1 SAMUEL 16 - SHEEYU BAIBEL (BSI)

David panou Veo Soure donou Theadzü Napeiyu

¹ Mapao nou Samuel hi paoe, “Ne teile kasho Saul ye donou dopfüa bukou laige? Enou puhye sü Israel maivei veo souyu hinou malaiwure. Ana chuo oliv theadzü poloua Bethlehem hinou buyu Jesse ki hisü tawo, daiolouzü Enou puhvei nahpoutu mai aliye panou veo soure donou doloure.”

² Samuel nou chila peie, “Enou süsü kabüa soukhai laige? Hakinou Saul nou sülouyu thaio, puhnou Eye sü southa bailai.” Mapao nou chila peie, “Ne cholou ali hulo, ae Mapao ye poa sheela peilai tea paolo.

³ Posheelayu buh hisü Jesse ye kuvelo, ae Enou ne hisü dai soulai touyu khesü paopeilai. Enou mai hai nare tea paoyu naye sü theadzü napeio.”

⁴ Mapao nou paopeiyu thaifüa Samuel nou souloure, ae puhnou Bethlehem hisü tave louyu phaki, nuhdu hi tsümaitao hai ngaopi shopoa nou puhye takou süloua nou noue, “Rachipaolawo, kaonayu hinou ne tave loua baimoe?”

⁵ Puhnou puletao hisü chila peie, “Ouvai, Enou hai hi veyu hai Mapao ye posheelare donou ve-a baie. Südonou neletao sousheeloua ahi vewo.” Puhnou Jesse ae puhvei nahpoutu maitao-a soushee loua posheelare buh hisü tavelo tea paopeie.

⁶ Puletao nou velouyu phaki, Samuel nou Jesse nahpoutu Eliab ye zhingao loukhaie, puh lah haibüa tsüchoe, “Mapao nghoujü nou la-a buyu mai haina hai dolouyu maipouna vuzüyu phare.”

⁷ Ana Mapao nou puh hi paoe, “Puhvei sha shoyu moa zhurao veiyu nanou phouso, Enou puhye sü malaiwure, daiolouzü E hai deiphao mai ali büa zhu moe. Deiphao mai louzü vakou ngaoyu nanou zhuwe, ana Ewo louzü lekhe vainou zhua baiwe.”

⁸ Süthaisü Jesse nou puh nahpoutu Abinadad ye kuloua Samuel hi sakoue. Ana Samuel nou paoe, “Moe, mai haina-a Mapao nou dolou more.”

⁹ Jesse nou süthaisü Shammah ye sakoue, “Moe, mai haina-a Mapao nou dolou more,” tea Samuel nou paoe.

¹⁰ Haibüa Samuel hi Jesse nahpoutu mai anai taosü sakoue, ana Samuel nou puh hi paoe, “Mapao nou mai haitao hi mai ali-a dolou more.”

¹¹ Süthaisü puhnou Jesse hi noue, “Ne nahpoutu mai kukhe hadou?” Jesse nou chila peie, “Nahpoutu nakhana buhie, ana puh sü zhaotu khotare.” Samuel nou paoe, “Puhye hai hi vewo tea paopeio. Puh velou mokoute, Etao nou Mapao ye posheela peiyu sü soulou shihie.”

¹² Südonou Jesse nou puhye seiho kutare. Puh hai hüvei shoe, pfüphao veishoyu nahlemai ali-e, ae puhvei nghithou hai leirei touwe. Mapao nou Samuel hi paoe, “Mai nasü hainare, tashuloua puhye theadzü napeio.”

¹³ Samuel nou oliv theadzü poloua David ye sü puh jürai maitao nghoujü nou theadzü napeiwure. Süzhou teithe hinou Mapao vei Rako nou David hisü koulou loure. Süthaisü Samuel hai Ramah nuhdu hi dakhai tare.

David nou Saul Veobu hi Ve Vah Souyu

¹⁴ Chuo Mapao vei Rako hai Saul hinou tare, ae Mapao nou rashi vei rako ali puhye souveare donou seive peiwure.

¹⁵ Saul vei kilai maitao nou puh hi paoe, “Etao nou süwe, süolouzü Ramai nou seive peiyu rashi nanou neye sü souvea souchoro-a bure.

¹⁶ Südonou paopuwo, Etaoye kharochi peiwua panou taho gaigou ae lana poa lou soulou süyu mai ali phoulo. Sükulouzü rashi rako nanou ne hi ve louyu phaki, mai sünanou gaigou poa lou soupei louzü, ne kaona bailai.”

¹⁷ Saul nou puletao hi paoe, “Eye donou lou souyu basei poa lou souveih shoyu mai ali phoupeio.”

¹⁸ Kilai mai ali nou paoe, “Bethlehem nuhdu hinou Jesse nahpoutu mai ali hai lou souveih sho-a nou bue. Puh sü hüvei sho-e, khu-a veishoyu nahlemai ali-e, ae chi-a paoveih sho-e. Mapao nou puhye sa-a laiwe.”

¹⁹ Südonou Saul nou Jesse hisü kopomai ye seiho haibüa paoe, “Nevei zhaotu kho-a buyu ne nahpoutu David ye sü ahi seive peio.”

²⁰ Jesse nou David ye panou nghitu ali, ae rheisüh nasü panou raokhao ae zhaoh souheebvü ali pfüloua Saul hisü ve-e.

²¹ David nou Saul hi velou puhvei kuvah sü soue. Saul nou puhye sü jüpa sholoua panou puhvei reihna pfüyupu souloure.

²² Süthaisü Saul nou Jesse hi haibüa ko paota-e, “Enou David ye sü jüpawe, südonou puhye panou avei kuvah soua haihi bubaio.”

²³ Süthaisü Ramai nou seiveyu rashi nanou Saul hi ve louyu phaki, David nou puhvei gaigou poloua lou soupeiwe. Puhnou lou sou peikhaie, rashi rako nasü puh hinou ta-a baiwe, ae Saul hai kaona-a nou veipa dakhai loua baiwe.