1 SAMUEL 31 - SHEEYU BAIBEL (BSI)

Saul ae Puhvei Nahpoututao Thaiyu

¹ Philistin mainou Israel maiye Gilboa Deichi hinou reih soua Israel maiye alao southawure, ae Israel mai hai Saul veo ae puh nahpoutu maitao-a loua nou tutare.

² Ana Philistin mainou thaihu poa kou Saul nahpoutu Jonathan, Abinadad, ae Malkhishua puletaoye sü nüloua southawure.

³ Reih sü shishoa nou souloure, ae Saul ye sü ngaobamai vei voulouthou nou kapei-a zhishi showure.

⁴ Südonou Saul nou puhvei reihbasei pfüa laiyu nahlepuna hisü paoe, “Nevei khoche popaloua Eye southa peio, sükulouzü Ramai ye sümoyu Philistin mainou Eye konüa nou southa laimoe.” Ana nahlepuna nou ngaopi sholoua southapei bare. Südonou Saul nou lahvei khoche sü paipa loua lahye khethawure.

⁵ Nahlepuna sü nou Saul thaiyu ngaolou khaie, puh-a lahvei khoche hinou hrüthawua Saul ye koa thaire.

⁶ Sübüa Saul sü thaire, ae puh nahpoutu asü, puhvei reihna pfüyu nahle maina, ae puhvei maitao hai süzhou nou thakhai toure.

⁷ Jezreel Deikho hinou holo vatha buyu Israel maitao, ae Jordan Rei hinou teinghi palova buyu Israel maitao nou Israel maivei reihmaitao sü tutare, ae Saul alia puhvei nahpoutu maitao hai thaire she touyu ko choulou khaie, puletao hai lahvei nuh teidei sü thaokhaiwua tutare. Süthaisü Philistin mainou velou nuh teidei sütao hinou buloure.

⁸ Soureih soucheyu thaisü, Philistin maitao nou taho thaiphao khesü zhutayu phaki, puletao nou Saul alia puhvei nahpoutu mai asü vei thaiphao hai Gilboa Deichi hinou bua ngaoloure.

⁹ Puletao nou Saul vei pei sü valoure, ae puhvei reihna khesü poloua Philistin maivei teidei teitei hisü kopomaiye panou ko aveih nasü puletao vei basharatao hi ae puletao vei maitao hi paota-e.

¹⁰ Süthaisü puletao nou Saul vei reihna khesü Ashtaroth rathoki hi polou khaiwure, ae puhvei pfüphao hai Beth Shan nuhdu kivo va hi veathou khaiwure.

¹¹ Gilead teidei hi buyu Jabesh maitao nou Philistin mainou Saul hi soupeiyu ko khesü choulou khaie,

¹² khuvei kayu maitao nou Beth Shan nuhdu hisü khei nou talai tea tare. Puletao nou Saul vei pfüphao, ae puh nahpoutu maitao vei thaiphao hai kivo vanou haokouloua Jabesh hi podakhai ve mei deipeie.

¹³ Süthaisü puletao nou rao khesü poloua Jabesh nuhdu hi buyu tamarisk süübe phi hinou poa daovu peie, ae puletao nou teithe anai hai lüh-a dopfüe.