1 VEMAITO 12 - SHEEYU BAIBEL (BSI)

Reilova buyu Khütao nou Moe tea Dutayu

¹ Reilova nou hrüa buyu Israel mai hrülai nou Rehoboam ye panou veo soure donou Shechem hinou vejü-a bure, ae Rehoboam-a Shechem hisü vere.

² Solomon vei teile hinou Ejipt hi tuho tutsüa buyu Nebat nahpoutu Jeroboam nou ko hai süloukhaie, puhnou Ejipt hinou dakhai vere.

³ Reilova nou hrüa buyu khütao nou puhye seiho kuloure, ae süthaisü puletao mai hrülai nou Rehoboam hi tave loua puh hi haibüa paoe,

⁴ “Ne puo Solomon nou Etaoye souvea shopeie alia Etaoye panou kou sühsho-a nou pfüe. Nenou Etao vei koupo hai southa peilouzü ae Etaoye panou raichoki jünou vapua hrülouzü, Etao hai nevei khakhe hinou hrüa bailai.”

⁵ “Teithe asü thainou ahi dakhai ve-o, ae Enou neletao vei chila sü peilai,” tea Rehoboam nou chila peie. Südonou puletao hai dakhai tare.

⁶ Veo Rehoboam nou puh puo Solomon vei paodou-apei maitao hi kabüa mai haitao hi chila peilai tea noue.

⁷ Puletao nou haibüa chila peie, “Nenou mai haitaoye leshi pei-a sousava peilouzü, ae chi lako aveih nou chala peilouzü, puletao hai teisa nou chilee cheche-a nevei khakhe hinou hrüa bailai.”

⁸ Ana Rehoboam nou tsümaitao vei paodou peiyu chi sü pomore, puhye koa hrüpayu nahle maitao, chuo puhvei paodou-apei mai soua khailoure.

⁹ Puhnou puletao hisü noue, “Puletao vei koupo southa peio tea paoyu maitao hisü kabüa E chila peilai? Eye paodou peio.”

¹⁰ Nahle maitao nou haibüa chila peie, “Nenou puletao hisü haibüa paolo: ‘Abah toutu nakhayu na-a apuo vei khya jünou dupu hie!’

¹¹ Puletao hi haibüa paopeio, ‘Apuo nou neletaoye panou koupo hai sü-a pfüe; Enou süpei hinou thoupu peilai hie. Apuo louzü neletaoye süüra nou dabaie, ana Enou neletaoye cho-ha dayu süüpo nou poa dalai!’ ”

¹² Teithe asü thaisü, Jeroboam ae Israel mai hrülai nou Veo Rehoboam hi puhnou paoyu thaifüa vere.

¹³ Veo nou tsümaitao vei paodou peiyu chi polou mo-a maikhe maitao hisü chila shinou pao-a baire,

¹⁴ nahle maitao nou paodou peiyu chi nou paore. Puhnou haibüa paoe, “Apuo nou neletaoye koupo sühsho-a panou pfüe; Enou süpei hinou thoupu peilai hie. Puhnou neletaoye süüra nou da-e; Enou neletaoye rheiye poa dayu süüpo nou dalai!”

¹⁵ Mapao vei leli na thaifüa Shiloh hinou veyu rachipaolawo Ahijah nou Nebat nahpoutu Jeroboam hi paopeiyu nasü panou vepare donoue. Süvanou veo nou puhvei maikhe maiye sü leshi-a popei more.

¹⁶ Israel maitao nou veo hai puletao vei chi sü keipei laimore touyu sü zhingao loukhaie, puletao nou veo hisü haibüa paore, “Etao nou David hinou dai ngaore bue? Etao hai Jesse vei nahpoutu maitao hinou kikaa ngaore halia ha-e! Oh! Israel maitaore, lahkuku vei ki hi dakhai tawo. Rehoboam ye panou lah vei ki sü zhulo!” Sübüa Israel maitao hai lahkuku ki hisü dakhaitare.

¹⁷ Ae Rehoboam hai Judah maivei teidei hi buyu Israel maitao hi likhei veo soua baire.

¹⁸ Süthaisü Veo Rehoboam nou veavah souyu maitao peikhowo Adoniram ye Israel maitao hi seita-e, ana puletao nou puhye sü chuh nou deithawure. Sübüa soupei khaie, Rehoboam hai thashoa rheiluki hi taopaloua Jerusalem hi tuve loure.

¹⁹ Süthai sünou reilova buyu Israel maitao hai David vei kikha maiye vamo shoa soureih soutare.

²⁰ Israel maitao nou Jeroboam hai Ejipt hinou dakhai vere tiyu ko süloukhaie, puletao nou puhye maisou vejüa buyu hi kuve lou-a puhye panou Israel mai hi veo soupeire. Judah vei khü likhei nou David vei tyaonah maitao vei khakhe hi bubaire.

Shemaiah nou Rachipaola Peiyu

²¹ Veo Rehoboam nou Jerusalem hi velou louyu phaki, puhnou Judah ae Benjamin mai hrülaiye sü kuve jüloua reilova buyu Israel maitao hi reih sou-a puhvei teidei sü podakhai loure donou Judah ae Benjamin khü hinou veikayu reihmai 180,000 hai souda loure.

²² Ana Mapao nou rachi paolawo Shemaiah hisü

²³ taho veo Rehoboam ae Judah alia Benjamin maitao hi haibüa paopeio tea paore:

²⁴ “Neletao taho lah neletao vei thaihou jürai soua buyu Israel maitaoye soureih souso. Neletao mai hrülai nou linaonao vei ki hi dakhai tawo, daiolouzü haibüa vepayu teitei sü Enou soua baie.” Mapao nou puletao hi paoyu chi züa puletao nou soureih soumoa lahkuku ki dakhai tare.

Jeroboam nou Mapao hinou Tarei tayu

²⁵ Israel maivei veo Jeroboam nou Ephraim maivei deichi hilova buyu Shechem nuhdu nahai kaopo potou touloua phajü touli sühinou hrüa bue. Süthaisü puhnou buh sühi thao-a Penuel nuhdu nasü kaopo potou touloua sühinou hrüe.

^26-27 Jeroboam nou lah puh hi haibüa paoe, “Chu zhai büa bukou louzü, ae avei maitao nou Jerusalem hi ve Mapao vei Rathoki hinou ratho-a posheela hai peilouzü, puletao nou Judah hi Veo Rehoboam hi puletao vei tsüle sü peita-a bailai, ae Eye southa bailai.”

²⁸ Sübüa puhnou tsücho loure, südonou sana nou chode zhurai ahai sü souloua puhvei maitao hi paoe, “Neletao nou taho Jerusalem hinou rathore sü dousho loure. Israel maitaore, neletaoye Ejipt teidei hinou sapa peiyu rah nasü hai hi bure.”

²⁹ Puhnou sana chode ali hai Bethel hi khaipeie alia kukhe nasü Dan hi khaipeie.

³⁰ Sübüa maikhe maiye panou Bethel ae Dan hinou tave ratho-a mahmo sü soutare.

³¹ Jeroboam deichi peitaoh kinoua rathoyu buh khesü soupeie, alia Levi vei khü hinou moa mai tarasoua nou napao maitao sü dokhai peie.

Bethel hinou Rathoyu sü Aetoumoyu

³² Jeroboam nou Judah hinou khonüh nüyu büa khouh acha vei teithe kiangou zhou sü khonüh nüre donou teithe dade khaipeiwure. Bethel hi puhnou sana chode soukhai touyu hi posheelabu hinou puhnou posheela sü posheela peire, alia puhnou soukhai touyu rathobuh hisü napao mai hai dokhai peiwure.

³³ Alia khouh acha vei teithe kiagou zhou, puh lah Israel maiye donou dopa khaitouyu teithe zhou sü puhnou Bethel hi taho posheela peia khonüh sü nüe.