1 SAMUEL 29 - SHEEYU BAIBEL (BSI)

Philistin Mainou David ye Sabayu

¹ Philistin mainou puletao vei reihmai hrülai hai Aphek hinou save jüloure, ae Israel maitao nou Jezreel Deikho hi dzüla payu buh hinou vejüloua fühao soua buloure.

² Philistin maivei veo mai angou taonou mai kaih-kaih ae mai theli-li nou reihmai me-me souloua sa-a takouyu phaki, David ae puhvei maitao-a Veo Achish ye koa thailova nou takoue.

³ Philistin maivei reihmai peikhowo nou puletaoye sü ngaolou khaie, “Hebrew mai haitao hainou dai-e souwe,” tea nouloure. Achish nou reihmai peikhowo hi chila peie, “Mai haina hai Israel maivei veo, Saul vei reihmai peikhowo David touwe. Puhnou Eye koa teile taoli bure. Puhnou ahi velou louyu nou poa zhou koute hai Enou puh hi mah ali-a ngaomoe.”

⁴ Ana Philistin maivei reihmaitao peikhowo nou rarou loua Achish hi paoe, “Mai hainaye puhnou buyu nuh hisü seidakhai tawo. Etao nou soureih soutayu buh hisü puhye koa talou shi-e, Etao nou reih soutayu phaki, puh hai Etao pei hi soureih souta louvei-e. Puhye donou Etao maiye southawua puhvei paopu jüpa soulouyua veipu himovu?

⁵ Mai haina hai David mowu? Naotu maitao nou mai hainaye haibüa puletao nou chopoa lou soumowu, ‘Saul nou mai the-the southaloue, ana David nou mai thekirou-rou southaloue!’ ”

⁶ Achish nou David ye kuloua puh hi paoe, “Hriyu Israel maivei Ramai zhih hinou ne hai ahi chilee cheche-a baie tea Enou chaachou souwe, ae Eye koa soureih soutayu hai Ewo louzü neye jüpa-a baie. Nenou ahi velouyu nou poa zhou koute hai nevei mah ali-a Enou ngaomoe. Ana veo kukhe maitao nou neye koa soureih soutayu hai jüpamo loure.

⁷ Südonou ne kaona-a lah ki hi dakhai ta-a baio, ae puletao nou jüpa moyu vah haso ali-a soupeiso.”

⁸ David nou chila peie, “Apaopuwo, Enou dai mah souwure? Enou ne hi ve louyu nou poa zhou koute hai kaomoyu vah ashi ali-a souyu ngaomoe tea nenou paoyu thaifüa, daisounou apuo veowo, neye koa nevei ngaobayu maitaoye taho soureih souyu hisü Eye panou tabawe?”

⁹ Achish nou David hi haibüa chila peie, “Ewo louzü neye Ramai vei rakivamai ali büa chilee chechewe tea powe, ana veo kukhe maitao nou neye koa soureih soutalai moe tea baloure.

¹⁰ Südonou David, dosho shona hai Saul ye thaokhaiwua ahi tuveyu nevei mai hrülai hai kushu zhiloua teithe pare toulouzü buh hai hinou dakhai ta-a baio.”

¹¹ Südonou thainesho shona nou David ae puhvei maitao hai Philistin maiye thaowua dakhai tare, ae Philistin maitao hai Jezreel hisü tare.