1 SAMUEL 2 - SHEEYU BAIBEL (BSI)

Hannah vei Veachi

¹ Hannah nou haibüa veachi paoe, “Mapao nou Eye sousava peie; Enou asah soua buyu hai puhnou soupeia baie! Eye ngaobayu maitaoye sü Enou konü peie, E asa shore, daiolouzü Mapao nou Eye veilouyu sü peie.

² “Mapao büa sheeyu mai ali-a hae; Neye raiyu mai aliro hae, Etao Ramai nou vupa peiyu büa mai kukhe ali-a hae.

³ Khao soua laikhaiso; khaophu chi paopu soubaio. Daiolouzü Mapao hai sükhai touyu Ramai-e, ae puhnou maikhe mainou souyu vah veishi chikuwe.

⁴ Khouko buyu reihmaitao vei voulou sü chatare, ana lelou hoyu maiye soukhou souchü peiwe.

⁵ Raichoki tounü tou ae sonü so-a laiyu maitao hai chuo maizho kutou tare, ana houzüa laiyu maitao hai chuo houzüpu more. Nahapfü nanou chuo nahpoutu anai naloure, ana nahmai alao buyu pfü nasü chuo nahmai hazhi toure.

⁶ Mapao nou southa peiwe ae souhri dakhai peia baiwe, Puhnou maiye sü athai maivei teidei hi seitawe, ae puletaoye sü poa dakhai velou baiwe.

⁷ Puhnou kamai-a panou touha-e ae kamai-a panou toungiwe; puhnou kamai-a panou tainou soua hrüe ae kamai-a panou aduso mai soua hrüe.

⁸ Puhnou touhayu maiye sü deiphi hinou polashu peie, ae veahoyu maiye sousava peie; sübüa puletaoye panou veo nahmaitaoye koa bue, ae khuhaoyu buh hisü khaipeie. Deiphao soushuyu beikhei nasü Mapao vei-e, ae sühinou deiphao sü soushu peie.

⁹ “Puhvei kharo züa laiyu maiye sü puhnou vupa peie, ana mai ashimai hai azhi hinou hakata bailai; mai taralia lah puhvei pfüchi nou veilou laimoe.

¹⁰ Mapao ye ngaobayu mai sü hakata bailai; puletao pei hisü puhnou raki vanou teisüyu nasü seive peilai. Mapao nou deiphao mai hrülai pei hi chikulai, puhnou puhvei veo maitao hi khouko peilai, ae puhnou dolouyu veo maitao hi ngalouyu nasü peilai.”

¹¹ Süthaisü Elkanah nou lah puhvei Ramah nuhdu hisü dakhai tare, ana nahtou Samuel ye sü panou napao Eli khehinou Mapao vei kuvah soua bure.

Eli vei Nahpoutu Ahai

¹² Eli vei nahpoutu ahai hai shita khaire; puhai nou Mapao ye tsükhouyu sü hare,

¹³ ae napao mainou maikhe mai hi souzü vahtao thaifüa soupei more. Maikhe maitao nou Mapao hi pove posheela peiyu phaki, puhai hai napao vei kilai maitao nou tave sou kho-a buyu hinou khaocha kai asü pfüyu tyanou pove

¹⁴ sou kho-a buyu lee hisü thaithou sou raoloua baiwe, ae khaocha hinou kulouyu sou veishi sü napao maivei zha soua poloua baiwe. Shiloh hi tave rathoyu Israel mai hrülai hisü puhai china nou haibüa soupeie.

¹⁵ Süpei hinou, napao vei kilai mainou southa taosü meidei-a posheela peimo jünou, naanou soure napao hinou “Mei routoure donou napaoye sou sü peio, daiolouzü puhnou neletao hinou kho khaitouyu sou nasü polai moe, souso nou poa bailai,” tea puhai nou kho-a baiwe.

¹⁶ Naanou soua buyu nanou “Etaoye panou southa taosü poa meidei-a sheela peiraio, süthai nou nenou jüpa-a buyu nasü polo,” tea paokhaie, puhai nou haibüa chila peie, “Moe, chunou peio, nenou peimo louzü, Eh lah poloua bailai!”

¹⁷ Haibüa nou Eli vei nahpoutu ahai nou Mapao vei nghingao hinou mah sü dushoa nou soua bue, daiolouzü puhai nou haibüa Mapao hi posheela peiyu sheela khesü ngaophou pei more.

Samuel nou Shiloh hinou Hrüyu

¹⁸ Nahtou Samuel nou naanou souyu naazao sü nouloua Mapao vei kuvah soua bue.

¹⁹ Puh pfü nou popatsü hai puh cha ye koa potei potei hi ratho-a posheela peiyu hisü sa-a taho puhye naazao pove peiwe.

²⁰ Süthaisü Eli nou Elkanah ae puh khapfü hi haibüa shiha peie, “Ne hainou Mapao hi popeikhai touyu nahpoutu haina thaosü Mapao ye panou naotupai haina vanou nahmai kukhe-a hrüpu louyu sü soulou theo.” Süthaisü puletao nou lah puletao ki hisü dakhai ve tare.

²¹ Mapao nou Hannah ye shiha peie, ae honapai nou nahpoutu asü ae nah naotumai ahai hrüpuloue. Samuel nou Mapao vei kuvah soua dusho pare.

Eli ae Puhvei Nahpoutu Ahai

²² Chuo Eli hai tsüpare. Puh nou puhvei nahpoutu ahai nou Israel mai hrülai hi soupfüyu vahtao ae Rathoki hi talouyu bomü hinou vah soua buyu naotumai koute-a sabu sazü peishe touyu ko khesü puh hi chouve loure.

²³ Südonou puhnou puhai hisü haibüa paoe, “Nehai china daisounou haibüa vah ashi khesü souwe? Ne hai nou vah ashi souyu sü mai hrülai nou ahi pao-a bure.

²⁴ Anah haire, vah ashi soupu khaiso! Mapao vei maitao nou pao-a buyu sü ko aveih moe.

²⁵ Mai ali nou mai ali pei hi mah souyu hai-o Ramai nou vupa peilou süe, ana mai ali nou Mapao pei hi mah soulouzü, puhye sü thaonou vupapei lousüe?” Ana puhai puo nou paoyu chi sü zübare, daiolouzü puhaiye souhare donou Mapao nou lela loure.

²⁶ Chuo Samuel hai dusho pare, ae puh hai Mapao vei jüpa hinou ae maikhe maivei jüpa hinou dusho pare.

Eli Kihikhamai donou Ashi Vere Paopeiyu

²⁷ Rachipaola-apei mai ali nou Eli hi tave Mapao nou haibüa paowe tea paoe, “Neletao vei puopaoh Aaron ae puhvei kikhamai nou Ejipt teidei hinou veo Pharoah vei qila soua buyu phaki, Enou tave Aaron hi süngao peie.

²⁸ Enou puhvei kikha maiye panou avei napao soure donou Israel mai khü hrülai hrohinou dokupaloue. Sübüa puletaoye panou Eye posheelabu hinou poukai nüvei meidei-a ae avei leli nasü panou süloure donou ephod hrapfüe, alia Israel mainou Eye meidei-a posheela peiyu teitei hinou puletao vei zha sü panou peie.

²⁹ Sübüa buyuma, ne daisou nou avei maitao hinou ngaozüa buyu zha jünou la-a nou dutounü puwe? Ne daisounou Eye tsükhouyu jünou la-a nevei nahmaitao ye tsükhoupu loua avei Israel maitao nou Eye pove sheela peiyu hinou touveiyu soutao sü poloua puletaoye kiko peiwe?

³⁰ Raichoki Israel maivei Ramai Mapao Enou nevei puopaoh mai hi ae nevei kihikha maitao ye teisa panou napao soua avei kuvah panou soulai tea chaachou soukhai toue. Ana chuo Enou sübüa panou soupu khailai more. Eye tsükhouyu maiye Enou tsükhou peilai, ae Eye ngaorayu maiye sü E-a ngaora-a bailai.

³¹ Zhukhaio, Enou nevei kikha mai hi ae nevei khü hinou buyu nahlemai hrülaiye sü southakhai touyu teile sü velaire, sübüa nevei kihikha maiye panou mai ali koute-a tsükhaivu soua panou ngaolai more.

³² Süthaisü neletaoye panou veahoa hrülai, ae Enou Israel mai kukhe hi shiha peiyu sü neletao nou ngaoloua thainüa hrülai, ana nevei kihikha maitaoye panou mai ali koute-a hrüsho-a hrülai moe.

³³ Enou nevei tyaosholea hinou mai ali panou napao soua avei kuvah soulai, ana puh-a nghicha bailai ae areih ali-a ha-a panou hrülai. Kukhe maitaoye panou ssüshi soua thaikhai toulai.

³⁴ Nevei nahpoutu ahai— Hophni ae Phinehas hai teithe ali hinou thaikhiyu phaki, Enou ne hi paopeiyu chipao teitei hai cheche-a vepalai touyu nenou süloulai.

³⁵ Achi züyu napao mai ali Enou dopa loulai, ae puhnou ale hinou tsücho-a buyu avei jüpa vah teitei sü soupeilai; ae Enou puh vei tyaosholea maitaoye sü soudusho peilai, sübüa puhnou tapa talou-a Enou theadzü napei khaitouyu veo nghoujü nou teisa avei kuvah soulai.

³⁶ Shokhaitoua buyu nevei kihikha maitao nou tave napao hinou pousha moa touso ngaotou loure donou haibüa kholai, ‘Naanou soure vahbu ali hi Eye zhuvea nou thoupeio, sübüa E-a panou khaoto müphou ali-a toulo.’ ”