1 VEMAITO 11 - SHEEYU BAIBEL (BSI)

Solomon nou Ramai hinou Tarei Tayu

¹ Solomon nou vakou maipfüa alao soumoa leshi-e. Ejipt hi veo nah naotupai nayu jünou pua puhnou Hit maipfü, Moab maipfü, Ammon maipfü, Edom, ae Sidon maipfüye na-e.

² Mapao nou Israel maiye vakou mai koa shanghi souso tea kharochi peikhai toue, daiolouzü sübüa soulouzü puletao vei tsüle hai rah kukhe hi peita-a bailai, sübüa buyuma Solomon nou vakou maipfüye natare.

³ Solomon nou maipfü 700 na-e, ae khopfü 300 khaikhaitoue, sütao nou puhye Ramai hilounou povai tare,

⁴ alia puhnou tsüpayu phaki, puletao nou puhye sü panou vakou maivei rah sü thotare. Puh sü puh puo David zhai büa puhvei Ramai Mapao hisü chilee cheche more.

⁵ Puhsü Sidon maivei rapfüpai Ashtoreth alia ngaorayu Ammon maivei Molek rahye thotare.

⁶ Puhnou Mapao nghoujü nou mah sü soutare, ae puh puo David büa checheyu sü hatare.

⁷ Puhnou Jerusalem vei teinghi palova nou Moab maivei ngaorayu Khemosh rahye thore buh sü soupeie, alia Ammon maivei Molek rahye thore buh sü soupeie.

⁸ Vakou maipfüye nayu puhvei chapfü maitaoye panou lahkuku vei rahye tho-a poukai nüvei meidei peire ae panou posheela peire donou rathoki hai soupeie.

^9-10 Israel maivei Ramai Mapao nou Solomon hi bakha ahai ngaopeia puh hi vakou maivei rahye thoso tea kharochi peiyuma Solomon nou Mapao chi zümoa puh hinou tarei tare. Südonou Mapao nou Solomon hisü lekha loure

¹¹ ae puh hi haibüa paoe, “Nenou sütou tea nou Eye koa vo soukhai touyu nasü pfüthowure ae avei kharochi khesü zümore, südonou Enou vedei sü ne hinou poloua nevei peikhomai ali hi peilai tea chaachou souwure.

¹² Anou haisü nepuo David vanou, Enou haisü ne hria buki soupei laimoe, ana nevei nahmai hinou soupeilai.

¹³ Alia Enou vedei veishi sü puh hinou potakhai toulai moe; Avei kilai David donou alia Avei soure donou dopa khaitouyu Jerusalem nuhdu vanou khü ali hai shokhai peilai.”

Solomon vei Ngaoba maitao

¹⁴ Chuo Mapao nou Edom hi veo kihikha nou hrüveyu Hadad panou Solomon ye dutare donou soupeiwure.

^15-16 Daoh raichoki, David nou Edom mai jünou reih veilouyu phaki, puhvei reihmai peikhowo Joab thaiphao khesü daovu peire donou sühisü ta-e. Puh ae puhvei maitao nou Edom hisü khouh arou hai bue, ae süphaki puletao nou Edom hi poutumai hrülaiye sü southa khaitoure,

¹⁷ anou Hadad alia puh puo vei kilai mai kamaiye saloua nou Ejipt hinou bailoure. (Süphaki Haded sü nahmaitou soua baihie.)

¹⁸ Puletao nou Midian sü thao-a Paran hi tare, süphaki kamai-a nou puletao hi velou zholoue. Süthaisü puletao nou Ejipt hisü tare, ae puletao nou veo hi velouyu phaki, veo nou Hadad hi teidei daotuli hai peie alia ki ae touso sü peie.

¹⁹ Hadad nou veoye samai souloure, ae veo nou puhvei chapfü Tahpenes thaihoupai ye Hadad ki khaipeie.

²⁰ Honapai nou puhye nahpoutu ali napeie, ae puh zhih sü Shuubath tea sapeie, puhye sü vepfüpai ki hinou veo vei nahmaitao koa nou hrüzho-e.

²¹ Hadad nou Ejipt hinou David alia Joab-a thaire tiyu ko hai choulou khaie, Hadad nou veo hi paoe, “Eye panou avei teidei hisü dakhai ta-a baio.”

²² Veo nou noue, “Daivanou-e? Enou ne hi peichelou moyu burevu? Süvanou ne ki hi dakhai nüdou? “Eye panou tabaio,” tea Hadad nou veo hi chila peie. Sübüa puhnou lahvei teidei hisü dakhai tare. Hadad hai Edom hi veo souyu thaifüa puh hai Israel maiye ngaoba shore.

²³ Süthai-a Ramai nou Solomon ye panou hraire donou Eliada nahpoutu Rezon sü soupeiwure. Rezon nou puh vei paopu, Zobah hi Veo Hadedzer hinou tutare,

²⁴ maishiyu maime ali vei süthai-apeio sü souloure. (Haibüa vepayu hai David nou Hadadezer alia Sairia maivei reihmaitao jünou veiloua puletaoye southa peiyu thainou-e.) Rezon ae puhvei maitao nou taho Damaskas hinou hrüe, ae puhye panou Sairia maivei veo sü souloure.

²⁵ Solomon nou hria buki sasü puh hai Israel maiye ngaoba-a hrüe.

Ramai nou Jeroboam hi Paohpeiyu

²⁶ Veo Solomon ye aetou moa hraitayu hai mai ali bupu hie, puh hai puhvei khehinou peikhowo Nebat nahpoutu Jeroboam-e, puh hai Ephraim hinou Zeredah khü-e. Puh pfü hai mimeapfü ali baie, puh zhih sü Zeruah tea kuwe.

²⁷ Vamoa hraitayu ko sü haibüa soushu-e. Solomon nou Jerusalem teinghi palova dei na-a buyu nasü pothou deithou-e ae nuhdu vei kivo sousheepue.

²⁸ Jeroboam hai khouko bushoa soulou süyu nahlemai alie, ae puhnou vah sü souveiyu hai Solomon nou ngaoloua puhye panou Ephraim alia Manasseh khü ahai hi taichü poa vah souyu maitaoye panou süthaisa-a vah souyu vei peikhowo nasü thoupeie.

²⁹ Teitheli, Jeroboam hai Jerusalem hinou veita-a buyu phaki, Shiloh hinou veyu rachipaolawo Ahijah nou puhye lududo hinou tave daoloue.

³⁰ Ahijah nou banou-a buyu naazao nasü kiahai soua paiphaloure,

³¹ ae puhnou Jeroboam hi paoe, “Paipha khaitouyu kirou hai ne polo, daiolouzü Israel mai vei Ramai Mapao nou haibüa ne hi paoe, ‘Enou Solomon hinou vedei sü potawulai, alia khü kirou taosü ne hi peilai.

³² Solomon nou khü ali hai khailoulai, süsü daivanoue toulouzü avei kilai David alia Enou Israel maivei teidei teitei hinou avei soure donou dopa khaitouyu Jerusalem nuhdu donoue.

³³ Enou haibüa soupeilai, daiolouzü Solomon nou Eye malaiwure alia vakou maivei rah khesü thotare: Sidon maivei rahpfüpai Astarte; Moab maivei rah Chemosh; ae Ammon maivei rah Molek. Solomon nou achi zü more, vah kaomoa soutare, ae puh puo David kumoa avei chikha ae kharochi khesü pfüthore.

³⁴ Ana Solomon vei vedei veishi sü pota laimoe, alia puh hri-a busasü puh hi khouko sü peilai. Haisü daivanoue toulouzü, Enou dolouyu avei kilai David nou avei chikha ae kharochi khesü züyu donoue.

³⁵ Enou vedei sü Solomon vei nahmai phao hinou potawulai, ae khü kirou sü ne hi peilai,

³⁶ ana khü ali hai Solomon vei nahmai hi khaipeilai, sükulouzü teisa nou avei kilai David vei tyaonah maitao nou Jerusalem, Eye thore donou dopakhai touyu nuhdu hinou ratho-a veo sü soua bukou loulai.

³⁷ Jeroboam, Enou neye Israel maivei veo sü panou soulai, alia ne nou jüpa-a buyu teidei taosü nenou khasa-a hrülai.

³⁸ Nenou achi zütou toulouzü, ae avei chikhatao hinou hrütou louzü alia avei kilai David büa Enou kharochi peiyu veishi hai souloure toulouzü, Enou teisa neye salai peilai. Enou neye Israel maivei veo panou soulai ae nevei tounah maitao-a panou David hi Enou soupeiyu büa panou veo sü soukoute peilai.

³⁹ Daiolouzü Solomon vei mah vanou Enou David vei tyaonah maitao hi tudee peilai, ana süsü teisa donou laimoe.’ ”

⁴⁰ Süvanou Solomon nou Jeroboamye southa laitea tewe, ana puhnou Ejipt hi Veo Shishak hi tuho Solomon thaimo koute sühinou buloure.

Solomon Thaiyu

⁴¹ Solomon nou soupfüyu vah veishi, alia puhvei ratsütao hai Solomon vei Hrüko Larübvü hi rüthou khaitoue.

⁴² Puhnou Jerusalem hinou Israel mai hrülai pei hinou po raidai hai veo soue.

⁴³ Puh thaire, ae puhye David Nuhdu hinou daovu peie, alia puh nahpoutu Rehoboam nou puh thaosou vekou loue.