1 SAMUEL 24 - SHEEYU BAIBEL (BSI)

David nou Saul vei Hrirai Pomoa Khailupa Peiyu

¹ Saul nou Philistin maiye reih souloua dakhai veyu phaki, David hai Engedi maivei vaohro hinou bushe tea mainou Saul hi paopeie.

² Süthaisü Saul nou Israel maitao hrohinou veikayu reihmai thesü saloua David ae puhvei maitaoye Renghitu vei Chuhdu tea kuyu deize hisü phoutare.

³ Saul nou ludupe hinou buyu chuhlya ali, nghitu ae zhaotu khaiyu buh nghia buyu hisü solai tea talou tare. Chuhlya süna khevai nou David ae puhvei maitao hai tutsüa nou bue.

⁴ David vei maitao nou puh hi paoe, “Mapao nou neye ngaobayu maitao hai ne bah hi thoupeia neye panou puletao hi sounü souloulai tea paopei khaitoue. Zhou hai nevei teilere!” David nou chohcho paloua Saul vei zao sü puhye panou sükhai toumoa vade loure.

⁵ Ana David vei tsü sü vamore,

⁶ ae puhnou puhvei maitao hi paoe, “Mapao nou theadzü napei khaitoua panou Israel maivei veo souyu avei paopu pei hisü Eye panou abah khakhaiso! Puh hai Mapao nou dopa peiyu veo mai alie, südonou puh pei hi hashi ali-a Enou soulai moe!”

⁷ Sübüa David nou puhvei maitao hi paoloua panou Saul ye dumore. Saul nou kushuloua chuhlya nasü thaowua talaire tea tapare.

⁸ Süthaisü David nou puh thaifü paloua puhye “Apaopuwo!” tea kuwe. Saul nou reidakhai ve zhu-e, ae David nou puhye tsükhoua deiphi hi pei pfüa nakou khurü-e,

⁹ ae puhnou Saul hi haibüa paoe, “Ne daisounou mainou da-a Enou neye southalai touwe tea paopeiyu sü louchewe?

¹⁰ Mapao nou neye chuhlya qulu hai hinou abah hi thou peiyu sü ne lah neye zhukhaio. Avei maitao nou neye southa-o tea ahi paowe, ana Enou neye southa ba-a baire, daiolouzü ne hai Mapao nou dopa peikhai touyu veo mai ali-e.

¹¹ Apuo veo, Enou nevei zao hinou vadepa khaitouyu nahai abah hinou poa bue, zhukhaio! Enou neye southalai touyu thaio southa lousüe, ana southa moa baie. E hai neye soushire donou moa neye khaitya-a vah ashi soulai toumoe touyu neye panou süloure donou haibüa soupeiwe. Ana newo louzü Enou vah ashi halia soumoyuma Eye southare donou phoua nou bue.

¹² Ahai thaonou mahsa Mapao ye panou chiku peiyu sü southeo! Nenou ahi soupfüyu haso khesü Mapao panou neye tudee peiyu sü southeo, daiolouzü Enou neye halia soushi laimoe.

¹³ Haibüa paokhai touyu tsüchi ali bue, ‘Mai ashi mainou vah ashi khesü soua baiwe.’ Südonou ne hi vah ashi ali-a Enou soulai moe.

¹⁴ Zhukhaio, Israel maivei veo nou dai-e southare donou te-a budesa! Puhnou dai-e thaitesa zhukhaio! Thaiyu sei ali ho, seihrai sarou!

¹⁵ Ahai thaonou mahwe touyu sü Mapao ye panou chiku peiyu sü soupeio. Kaozü nasü zhuloua Eye vupeio, ae ne bah hinou Eye panou vupa peio.”

¹⁶ David nou chi paocheyu thai, Saul nou “Süsü anahpoutu David, newu?” tea pao-a puh sü shusoua krare.

¹⁷ Süthaisü Saul nou David hi paoe, “Nenou kao-a baie, ae Enou mah baie. Newo louzü ahi haveih khaikho soua baie, ana Enou ne hi vah ashi sü souwure.

¹⁸ Zhou teithe nenou ahi haveih soungao peie, daiolouzü Mapao nou Eye ne bah hi thoupeia buyuma nenou Eye southa moa phapeie.

¹⁹ Daiolouzü mai ali nou puhye ngaobayu maiye nülouyu thai, puhye soushi peimoa phapeiyu zhaivu? Zhou teithe nenou ahi soupeiyu vah haso donou Mapao ye panou neye shiha peitheo.

²⁰ Chuo Enou süloure, süolouzü ne hai Israel maivei veo souvu zülai, ae Israel maivei vedei hai ne phao hinou duso palai.

²¹ Ana avei kihikhamai zhih panou hamore donou avei tyaosholea maitao hai nenou souhalai moe touyu hai Mapao vei zhih hinou ahi chaachou soupeio.”

²² David nou sübüa soupeilai tea Saul hi chaachou soupeie. Süthaisü Saul hai lah ki hi dakhai tare, alia David ae puhvei maitao hai puletao nou tutsüa buyu buh hisü tare.