1 SAMUEL 23 - SHEEYU BAIBEL (BSI)

David nou Keilah Nuhdu Vupapeiyu

¹ Philistin mainou Keilah nuhdu hi reih huloure ae puletao vei laophao hi buyu shinamara khesü vao pfüa budeshe touyu ko hai David nou chouloure.

² Südonou puhnou Mapao hi noue, “E taho Philistin maiye reih souyu veishi-e?” Mapao nou haibüa chila peie, “Taho reih soukhaio, ae Keilah maiye vupa peio.”

³ Ana David vei maitao nou puh hi paoe, “Etao hai chua Judah teidei hai hinou ngaopi shoa nou bue; süpeinou Etao nou Keilah nuh hi taho Philistin maiye soureih soulouzü veapu shulai!”

⁴ Südonou David nou Mapao hi noupue, ae Mapao nou puh hi paoe, “Taho Keilah hinou Philistin maiye reih soukhaio, Enou neye veilouyu sü peilai.”

⁵ Südonou David nou puhvei maitaoye saloua Keilah hinou taho Philistin maiye reih soure; puletao nou mai alao southaloue, ae puletao vei kikhaorüa taoli poloue. Sübüa David nou Keilah nuhdu nasü vupapeie.

⁶ Ahimelek nahpoutu Abiathar nou turei paloua Keilah nuhdu David nou buyu hi tuveyu phaki, puhnou ephod poloua nou ve-e.

⁷ David hai Keilah nuhdu hi bushe tea Saul hi paongao peiyu phaki, puhnou haibüa paoe, “Ramai nou puhye abah hi thoupeiwure, daiolouzü David hai lah thailai tea kaopo pohao khaitouyu nuhdu khevai sü velou bua baie.”

⁸ Südonou Saul nou Keilah nuhdu hi taho David ae puhvei maitaoye nüloure donou puhvei reihmaitaoye sü kuloua tare.

⁹ Saul nou puhye soushire donou souda-a bure touyu sülou khaie, David nou Abiathar hi paoe, “Ephod nasü hai hi pokou.”

¹⁰ Süthaisü David nou paoe, “Israel maivei Ramai Mapaowo, Saul nou tave nuhdu haina sü nevei kilai Eye donou soushilai tea souda-a bure touyu Enou choure.

¹¹ Keilah nuhdu hai hi buyu maitao nou Eye Saul bah hi thoupeia bailaiwu? Enou chouyu büa Saul nou nuhdu hai hi velaivu? Israel maivei Ramai Mapaowo, Eye chila peio tea ne hinou khowe!” Mapao nou chila peie, “Saul nou nuhdu hai hi velai.”

¹² “Ae Keilah nuhdu hai hi hrüa buyu maitao nou avei maitao ae Eye Saul bah hi thoupeia bailaiwu?” tea David nou noupue. “Puletao nou nevei maitao ae neye sü Saul bah hi thoupeia bailai,” tea Mapao nou chila peie.

¹³ Südonou David ae puhvei maitao, mai kaihrou phali hai thashoa nou Keilah nuhdu nasü thaokhaiwua tutare. David nou Keilah nuhdu sü thaokhaiwua tutare touyu ko hai Saul nou choulou khaie, puhnou reih huvelai touyu sü baire.

David nou Deichiva Nuhtao hi Buyu

¹⁴ David nou Ziph maivei vaohro nghia buyu deichiva nuh teideitao hisü nou tutsüa nou bue. Saul nou puhye sü teithetsü phoua laiwe, ana Ramai nou David ye sü puh bah hi thoupei moe.

¹⁵ Saul nou puhye southalai tea phouwe touyu hai David nou süwe. Südonou David hai Ziph maivei vaobvü nghia buyu Horesh hinou bue.

¹⁶ Jonathan nou David ye buh sühinou ve dao-a Ramai zhih hinou puh le sü souduso peie.

¹⁷ Puhnou David hi paoe, “Ngaopiso! Apuo Saul nou neye hasou kilia soushi louhoe. Teitheli nenou Israel mai pei hi veo soulai, ae Enou ne thaisü chalai touyu hai puhnou süwe.”

¹⁸ Ae puhai nou sapokha soure donou Mapao zhih hinou vo ali souloue. Süthaisü David nou Horesh hi chaore ae Jonathan hai lah ki hi dakhai tare.

¹⁹ Süthaisü Ziph hi kamai-a nou Gibeah hi ve Saul hi paoe, “David hai Etao vei teidei Jeshim khelova buyu Hikilah Deichi hi buyu Horesh nuh hinou bue.

²⁰ Oh puo veo, nenou puhye nülou nüshoe touyu Etao nou süwe, südonou nenou Etao teidei hi ve louzü, Etao nou neye koa puhye nüpeilai.”

²¹ Saul nou chila peie, “Neletao nou Eye leshi-a nou haibüa soupeiyu hai Mapao ye panou shiha peiyu sü soulou theo.

²² Taho puhnou buh daikinou bue, ae puhye thaonou ngao-e touyu khesü sütou louraio, daiolouzü puh hai kaishoe touyu Enou süwe.

²³ Puhnou buh daikinou tutsüa bue touyu hai soutaosoua zhuloua ahi dakhai ve paopeio. Süthaisü puhnou tutsüa buyu buh hisü E-a neletaoye koa satalai. Puhye nüloumo koute Judah teidei teitei hi-a phoutayuma phoutalai.”

²⁴ Südonou puletao hai Saul jünou rai-a Ziph hisü dakhai tare. David alia puhvei maitao hai Jeshimon hinou khelova buyu Arabah hi Maon vaohro hinou tutsüa bue.

²⁵ Saul ae puhvei maitao nou David ye phoutare, ana David nou süloure, südonou puhnou Maon vaohro hinou buyu chuhlyatao hinou ve buloure. Ko süsü Saul nou süloua David ye phouta-e.

²⁶ Saul ae puhvei maitao nou deichi polova bue alia David ae puhvei maitao nou deichi alilo vatha nou bue. David nou Saul ae puhvei maitao hinou thashoa tutalai tea bure, daiolouzü Saul ae puhvei maitao nou David ae puhvei maitaoye nüloure nghitei-a bure.

²⁷ Sükuyu teilebü hinou kopomai ali nou tave Saul hisü haibüa paoe, “Philistin mainou nevei nuh teidei hisü soureih souloure, thashoa nou dakhai ve-a baio.”

²⁸ Südonou Saul nou David ye thaihu tapumoa dakhai ve Philistin maiye reih soutare. Südonou buh sünasü Dadeku peiyu Deichi tea kuwe.

²⁹ David nou buh sünasü thaokhaiwua Engedi teidei hi ho tutsüa butare.