoutu Elah nou puh thaosou pa vekou loue.

⁷ Mapao vei chipao hai Hanani nahpoutu rachipaolawo Jehu panou Baasha kihikha maitao pei hi paopeie, daiolouzü puhnou Mapao vei nghingao hinou Veo Jeroboam büa vah ashi khesü soupfüe ae Jeroboam vei kihikhamai hrülaiye southakhai toupeiyu donoue.

Israel hi Veo Elah

⁸ Judah hi Veo Asa nou veo souyu po kairou kousü Baasha nahpoutu Elah nou Israel hi vekou loue ae puh nou Tirzah hinou po ahai sü veo soue.

⁹ Ana puh khenou peichayu Zimri, puhnou veo vei rheiluki dali hai khowe, puhnou veo ye southare donou shodo ashi sü souloure. Teitheli Elah nou veo vei ki khoyu maitao hi peikhowo Arza vei ki, Tirzah nuhdu hinou zhaoh sozhi loure.

¹⁰ Zimri nou kihikha talouloua puhye sü southawure. Haisü Judah hi Veo Asa nou vekou louyu po kainai kou noue, ae puh thaosü puhnou pa vekou loue.

¹¹ Zimri nou pa vekou louyu thaisü puhnou Baasha kihikhamai hrülaiye sü southawure; puhnou Baasha vei kityarai soua buyu poutumai hrülai ae samai khamai hrülaiye southare.

¹² Sübüa rachipaolawo Jehu nou Baasha hi paoyu Mapao vei chipao thaifüa Baasha kihikhamai hrülai Zimri nou southakhai toure.

¹³ Baasha ae puh nahpoutu Elah nou mah souyu donou ae Israel maiye panou mahmo soutayu donou alia puletao nou ngaorayu basharaye thotayu vanou Israel maivei Ramai Mapao lekha sü soupa peire.

¹⁴ Elah nou soupfüyu vah veishi sü Israel hi Vemaitao Hrüko Larübvü hi rüthou peikhai toue.

Israel hi Veo Zimri

¹⁵ Judah hi Veo Asa nou veo soulouyu po kainai kousü Zimri nou teithe anai hai Tirzah hinou Israel maivei veo soue. Israel maivei reihmaitao sü Philistin maivei teidei Gibbethon nuhdu hi reih huloulai tea bue,

¹⁶ ae Zimri nou shodo ashi souloua veo ye southare touyu ko hai choulouyu phaki, puletao nou puletao vei reihmai peikhowo Omri nou pa Israel maivei veo soulai tea shapaopa peiwure.

¹⁷ Südonou Omri nou Israel mai hrülai ye saloua Gebbethon hinou tapoapa Tirzah nuhdu sü haoloure.

¹⁸ Nuhdu nasü kaodu tare touyu Zimri nou süloua puhnou veo ki khevai sü talouloua ki sü mei shaowure, ae puh-a mei nou deithawure.

¹⁹ Puhnou Mapao vei nghingao hinou Jeroboam büa mah sü soure ae Israel maiye süthaisa-a mah soutayu donou haibüa vepare.

²⁰ Zimri nou soupfüyu vah veishi, ae puhnou shodo ashi souyu haisü Israel hi Vemaitao vei Hrüko Larübvü hi rüthoupei khaitoue.

Israel hi Veo Omri

²¹ Süthaisü Israel mai hai me ahai soua dade loure: maime ali nou Ginath nahpoutu Tibni ye panou veo sounü loure, ae me kukhe nanou Omri panou veo sü sounü loure.

²² Ana akhai hi kou Omri thaifüyu maitao nou Ginath nahpoutu Tibni thaifüyu maitao jünou veiloure; südonou Tibni sü thaire, ae Omri nou vekou loure.

²³ Judah hi Veo Asa nou vekou louyu po shiali kousü Omri nou Israel mai hi vekou loue, ae puhnou po kiahai sü veo soue; puhnou po arou hai Tirzah hinou veo soue,

²⁴ ae süthaisü puhnou Samaria deichi sü Shemer touyu mai ali hinou shahu 6,000 peia hüloue; ae puhnou deichi nasü kaopo poloua nuhdu soushu loure, ae Samaria tea puhnou hülouyu deichi paopu Shemer zhih hinou sapeie.

²⁵ Omri nou Mapao vei nghingao hinou vah ashi khesü puh jünou rai-a buyu maitao jünou soupure.

²⁶ Puhnou Nabat nahpoutu Jeroboam büa mah soure, ae Israel maivei Ramai Mapao vei lekha rarou hai puhnou mah sou shoyu donou alia Israel maiye panou bashara sü tho-a puhnou süthaisa-a mah soutayu donou lekha soupa peiwure.

²⁷ Omri nou soupfüyu vah veishi sü Israel hi Vemaitao vei Hrüko Larübvü hi rüthou peikhai toue.

²⁸ Omri sü thaitare ae puhye Samaria hinou daovu peie. Süthaisü puh nahpoutu Ahab nou puh thaosou pa vekou loue.

Israel hi Veo Ahab

²⁹ Judah hi Veo Asa nou vekou louyu po shiacha kousü Omri nahpoutu Ahab nou Israel hi vekou loue, ae puhnou Samaria hinou po kaihai sü veo soue.

³⁰ Ahab nou puh jü raiyu maitao jünou Mapao vei nghingao hinou mah sü soupure.

³¹ Nebat nahpoutu Jeroboam nou mah souyu jünou la-a puhnou soupu hie; puhnou Sidon hi Ethbaal veo nah naotupai Jezebel ye naloua Baal rah ye thotare.

³² Puhnou Samaria hinou Baal rathoki sü soupeie, Baal rahye thore donou posheelabu sü souloua rathoki hi khaipeie.

³³ Ae Ahab nou Asherah rapfüpai zhurai-a souloua khaipeie. Puhnou puh jünou rai-a Israel mai hi veo souyu kukhe maitao jünoua Israel maivei Ramai Mapao vei lekha rarou hai soupa peipure.

³⁴ Puhnou veo soua buyu teile hinou Bethel puona Hiel nou Jeriko nuhdu sü soushu papu loure. Mapao nou Nun nahpoutu Joshua hinou paopeiyu büa Hiel nou Jeriko beikhei soushu tayu phaki, puh nahpoutu naraio Abiram sü thaire, ae puhnou rokhubomü soushuyu phaki, puh nahpoutu nakhayuna Segub-a thai-e.