1 SAMUEL 9 - SHEEYU BAIBEL (BSI)

Saul nou Samuel ye Daoyu

¹ Benjamin khü hinou mai ali hai toungi sho-a nou ae zhih tashoa nou bue, puh zhih hai Kish toue. Puh hai Abiel nahpoutu-e, ae Zeror vei tyao-e. Puh hai Bekorah vei kihikha mai-e, ae Aphiah vei pfümounah-e.

² Puh hai nahpoutu ali bue, puh zhih sü Saul toue. Puh hai hüvei sho-e, ae Israel mai kukhe jünou puh pei hai kupua nou sha sho-e.

³ Saul puo Kish vei rheisüh kamai-a hatare, südonou Kish nou puh nahpoutu Saul hi paoe, “Ne kilai mai ali saloua rheisüh khesü phoutawo.”

⁴ Puhai nou deichiva buyu Ephraim maivei teidei sü tachopoa Shalishah teidei hi phouve-e, ana puhai nou rheisüh khesü ngaolou more. Südonou puhai nou Shaalim maivei teidei hia phouve-e, ana sühia ngaolou more. Süthaisü puhai nou Benjamin maivei teidei hia phouve-e, ana buh sühia phou hare.

⁵ Puhai nou Zuph tea kuyu teidei hi veyu phaki, Saul nou koa salaiyu puhvei kilai na hisü paoe, “Khe, ahai ki hi dakhai ve-a bailaide she, sükumo louzü apuo hai rheisühtao donou tsü chomoa ahai donou do-a levea bulaire.”

⁶ Ana kilai nanou puh hi paoe, “Chaoraio! Nuhdu hai hi Ramai vei mai ali bue, ae puhye mainou tsükhou sho-a bue, daiolouzü puhnou paoyu teitei hai cheche-a vepa baiwe. Ahai-a puh hi velai she, ae puhnou ahai hi rheisühtao daiki nou ngaoloulai touyu sü paopei shulai.”

⁷ Süthaisü Saul nou puhvei kilai na hi paoe, “Ahai nou mai hona hi ve louzü, daina nou puhye pove peilai? Daiolouzü ahai vei lekhabvü hisü raokhao ali-a hare, ae na kukhe-a halia ha-e. Ahai hi daie bue?”

⁸ Kilai nanou puh hi chila peie, “Ahi shahu ali buhie, Enou shahu süna hai puh hi peilouzü puhnou ahai hi rheisüh khesü daikinou ngaoloulai touyu sü paopei shulai.”

^9-11 Saul nou chila peie, “Sükulouzü veire, ahai talai khe.” Südonou puhai sü Ramai vei sheeyu mai nanou hrüyu nuhdu hisü talai tea tare. Puhai nou nuhdu hi taloure deichi ludu hi takheyu phaki, puhai nou loumainah taoli hai dzü pfülai tea talou daoloue. Puhai nou loumainahtao hi noue, “Vepare ngaoyu Ramai vei maina sü nuhdu hai hi buhomoe?” (Teile süphaki rachipaola peiyu maiye nou vepare ngaoyu mai tea kuwe, ae mai taralinoua Ramai hinou hataralia sünüa bulouzü “Vepare ngaoyu Ramai vei maina hi velai khe” tea paowe.)

^12-13 Loumainahtao nou haibüa chila peie, “Oungai, puhsü nuhdu hi bue. Puh sü nuhdu hi velai tea ne hai jünou raiphoua ta-a baihie. Ne hai nou thalasoua talouzü puhye thaingou lousü hie. Ne hainou nuhdu hi talou louzü puhye dao-a bailai. Puh hai zhou nou nuhdu hi ve hie, daiolouzü deichi hi buyu posheelabu hinou maikhe mainou posheelare donou souda-a bue. Tovai zholai tea kuve khaitouyu maitao hai puh vemo koute vailai moe, daiolouzü puh nou posheelare nasü ha peilai hie. Ne hainou thalasoua talouzü, puh hai deichi hi patamo jünou puhye daolou süe.”

¹⁴ Südonou puhai sü nuhdu hi tare donou thalasoua tare, ae puhai nou nuhdu hi talouyu phaki Samuel hai rathore donou deichi hi talai tea tapa ludu hinou daoloue.

¹⁵ Saul nou veyu jünou rai-a Mapao nou Samuel hi haibüa paopeie:

¹⁶ “Dosho Benjamin khü hinou mai ali hai chu teile phaki ne hi seive peilai; puhye panou avei Israel maitaoye khore donou theadzü napeio, ae puhnou avei maitaoye Philistin mai bah hinou vupa peilai, daiolouzü Enou avei maitao nou veahoyu sü ngaore, ae puletao nou krayu pai sü ahi chou khere.”

¹⁷ Samuel nou Saul ye zhingao louyu phaki, Mapao nou Samuel hi paoe, “Enou ne hi paoyu mai nasü hainare. Puhnou avei maitaoye khasa-a hrülai.”

¹⁸ Süthaisü Saul nou rokhubomü pe hinou la-a buyu Samuel hisü takouloua “Vepare ngaoyu mai nasü daiki nou bue?” tea noure.

¹⁹ Samuel nou chila peie, “Vepare ngaoyu mai nasü E baie. Ajünou rai-a rathoki hisü takhaio. Ne hai zhou Eye koa tovai zholai. Dosho shona ne hai nou nounüyu teitei sü Enou paongao peia panou ne haiye dakhai talai.

²⁰ Teithe asü jünou hatayu rheisühtao donou levea khaiso, daiolouzü sütao hai ngaoloure. Ana Israel maisou nou jüpa sho-a phoua buyu nasü thaoe? Sünasü ne-e, ne ae nevei puo kihikha maitao-e.”

²¹ Saul nou haibüa chila peie, “E hai Israel mai hrohinou taikayu Benjamin khü hinou baie, ae avei kihikha mai hai Benjamin khü hinou tainou kayu kihikha mai baie. Ne kabüa haibüyu chi sü ahi paowe?”

²² Süthaisü Samuel nou Saul ae puhvei kilai naye saloua kide dushoyu ali hi tovai vaizholai tea kuve khaitouyu mai shirou phali buyu nghoujü nou salou buloure.

²³ Samuel nou hakhoyu na hisü paoe, “Enou ne hi khaiku peikhai touwo tea peiyu sou nasü popa peio.”

²⁴ Südonou hakhoyu nanou sou phikao nasü poloua Saul nghoujü hi popa khaipeie, ae Samuel nou paoe, “Neye donou soudakhai touyu nasü ne nghoujü hi khaipei khaitoure, poloua toulo, daiolouzü neye panou haibüyu teile hinou toure donou souda khaitoue, tovai zholai tea kupoa veyu maitaoye koa toukhaio.” Südonou Saul nou süzhou hai Samuel ye koa vailoure.

²⁵ Puletao nou deichi hinou ratholoua nuhdu hi dakhai veyu phaki, Saul ye donou kiphao hinou zü soupeie,

²⁶ ae puhnou sühisü züe. Tei thepayu phaki Samuel nou Saul ye kipei hinou laloua paoe, “Tashu soudalo, Enou neye sapaota peilai.” Südonou Saul nou kushuloua puhnou Samuel ye koa tare.

Samuel nou Saul ye panou Veo Soure donou Theadzü Napeiyu

²⁷ Puletao nou nuhdu kai hi kouyu phaki Samuel nou Saul hi paoe, “Kilai naye nou ahai jünou rai-a tawo tea paopeio.” Kilai nanou puhai jünou raia tare, ae Samuel nou puh hi paopue, “Hai hinou chaokho laio, Enou ne hi Ramai nou daitea paowe touyu sü paongao peilai.”