1 SAMUEL 8 - SHEEYU BAIBEL (BSI)

Maikhe Mainou Veo Khoyu

¹ Samuel nou tsüpayu thai, puhnou puh nahpoutu maitaoye panou Israel maivei chiku-apeio mai soue.

² Nah tsüna zhih nou Joel toue, ae thaihou na zhih nou Abijah toue; puhai china ahai khinou Beersheba hinou chiku-apeio mai soue.

³ Ana puhai china hai puh puo nou tayu büa tamore; lah viloure ludu phoua maikhe mai hinou seihla poloua chilou khesü kaozü hinou chiku peimore.

⁴ Süthaisü Israel maiye süthai apei mai hrülai nou tave jüloua Samuel nou buyu Ramah hisü vere,

⁵ ae puletao nou haibüa puh hi paoe, “Zhukhaio, ne sü tsüloure, ae ne nahpoutu ahai sü nenou tayu büa tamore. Südonou tyahrü kukhe maitao büa Etao pei hinou khasa-a hrüre donou veo ali phoupeio.”

⁶ Puletao nou veo dopeio tea khoyu sü chouloua Samuel hai levea shore, südonou puhnou Mapao hi veachi paoe,

⁷ ae Mapao nou haibüa chila peie, “Maikhe mainou ne hi paoyu chi veishi keitou toulo. Daiolouzü puletao nou neye malai moe, ana Eye malai-a baie ae puletao nou Eye sü panou puletao pei hi veo souba-a baie.

⁸ Enou puletaoye Ejipt hinou sapa peiyu nou poa zhou koute hai puletao nou ahinou tarei poa rah kukhe taoye tho tare, ae puletao nou ahi souyu bütoua ne hia souwe.

⁹ Südonou puletao nou khoyu nasü kei peio, ana puletao pei hi veo mainou haibüa khasa-a hrülai touyu veishi hai soutaosoua paongaotou toupeio.”

¹⁰ Südonou Samuel nou puh hinou veo mai ali dopeio tea khoyu maitao hisü Mapao nou paoyu chipao teitei hai paongao peie.

¹¹ Puhnou haibüa paopeie, “Neletao pei hinou khasa-a hrüre veo nou haibüa neletaoye sa-a vah soulai: Puhnou neletao vei nahpoutu maitaoye panou puhvei reihmai soulai; kamai-a panou puhvei rheiluki pfüyu mai soulai, kamai-a panou rheiluki pfüa soureih soulai, ae kamai-a panou rheiluki nghoujü nou tutalai.

¹² Puhnou kamai-a panou mai theli peikhoyu mai, ae kamai-a panou mai raingou pei khoyu mai soulai. Puhnou neletao vei nahmai taoye sü sa-a puhvei dou hinou tatalai, kamaia sa-a chachilai, ae kamai-a sa-a panou puhvei reih basei sü soulai, ae kamaia panou puhvei rheiluki khesü soulai.

¹³ Puhnou neletao vei nahmai taoye sü saloua panou puhvei poukai nüvei sü soulai, kamaia panou likhao soulai, ae kamaia panou raokhao khaoyu mai soulai.

¹⁴ Puhnou neletao vei veikayu dou, darkha kipei ae oliv kipei khesü poloua puhvei peikho maitao hisü peilai.

¹⁵ Puhnou neletao vei thoudzü ae shinamara khesü zha kirou hinou zha ali hai poloua puhvei peikho maitao ae kilai maitao hisü peilai.

¹⁶ Puhnou neletao vei qila maitao, veikayu kikhaorü khesü saloua panou puhvei vah soulai.

¹⁷ Puhnou neletao vei kikhaorü hai zha kirou hinou zha ali hai poloulai, ae neletaoye sü panou puhvei qila sü soutawulai.

¹⁸ Sübüyu teile veyu phaki, neletao nou dokhai touyu veo donou veaho shoa raolai, ana süzhou sü Mapao nou neletao vei khoyu nasü kei pei laimoe.”

¹⁹ Ana maikhe mai hai Samuel vei chi sü pobare, ae puletao nou haibüa paoe, “Moe, Etao pei hi khasa-a hrüre veo mai ali jüpawe.

²⁰ Sübüa Etao-a tyahrü kukhe maitao büa Etao vei veo panou Etao pei hi khasa-a bure donou ae Etao nou soureih souyu phakia Etaoye süthaisa-a panou soulai.”

²¹ Samuel nou maikhe mainou chi paoyu veishi sü keiloua Mapao hi paopeie.

²² Ae Mapao nou Samuel hi paoe, “Puletao nou jüpayu nasü soupeio, ae veo mai ali sü dopeio.” Süthaisü Samuel nou Israel maitao hi paoe, “Neletao lahkuku ki hisü dakhai tawo.”