1 VEMAITO 13 - SHEEYU BAIBEL (BSI)

¹ Mapao vei kharochi thaifüa Judah hinou rachipaolayu mai ali nou Bethel hi ve-e. Süphaki Jeroboam nou poukai nüvei hai deilai tea posheelabu hinou la-a nou bue.

² Mapao vei kharochi thaifüa rachipaolawo nou posheelabu nasü haibüa chaa peie, “Oh posheelabu, posheelabu, Mapao nou haibüa paoe, Nahtou ali, David vei kihikha hrüvelai, puh zhih sü Josiah tea kulai. Puhnou sheemoyu posheelabu hai hinou kuvah soua buyu napao maitaoye sü datha peilai, ae thaimai vei rao sü meidei peilai.”

³ Ae rachipaolawo nou haibüa paoe, “Posheelabu hai nasü kaota-a bailai, alia hai hi vounai sü poa rarou laikhaiwulai. Süthaisü Mapao nou Eye seive haisü paowe touyu hai nenou süloulai.”

⁴ Jeroboam nou haisü choulouyu phaki, puhnou bahtou teloua haibüa kharochi peie, “Puhye nülo!” Süteile bühinou veo vei baokao sü pothai tare ae puh bah sü lülou hore.

⁵ Rachipaolawo nou Mapao vei zhih hinou paoyu thaifüa posheelabu nasü kaotare ae sühi buyu vounai khesü deiphi dekoure.

⁶ Veo Jeroboam nou rachipaolawo hi paoe, “Zhuvea nou nevei Ramai Mapao zhih hinou veachi paopeio, ae avei bah sü souvei peio!” Rachipaolawo nou Mapao hi veachi paopeie, ae veo vei bah sü veiloure.

⁷ Süthaisü veo nou rachipaolawo hi paoe, “Eye koa aki hi ve hatou laikhe. Nenou soupeiyu thaifüa Enou neye buu peilai.”

⁸ Rachipaolawo nou chila peie, “Nenou Eye nevei kini dali peiyuma, Enou neye koa tave touso zholai moe.

⁹ Daiolouzü Mapao nou Eye halia toukhai touso, ae Enou veyu ludu nahinou dakhai taso tea kharochi peikhaitoue.”

¹⁰ Südonou puhnou veyu ludu hinou moa ludu kukhe hinou dakhai tare.

Bethel hinou Rachipaoyu Tsümaina

¹¹ Süphaki Bethel hinou rachipaoyu tsümai ali bue. Puh nahpoutu maitao nou tave puh hi Judah hinou veyu rachipaolawo nou soupfüyu vah khesü paongao peie alia puhnou Veo Jeroboam hi paoyu khesü paopeie.

¹² “Ludu kalo vanou puh sü tare?” tea rachipaoyu tsümai nanou puletao hi noue. Puletao nou puh hisü puhnou tayu ludu ngaopeie,

¹³ ae puhnou puletao hi puhye donou rheisü ali souda peio tea paoe. Puletao nou puhye rheisü sü souda peiwure ae puhnou pfüloua tare.

¹⁴ Judah hinou veyu rachipaolawo sü puhnou thaihu tare, ae honasü phesüübe ali phi hinou chobua nou daoloue. Puhnou hona hisü “Ne Judah hinou veyu rachipaolawo sünavu?” tea noue. “Oungai, E-e,” tea puhnou chila peie.

¹⁵ Puhnou hona hisü paoe, “Eye sa-a aki hinou ve hatouo.”

¹⁶ Ana Judah hinou veyu mai nanou paoe, “Enou neye sa-a dakhai velai moe, moa ne hinou hatou laimoe, moa ne hinou dzüa kelai moe,

¹⁷ daiolouzü Mapao nou ahi haliro touso, moa dzüa keso, ae ki hi dakhai tayu phaki ludu kukhe hinou dakhai velo tea kharochi peikhaitoue.”

¹⁸ Süthaisü Bethel hi rachipaolayu tsümai nanou paoe, “E-a ne büa rachipaolayu mai alie, ae rakivamai ali hi Mapao nou ahi neye aki hi savelo alia neye touso soupeio tea kharochi peiwe.” Ana rachipaoyu tsümai nasü da-a baie.

¹⁹ Südonou honanou puhye sa-a dakhaive puh ki hinou ha touloure.

²⁰ Puhai nou taibel hinou buyu teile hinou Mapao vei chipao sü rachipaoyu tsümaina hisü vere,

²¹ ae Judah hinou veyu rachipaolawo hisü paoe, “Nenou Mapao chi zümoyu donou, ae nevei Ramai Mapao nou kharochi peiyu sü soumore.

²² Anou, Enou ne hi ha touso tea kharochi peiyu sü nenou dakhaive ha touloure. Hai vanou neye sü southa bailai, ae nevei thaiphao sü nevei kihikha mainou daovuyu buh hinou poa daovu peilai moe.”

²³ Puhai nou touso touche louyu thai, tsünanou sa-a dakhai veyu Judah hi rachipaolawo ye panou rheisü hisü buloure,

²⁴ ae puhsü dakhai tare. Ludu hisü nou puhye sü souveo nou southawure. Puhvei thaiphao hai ludu hinou bure, alia rheisü ae souveo nasü ludupe hinou bue.

²⁵ Ludu ta-a buyu kamai-a nou puhvei thaiphao sü ludu hi bua nou ngao-e, ae souveo sü süpe hinou bue. Puletao nou Bethel hi taho puletao nou ngaoyu sü paongao peie.

²⁶ Ko haisü rachipaolayu tsüna nou choulouyu phaki, puhnou paoe, “Süsü Mapao vei kharochi zümoyu rachipaolawo nare! Puhnou paochi zümoyu donou Mapao nou paokhai touyu thaifüa puhnou souveo sü seive puhye southare.”

²⁷ Süthaisü puhnou puh nahmaitao hi paoe, “Eye panou pfüa tare donou rheisü ali souda peio.” Puletao nou souda peiwure,

²⁸ ae puhnou pfüa taveyu phaki, rachipaolawo vei thaiphao sü ludu hinou bua ngaoloue, rheisü alia souveo-a ludupe hinou buhie. Souveo nou thaiphao sü toumoe, ae rheisüa nütou moe.

²⁹ Rachipaolawo tsüna nou thaiphao sü poloua rheisü hi popa khailoua thaiphao sü Bethel hi pove dopfü peie ae daovu peie.

³⁰ Puhnou thaiphao sü puhvei kihikha mai khü hinou daovu peie, alia puh ae puhvei nahmaitao nou dopfüa haibüa paoe, “Oh athaihou nare, athaihou nare!”

³¹ Thaiphao daovu peiyu thai, rachipaolawo nou puhvei nahmaitao hi paoe, “E thaiyu phaki, Eye puhvei khü pe hinou daovu peio.

³² Mai hai nanou Mapao vei kharochi hinou Bethel hi buyu posheelabu donou paoyu ae Samaria nuhdutao hinou buyu rathobu vanou paokhai touyu teitei sü cheche-a vepakhai toulai.”

Jeroboam nou Dushoa Mah Souyu

³³ Haithai-a Israel hi veo Jeroboam nou vah ashi souyu sü thaomoe, ana puhnou soukhai touyu posheelabu hi panou napao soure donou tarasoua maiye sü vahbu peia baie. Mai taralia napao sounüyu maiye sü puhnou dopeia bubaie.

³⁴ Mah haina vanou puh sü hakata-a baie ae puhvei tyaosholea veishi sü deiphao hinou souha-a baie.