1 TIMOTHI 4 - SHEEYU BAIBEL (BSI)

Amada Dou-apeimaitao

¹ Rakonou dukhea-a paowe süolouzü naki teile hisü mai kamaisü puletao vei lü nasü thaowulai, alia madayu rako khemai chi züa puletao nou rashitao nou doupeiyu thaisü fütalai.

² Haibüa doupeiyu hai sourouyu hunou pochatheayu büa lekhetsü thaitayu avei khokho souyu madayu maitao nou paodouwe.

³ Sübüyu maitao nou sheenghi more ea touso kamai toumore donou nuwe. Ana touso sütao-a lülouyu ea achechena sülouyu puletaoye donou Ramai hi kalo paowu-a toure donou Ramai nou soupeie.

⁴ Ramai nou soupeiyu teiteisü veikhaiwe alia kalo paowu-a touyu thaisü hatalia toulou shiyu hae,

⁵ daiolouzü Ramai chipao ea veachi nanou sünaye soushee peire.

Khrista Jisu vei Kilai Avei

⁶ Doupeiyu haitao hai nenou thaihou jürai maitao hi peire toulouzü, ne sü Khrista Jisu vei kilai veili souloulai. Nenou teisanou thaifüa laiyu lüvei chipaotao ea cheche-a doupeiyutao vanou nelah nevei rakosü soudu palo.

⁷ Ana ramai hayu ea avoyu daomai kotao hinou tareilo. Rahrümai hinou taloure nelah douthou lichelo.

⁸ Daiolouzü pfüphao hilonou soukhoyu hisü muh daotu bue, ana rako hilonou soukhoyu hisü teitei hinou muh alaosou bue, daiolouzü sünanou chu ea thaikhai vei hrünaye donou ahri nasü apaopei khaitoua bue.

⁹ Paokhai touyu chipao hainasü cheche vuzüe ea teiteinou polou züdoue.

¹⁰ Ehnou te-a ea shamea-a vah soue, daiolouzü Ehnou Ehvei areih nasü hri-a buyu Ramai bah hi thoupei khaitoue. Puh hai mai hrülaiye khailu-apeio nasüe ea koulih soua lüloumaitao vei khailu-apeio süe.

¹¹ Chi haitaosü chikha peiyu noupu doupeikhaio.

¹² Maitaliye-a panou nenou nale-a buyu sü ngaophou moyu souwuso, ana nevei chipao hinou, zhaidou hinou, leshi hinou, rako hinou, lü hinou ea sheetouyu hrü hinou lüloumai alivei zhaisü soungaokhaio.

¹³ E vemo koutesü lüloumaime nghojühi sheeyu larübvü phouyu, ko paodouyu ea doupeiyu hinou nevei teile ea teyu sü peikhaio.

¹⁴ Tsümaitao nou ne pei hi bah lakhaipei-a rachipaola maitao nou rachi paola payuki hinou nehi peikhai touyu süolouzü nehi buyu rakovei sapeina nasü ngaophou moyu souwuso.

¹⁵ Soure vah haitao sü soua bukhaio ea shosho nou veipu kheyu nevei vahsü panou maikhemai hrülaiye ngaoloure donou sütaohi nelah nevei teilesü peikhaio.

¹⁶ Nelah neye ea nevei doupeiyu hisü zhutoulo. Vah sütaosü thaokhaimoa soua bukhaio, daiolouzü nenou sübüa soua bulouzü, nenou nelah neye ea nechi kei-a buyu maitaoye khailu loulai.