1 SAMUEL 26 - SHEEYU BAIBEL (BSI)

David nou Saul vei Hrirai Pomoa Khailupa Peipuyu

¹ Süthaisü Ziph hi kamai-a nou Gibeah hi ho Saul hisü haibüa paoe, “David hai Jeshimon palova buyu Hakilah Deichi hinou tutsüa nou bue.”

² Südonou Saul nou Israel mai hrohinou veikayu reihmai thesü hai doloua saho Ziph maivei vaohro hinou David ye phouta-e,

³ ae puletao nou Hakilah Deichi vei ludupe hinou fühao soua bue. Süphaki David hai vaohro hinou bue, ae puhnou Saul hai puhye phoua laishe touyu ko choulou khaie,

⁴ puhnou reihkeih pomaiye seiho panou zhuyu phaki, Saul-a sühisü lai-a nou ngaoloure.

⁵ Süthaisü David nou taho Saul ae puhvei reihmai peikhowo Ner nahpoutu Abner buh katsü hinou züa busa touyu hai zhuloure. Saul hai fühao toutsü hinou puhvei maitao nou sühao poa nou züa bue.

⁶ Süthaisü David nou Hit puona Ahimelek ae Zeruiah nahpoutu Joab thaihou Abishai hi noue, “Ne hai thaonou Eye koa Saul vei fühao hisü talaige?” “Enou talai,” tea Abishai nou chila peie.

⁷ Südonou David ae Abishai nou Saul vei fühao hisü süzhou khei nou velou loure. Puhai nou Saul hai fühao toutsü hinou puhvei heung sü puh pei hinou deiphi shola khaitoua ae Abner ae puhvei reihmaitao nou puhye sühao poa zhiyu sü ve ngaoe.

⁸ Abishai nou David hi paoe, “Neye ngaobayu mai nasü Ramai nou zhoukhei hai ne bah hi thoupei khaitoure. Südonou chuo Enou puhvei heung sü poloua puhye sü deiphi hi phyamu khaipeilai, Enou puhye sü bakha ali khei hinou phyathalou süe.”

⁹ Ana David nou puh hi paoe, “Ne puhye southa laimoe; daiolouzü Mapao nou theadzü napeikhai toua veo panou soure donou dopa louyu puhye maitaralia southayu maina sü puhnou tudee-a bailai.”

¹⁰ David nou paopue, “Enou süwe, süolouzü hria buyu Mapao nou Saul ye sü southa peia bailai. Puhvei thaiyu teile velouzü puh hai mai büa thai-a bailai, moyuma soureih souyu hinou thai-a bailai.

¹¹ Mapao nou veo soure donou dopapei khaitouyu mai aliye Enou southare donou te-a buyu thaio, Ramai nghoujü nou nou-a noue. Ahai puhvei heung ae dzübvü nasü poloua ta-a bailai she.”

¹² David nou Saul pei hinou khaitouyu heung ae dzübvü nasü poloua puhai sü tare. Mai ali-a puhai ye ngaomoe, moyuma süa sümoe, daiolouzü Mapao nou puletao mai hrülaiye sü baizhitei peire.

¹³ Süthaisü David nou deichi peiva taopa louyu thai,

¹⁴ puhnou shusoua Saul vei reihmaitao hi ae Abner hisü “Abner, ne Enou kuyu apai chouho chou moe?” tea shapaoe. “Thaonou shusoua ra-a veo ye soukaiwe?” tea Abner nou noue.

¹⁵ David nou chila peie, “Abner, ne hai poutu khekhai ali mowu? Israel mai hrohi thaonou neye raiyu buge? Sükulouzü ne daisou nou nevei paopu, veoye sü khotou toulou moe? Chubü hinou kamai-a nou nevei paopu ye sü southalai tea taloue.

¹⁶ Abner, nenou souzü vah nasü soulou more. Hriyu Mapao zhih hinou E chaachou souwe, süolouzü neletao mai hrülai nou thaiyu kao-e, daiolouzü Mapao nou veo dopeikhai touyu neletao vei paopuye sü neletao nou vulou more. Zhukhaio, veo vei heung sü daiki bue? Veo pei hinou khaitouyu dzübvü nasü daiki bue?”

¹⁷ Saul nou David vei pai sü süloua noue, “Anahpoutu David, süsü nevei paimowu?” David nou chila pie, “Apaopuwo, Ouvai Enou-e.”

¹⁸ David nou chila peipue, “Apaopuwo, ne daisounou ne kilai Eye thaihuwe? Enou ne hi dai mah soukhai toue?

¹⁹ Apuo veowo, Enou paoyu achi kei peio. Nenou Eye ngaoba-a hraiyu hai Mapao nou soua baie toulouzü, posheela peiyu nasü puhye panou polo; ana haina hai mai nou soua baie toulouzü, Mapao vei chaa nasü panou puletao pei hi ve theo. Daiolouzü puletao nou Eye sü Mapao vei teidei hinou hulaiwua Eye panou vakou maivei rah sü thotare donou soua baie.

²⁰ Eye panou Mapao hinou douta-a vakou maivei teidei hinou southa peiso. Daisounou Israel maivei veo nou seihei touli büyu Eye sü southalai tea vewe? Daisounou Eye raohou ali büa thaihu-a laiwe?”

²¹ Saul nou David hi chila peie, “Anahpoutu David, dakhai ve-a baio, Enou mahre. Enou neye sü soushipu khailai more, daiolouzü zhoukhei-a nenou avei hrirai sü khailupa peie. Enou soupfüyu vah khesü kaomo shoa nou souwure.”

²² David nou chila peie, “Apuo veowo, nevei heung sü hai hi bue, nevei mai aliye panou tapa polo.

²³ Chili checheyu maiye sü Mapao nou buu peilai. Zhou teithe Mapao nou neye abah hi thoupeie, ana Mapao nou veo soupeikhai touyu neye sü Enou soushi moe.

²⁴ Zhou teithe Enou nevei hrirai khailupa peiyu büa Mapao ye panou Eye veahoyu teitei hinou khailupa peiyu sü soulou theo.”

²⁵ Saul nou David hi paoe, “Ramai panou neye shiha peiyu sü soulou theo! Nenou soupfüyu vah teitei sü panou vete louyu sü soulou theo.” Süthaisü David nou ludu hisü tare, ae Saul nou lah ki hi dakhai tare.