1 SAMUEL 4 - SHEEYU BAIBEL (BSI)

Vo Sübvü Shaolouyu

¹ Teile süphaki, Philistin mainou Israel maiye reih soulai tea bure, südonou Israel mai-a reih soure donou Ebenezer hi taho fühao souloua bure, ae Philistin mainou Aphek touyu hinou fühao sou bue.

² Philistin mainou meme souloua reih hukoue, ae reih sü soutaosou soupoa kou Israel mai jünou reih veiloure. Israel maiye reihbu hinou mai thedai phali hai southawure.

³ Thaimoa tupa louyu reihmaitao nou puletao vei fühao hi veyu phaki, Israel maivei süthai-apei maitao nou haibüa paoe, “Daisounou Mapao hai zhou Philistin maiye panou Etao jünou reih veilousa? She, Etao taho Shiloh hinou Mapao vei Vo Sübvü nasü polou laikhe, sükulouzü Puhnou Etaoye koa satapei shulai, ae Etaoye ngaobayu mai bah hinou Etaoye vupa peishulai.”

⁴ Südonou puletao nou Shiloh hi maiye seiho panou shouh pfüyu cherubim khaona ahai kohinou buyu Mapao vei Vo Sübvü nasü pove-e, ae Eli nahpoutu ahai— Hophni ae Phinehas puhai nou Vo Sübvü nasü koa pove-e.

⁵ Puletao nou Vo Sübvü nasü Israel mainou fühao soua buyu hi pove louyu phaki, Israel mai hrülai nou shusoua rayu hai dei koute-a lüre.

⁶ Shusoua rayu pai sü Philistin mainou chou louyu phaki, puletao nou “Hebrew maivei fühao hinou shusoua rayu sü daivanoue” tea nou-e. Puletao nou Mapao vei Vo Sübvü nasü Hebrew maivei fühao hi pove khailoure touyu ko sülou khaie,

⁷ Philistin maitao hai ngaopi shore, ae puletao nou haibüa paoe, “Ramai ali hai Israel mainou buyu fühao hisü vedeshe. Etao sü chuo chere! Haibüyu hai raichokio vepakhai toumo hie.

⁸ Etaoye khouko pfüshoyu rah haitao hinou thaonou vupa peilaige? Ramai süna nou Ejipt maiye sü radeiki hinou southakhai toupeie.

⁹ Oh Philistin maitaore, khuveilo! Poutu khekai sou soulo, soutaosoua reih sü soukhaio, sükumo louzü Hebrew maitao nou Etao vei qila soua buyu büa Etao-a puletao vei qila sü soua bailai. Südonou soutaosoua reih soulo.”

¹⁰ Südonou Philistin mainou reih sü soutaosoua soupoa kou Israel mai jünou reih veiloure, ae Israel mai hai lah puletao ki hisü tudakhai tare. Reihbu sühinou mai alao sou thaire; Israel maivei reihmai theshirou hai southawure.

¹¹ Ramai vei Vo Sübvü nasü puletao nou shaoloure, ae Eli nahpoutu ahai, Hophni ae Phinehas puhai-a southawure.

Eli Thaiyu

¹² Süzhou teithe hinou Benjamin khü hinou maipou ali hai reihbu hinou Shiloh hisü tupoa vete-e. Puhnou leveayu sü soungao laitea puhvei sabanü khesü paiphawure, ae puh pei sü konai naloure.

¹³ Puhnou tupoa veyu phaki, Eli hai ludupe hinou zhipoa nou bue, daiolouzü Vo Sübvü donou puhsü levea nou dai-e vepa laisa tea tsüchoa bue. Maipou süna nou nuhdu hi tuve ko khesü paopei khaie, Israel mai hrülai hai shusoua kradu krare.

¹⁴ Shusoua krayu pai sü Eli nou choulou khaie, puhnou noue, “Shusoua rayu pai sü dai vanoue?” Süthaisü maipou nanou tuve Eli hi ko khesü paopeie.

¹⁵ (Süphaki Eli hai po raiküacha pare, ae puh nghithou hai ngaomo tare.)

¹⁶ Maipou nanou Eli hi paoe, “E reih züyu buh hinou tupaloua zhou teithe nou hai hi vewe.” Eli nou puh hi noue, “Anahna daipha soure?”

¹⁷ Kopomai nanou haibüa chila peie, “Israel mai sü veilouhoa Philistin mai nghoujü nou tutare, ae mai alao southawure. Ne nahpoutu Hophni ae Phinehas puhai-a thaire, alia Ramai vei Vo Sübvü nasüa mainou shaoloure.”

¹⁸ Puhnou Ramai vei Vo Sübvü nasü mainou shaopoa tare touyu ko choulou khaie, Eli nou robomü hinou chobua buyu buh hinou thailova lalou puh ngurao sheshawua thaire, daiolouzü puh hai tsüsho pare ae hrütao-a pfüzho hai-a sühsho loure. Puhnou Israel maivei süthai-apeio hai po raidai soupeie.

Meamaipfü soua buyu Phinehas Chapfü Thaiyu

¹⁹ Eli moupai, Phinehas chapfü hai napfüa nayu teile nghitei-a bure. Honapai nou Ramai vei Vo Sübvü nasü mainou shaopoa tareshe, ae puh paoh alia puh khapu-a thaire touyu ko choulouyu phaki, honapai hai khya soupaloua nah naloure.

²⁰ Ae honapai hai shalou tayu phaki, honapaiye sa-a nah napeiyu maitao nou puh hi paoe, “Khuveilo, daiolouzü ne nahpoutu ali naloure.” Ana honapai nou chila pei more, moa le-a pei more.

²¹ Honapai nou nahpoutu zhih sü Ichabod tea sapeie, sünavei qo nou “Ramai vei khouko ava hai Israel mai hinou tare” touwe. Daiolouzü Ramai vei Vo Sübvü nasü mainou shaopoa tare, ae puh paoh alia puh khapu sü thaitare.

²² Honapai nou paoe, “Ramai vei khouko ava nasü Israel mai hinou tare, daiolouzü Vo Sübvü nasü mainou shaopoa tare.”