1 SAMUEL 13 - SHEEYU BAIBEL (BSI)

Philistin Mai Pei hi Reih Souyu

¹ Saul nou veo koulouyu phaki puh hai po shirou pare, ae puh nou Israel mai hi po ahai hai veo soue.

² Saul nou Israel mai hrohinou mai thesü hai dopa loure, puhnou mai thehai hai saloua Mikmash deichi vanou buyu Bethel nuhdu hinou koa buloure, alia mai theli hai puh nahpoutu Jonathan ye koa Benjamin khü vei teidei hi buyu Gibeah nuhdu hisü seitare. Mai kukhetao hai Saul nou lahkuku ki hi seidakhai tawure.

³ Jonathan nou Philistin maivei reihmai peikhowo sü Geba hinou southawure, ae ko haina sü Philistin mai hrülai nou chouloure. Süthaisü Saul nou kopomaiye seiho Hebrew mai hrülai hi talou reih soukhaio tea shabe nghoua tyadei teitei hisü paosüta-e.

⁴ Israel mai hrülai hisü Saul nou Philistin maivei reihmai peikhowo ye southawure, ae chuo Philistin mainou puhye ngaora loure tea ko hai paota peie. Südonou maikhe mainou Saul ye tave babou peilai tea Gilgal hinou tave jüloure.

⁵ Philistin mainou Israel maiye reih soure donou puletao hi rheiluki theshirou, rhei pfüyu mai therou, ae reihmai hai reipe hi phouhao louhoa buyu venai zhoua tave jüloure. Puletao nou tave Bethaven vei teinghi palova buyu Mikmash hinou fühao soua buloure.

⁶ Süthaisü puletao nou soutaosoua Israel maiye soureih soutare, sübüa Israel maiye sü panou zhou hazhi-a veashoa bure. Südonou Israel mai hai kamai-a nou lyaqulu kinou, ae kamai-a deibvü chayu kinou, kamai-a chuhlya kinou ae dzübvü kinou tutsü tare;

⁷ ae mai taoli hai Jordan rei tachopa Gad ae Gilead maivei teidei hi tare. Saul hai chukoute Gilgal hinou buhie, ae puhye koa buyu maitao hai ngaopi shoa ngua bure.

⁸ Puhnou teithe anai koute hai Samuel nou paoyu thaifüa puhye kho-e, ana Samuel hai Gilgal hisü velou loumo hie. Maikhe mai hai Saul ye thaowua tavai tarei tare,

⁹ südonou Saul nou puletao hisü paoe, “Meidei-a posheelare natao ae kaona-a hrüloure donou poukai nüvei dei-a posheelare natao sü ahi pokou peio.” Puhnou meidei-a posheelayu khesü posheela peiwure.

¹⁰ Puhnou meidei-a posheelayu nasü souche loubü Samuel sü veloure. Saul nou tapa puhye süloure,

¹¹ ana Samuel nou paoe, “Ne daivah souwure?” Saul nou chila peie, “Maikhe mai hai ahinou tarei tapoa tare, ae nenou velai tea paokhai touyu sü nenou velou more; süpei hinou Philistin mai hai Mikmash hinou tave jüa buloure.

¹² Südonou Enou haibüa tsücho loure, ‘Philistin mainou Eye reih hulou laire, ana E sü Mapao vei jüpa soulou mohie.’ Südonou meidei-a posheela peimo louzü shire tea Enou tsücho loua posheela peiwure.”

¹³ Samuel nou Saul hi chila peie, “Ne dai vosoua vah sünasü soudesa, nevei Ramai Mapao nou soulo tea peikhai touyu chikha khesü nenou zülou more. Nenou chikha khesü zülouyu thaio, Mapao nou nevei tyaosholea panou teisa nou Israel maiye khasa-a hrülai.

¹⁴ Ana chuo nenou veo soupulai more, daiolouzü nenou Mapao vei chi zülou more. Südonou chuo Mapao nou jüpayu mai aliye panou puhvei maitaoye khasa-a hrüre donou dolou laire.”

¹⁵ Samuel nou kushuloua Gilgal hinou tapoa Benjamin maivei teidei Gibeah hi tare. Ae Saul nou puhye koa salaiyu maitaoye phouyu phaki, puletao hai mai kaihrou phali bue.

¹⁶ Saul, puh nahpoutu Jonathan ae puhai ye koa salaiyu maitao hai Benjamin maivei teidei Geba hinou fühao soua chaore, ae Philistin mainou Mikmash hinou fühao soua bue.

¹⁷ Philistin mainou puletao vei reihmaitao hai me asü soua dadeloua kheikhei soua reih huloure. Me ali nou Shuel maivei teidei Ophrah hilo tare,

¹⁸ me ali nanou Beth Horon hilo, ae me ali nanou Zeboim deikho zhingao-a buyu vaohro hilo tare.

¹⁹ Israel maivei teidei hi hai hu kuyu mai ali-a hare, daiolouzü Philistin mainou puletaoye panou khoche ae heung kulou shulai tea souha khaiwure.

²⁰ (Israel mai hai puletao nou poa tatayu phou, kho, marei ae kai khesü Philistin mai hinou poho kuwe.

²¹ Philistin mainou marei ae cho-ha phou mü tapeiyu hai pousha ali polouwe, ae poa tatayu phou mü tapeiyu hai pousha ahai powe.)

²² Südonou reih souyu phaki Saul ae puh nahpoutu Jonathan ye salaiyu reihmaitao mai ali koute-a reih basei po moe; Saul ae puh nahpoutu Jonathan likhei basei poa baie.

²³ Philistin mainou reihmai me ali hai Mikmash ludu panou khure donou seita-e.