1 SAMUEL 22 - SHEEYU BAIBEL (BSI)

Napao Maitaoye Southayu

¹ David nou Gath nuhdu sü thaowua Adullam nuhdu nghia buyu chuhlya hi tuve bure. David nou buh sühi tuve bure touyu ko hai puh thaihou jürai maitao ae puhvei kihikha maitao nou choulouyu phaki, puletao-a puh hi tuve butare.

² Mainou souvea souchoroyu maitao, maivei paozho pfüyu maitao, ae levamoyu alia khamoyu mai kaihdai phali hai puh hi ve bure, ae puhnou puletao vei süthai-apeio sü soure.

³ David nou buh sühinou tapoa Moab maivei teidei Mizpah hisü veloua Moab maivei veo hi haibüa paoe, “Ramai nou Eye panou dai soulai touyu süloumo koute, zhuvea apfüpuoye panou ne hinou buwo.”

⁴ Südonou David nou puh pfüpuoye sü Moab maivei veo hi khaipeiwure, sübüa puletao hai David nou tutsüa buyu teile koute hai sühinou bue.

⁵ Süthaisü rachipaolawo Gad nou tave David hi haibüa paoe, “Buh hai hi bupu khaiso; thashoa nou Judah maivei teidei hi hotawo.” Südonou David nou buh sünasü thaokhaiwua Hereth vaobvü hi ho butare.

⁶ Chuo David ae puhye salaiyu maitao hai daikinou bue touyu süloure tea Saul hi mainou ve paopeie. Teitheli Saul nou Gibeah hinou tamarisk tea kuyu süübe phi nou heung poa nou bue, ae puhvei peikho maitao nou puhye sühao poa nou bue.

⁷ Saul nou puhvei maitao hi paoe, “Benjamin hi maitaore, achi keilo! David nou neletaoye dou ae kipei khesü peilou sü tea neletao tsü chovu, ae neletaoye panou puhvei peikhomai soushulai tea neletao tsüchovu?

⁸ Sübüa soupei shulai touyu donou neletao hai ahi do ashi souwu? Anahpoutu nou David ye koa chavei lathao-a hrüre donou chaachou soukhai toue touyu hai-a neletao mailia ahi paongao moe. Neletao hai maili noua Eye donou tea tsücho peimoe, moyuma David nou Eye southalai tea da-a bue, ae anahpoutu-a süsü panou sounüa bubaie touyu hai mailia ahi paongao peimoe.”

⁹ Saul vei peikho maitaoye koa nou la-a buyu Doeg nou puh hi paoe, “David nou Nob nuh hi napao soua buyu Ahitub nahpoutu Ahimelek hi veyu Enou ngao-e.

¹⁰ Ahimelek nou Mapao hinou David ye panou daisoulai touyu hai noupeiwe, ae süthaisü puhnou David ye touso alia Philistin puona Goliath vei khoche hai peie.”

¹¹ Südonou Veo Saul nou napao Ahimelek ae puhvei kityarai mai hrülai, ae Nob nuhdu hinou buyu napao mai hrülai hai hi ve-wo tea lüho kutare; ae puletao mai hrülai hai veo hisü vere.

¹² Saul nou Ahimelek hi paoe, “Ahimelek, Enou paoyu achi keilo!” “Apaopuwo, nevei kuvah soure donou E hai hi bue,” tea Ahimelek nou chila peie.

¹³ Saul nou puh hi noue, “David ne hai daisounou ahi shodo ashi souwe? Ne daisounou David ye touso ae khoche sü peiwe, alia puhye donou Ramai hinou daisoulai touyu sü noupeiwe? Chuo puhnou Eye duloure, ae Eye southare donou da-a buloure.”

¹⁴ Süthaisü Ahimelek nou veo hi chila peie, “Nevei peikho maitao hrohinou David hai mainou louchelou veikayu nasü mowu? Puh hai nevei tyao baie, neye reihkhao souyu maitao pei hi peikhowo, ae nevei kihikha maitao nou tsükhou kayu maina mowu?

¹⁵ Ovai, Enou puhye donou Ramai hinou daisoulai touyu hai noupeie, ana raichokia puhye donou noupeiwe, haina nou avu raikha namoe. Puhnou neye soushire donou do ashi souyu hai nasü zhuvea apei hi moyuma avei kihikhamai pei hi paodu peiso. Haibüa puhnou shodo ashi souwe touyu hai haliro Enou sümoe.”

¹⁶ Veo nou paoe, “Ahimelek, ne alia nevei kityarai mai hrülai nou thaivu zülai.”

¹⁷ Süthaisü veo nou puh pehao hinou la-a buyu puhvei reihmaitao hisü paoe, “Mapao vei napao maitaoye sü southawo! Puletao hai David ye koa do zholoua nou puhye panou tuta louyu hai raichoki nou süa buyuma ahi paopei moe.” Ana reihmaitao hai maili noua Mapao vei napao maitaoye southa bare.

¹⁸ Südonou Saul nou Doeg hi paoe, “Puletaoye nenou southawo!” Doeg nou napao maitaoye sü southa khaire. Süzhou teithe puhnou napao maitaoye southayu hai Ramai vei leli poa zhure ephod polou süyu napao mai nou raichangou hai southawure.

¹⁹ Saul nou Nob nuh hinou hrüyu mai hrülai, napao mai hrülai: naotu poutu, nahmaitou hrülai-a, ae kikhaorü teitei-a southa khaio tea kharochi peiwure, südonou puletao nou sütao hrülai hai southa khaiwure.

²⁰ Ana Ahimelek nahpoutu Abiathar hai tupaloua David hi tuvere.

²¹ Saul nou haibüa napao mai hrülaiye southare touyu ko hai puhnou ve David hi paongao peie.

²² David nou puh hi paoe, “Süzhou teithe Enou Doeg ye ngaoyu phaki, puhnou tave Saul hi paopei shulai touyu hai Enou süwe. Südonou nevei kityarai maitao thaiyu hai ava nou baie.

²³ Ngaopiso, Eye koa hai hi bubaio. Saul nou ahai mai ahai kheinou southa nüwe, ana nenou Eye koa bulouzü, kaozhou ashi daolai moe.”