1 THESSALONIMAI 4 - SHEEYU BAIBEL (BSI)

Ramaiye Sousayu Hrü

¹ Akhai hinou, thaihou jürai khemai, nelenou kabüa hrüzüe ea kabüa Ramaiye sousalai touyu sü Eh hinou doulouyu büa ea süsü neletao nou soua buyu kua, süjünou koua soupu khaikhai loure donou Ehnou neleye Mapao Jisu zhih hinou khowe ea süpeiwe.

² Daiolouzü Ehnou nelehi Mapao Jisu hilonou dai dai chikha peisa touyu sü nelenou süwe.

³ Daiolouzü Ramai nou neleyenou sheeloua ea khulou souyu vah soukhaimoa buyu sü züpae.

⁴ Neletao mai ali linou kabüa sheeloua ea mainou tsükhou louvei zhaido hinou lah puhvei chapfümaiye koa hrülai touyu sü sülai.

⁵ Ana Ramaiye sümoyu tahrüh kukhe maitao büa ke-zhenou züpayu hraopayu vah souwu laimoe.

⁶ Südonou maitalinoua lah puhvei thaihou jüraihi süna vanou soula-pfüla-a soumahwu laimoe, süsü Ehnou raia nelehi paongaowe ea chihshoa neleye tukha-a paowe süolouzü sübüa souyumai hrülai pei hisü Mapao nou khüh phoulai.

⁷ Daiolouzü Ramai nou Eletaoye khulou soure donou kuloumoe, ana sheeyu hrü hrüre donou kuloue.

⁸ Südonou doupeiyu hainaye ngaophou moyu maita linou emaiye moa neletaoye puhvei Rako Mashi peiyu Ramai puhye ngaophoumoe.

⁹ Ana neletaoye donou maitaliye panou neletao hi thaihou jüraimaiye leshi loure vanou rüpeire matsü hae, daiolouzü neletao lah alinou liye kabüa leshi loulai touyu sü Ramai nou neletaoye doupeire.

¹⁰ Alia chechenou neletao nou Makedonia hi buyu thaihou jüraimai hrülaiye leshia bue. Ana thaihou jürai khemai, sübüa soupu khaikhai loure donou Ehnou neletaoye süpeiwe.

¹¹ Ehnou nelehi raia paodou peiyu büa, kaonayu hrü hrüloure te-a bulo, lah neletao nou soure vahsü soutoulo, alia lah neletao bahnou vah soulo.

¹² Sübülouzü vakouhi lüloumai taonou neletaoye tsükhou loulai, alia neletao vei tou-so donou maitali vahi-a lükhai laimoe.

Mapaowo nou Velaiyu

¹³ Thaihou jürai khemai, Enou neleye zhitayu khemaitao vanou acheche nasü panou sülounüwe, süolouzü areih hayu kukhe maitao büa neletaowo leveawuso.

¹⁴ Daiolouzü Eletao nou Jisu hai thailoua hrida shuloure tea louche, alia südonou Jisu ye louche-a zhitayu khemaitaoye sü puhye koa Ramai nou podalou khailai.

¹⁵ Daiolouzü Mapao vei chipao hinou Ehnou chi haisü neletao hi paongao-a bue, süolouzü Mapao veyu teitheki koute hria buyu Eletao nou zhitayu puletao jü raia talai moe.

¹⁶ Sükisü Mapao puhsü chikha peiyu pai-rao sünaye koa, alia rakivamai peichana vei pai naye ea Ramai vei bekho sünaye koa raki vanou takoulai. Alia sükisü Khrista hinou thaitayu khemai sütaonou raia hrishulai;

¹⁷ süshonou süphaki hria buyu Eletaoye sü ratei vanou Mapaoye koa teihao vahi paive dzüloulai. Alia sükua Eletao nou Mapaoye koa teisanou hrülai.

¹⁸ Südonou, chipao haitaonou neletao alinou liye le sousa-a bukhaio.