1 SAMUEL 12 - SHEEYU BAIBEL (BSI)

Samuel nou Maikhe Mai hi Akhai Chi Paoyu

¹ Süthaisü Samuel nou Israel maitao hi paoe, “Neletao nou khoyu nasü Enou soupeiwure, neletaoye khosa-a hrüpeire donou veo ali sü Enou dokhai peiwure.

² Chuo puhnou neletaoye süthaisa-a hrüpeilai. Ewo louzü chuo tsüloure ae pei paopare, anou avei nahmaitao louzü neletaoye koa bulai. E nahle-a bukinou zhou koute hai neletaoye süthaisa-a tapeie.

³ E neletao nghoujü nou la-a bue, maitarali hia Enou kaomoyu vah ashi soulouzü, chu Mapao vei nghoujü ae veo vei nghoujü nou avei mah khesü paopa peikhaio. Enou neletao vei cho moyuma rheisüh pokhai touyu buvu? Enou maitarali hia da-zhu khaitouyu moyuma souchoro khaitouyu buhae? Enou maitarali hia seihla toukhai touyu buhae? Hakinou Enou haibüa kaomoyu vah soukhai touyu bulouzü, Enou polouyu nasü paoh khapeilai.”

⁴ Maikhe mainou chila peie, “Moe, nenou Etao hi da-zhu moe, moyuma Etaoye souveayu vah haso ali-a soumoe, moyuma Etao mai ali hinoua halia polou moe.”

⁵ Samuel nou chila peie, “Zhou teithe neletao nou Eye vah ashi ali-a soumoe, sheesha-a hrüa bubaie tea paopayu hai Mapao nou ae puhnou dopapei khaitouyu veo nou shaki süe. “Ouvai, Mapao nou Etao vei shaki nasüe,” tea puletao nou chila peie.

⁶ Samuel nou paopue, “Mapao hai Moses ae Aaron ye dopaloua neletao vei puopaoh maitaoye Ejipt teidei hinou sapa peiyu nasüe.

⁷ Südonou neletao buh soutoulo, Enou neletaoye Mapao vei nghoujü nou puhnou neletao hi ae neletao vei puopaoh maitao hi soupei khaitouyu Mapao vei khailupa peiyu vah khesü phakulai.

⁸ Jakob ae puhvei kihikhamai nou taho Ejipt hinou hrüe, ae Ejipt mainou puletaoye sü souvea souchoro peie, ae neletao vei puopaoh maitao nou kra-a Mapao hi soukha khoyu phaki, puhnou Moses ae Aaron ye seive puletaoye panou Ejipt teidei hinou sapapeie, ae sapove teidei hai hisü khaipeie.

⁹ Ana puletao nou puletao vei Ramai Mapao sü ngaiwure; südonou puhnou puletaoye sü Hazor hi veo Jabin vei reihmai me peikhowo Sisera bah hi, ae Philistin mai bah hi, alia puletaoye ngaobayu Moab maivei veo bah hi thoupeie.

¹⁰ Süthaisü puletao nou kra-a Mapao hinou soukha peio tea haibüa paoe, ‘Eh nou mah sü souwure, daiolouzü Etao nou Mapao sü thaowure, ae Baal ae Ashtaroth rah khesü tho tare; ana chuo Etaoye ngaobamai bah hinou vupa peio, ae Etao nou neye sü tho-a bailaire.’

¹¹ Südonou Mapao nou Gideon, Barak, Jephthah, ae Eye seive peie. Etao nou neletaoye sü ngaobamai bah hinou vupa peie, ae neletaoye panou pishiyu ha-a nou hrüe.

¹² Ana Ammon mai veo Nahash nou neletao pei hi soureih soulou laire touyu zhingao loukhaie, neletao nou Mapao hai neletao vei veo moe tea laiwua ahi nou ‘Etaoye khasa-a hrüre donou veo jüpawe’ tea kholoure.

¹³ “Chuo neletao nou jüpa-a dolouyu veo nasü haihi bure; neletao nou khoyu nasü chuo Mapao nou neletao hi peikhai toure.

¹⁴ Neletao ae neletao vei veo nou neletao Ramai Mapao ye tsükhou-a puhvei kuvah soulouzü, puhvei paochi züa puhvei chikha teitei thaifütou toulouzü, neletao hi ha teitei nou kaozhou vei-a hrüa bailai.

¹⁵ Ana neletao nou Mapao vei pai sü keiba-a puhvei chikha khesü zü more toulouzü, puhnou neletao hi ae neletao vei veo pei hisü hrai tawulai.

¹⁶ Südonou neletao lahkuku vei buh hinou butou toulo, ae Mapao nou khupayu vah haso souyu sü zhulo.

¹⁷ Zhaodo hai tei thekei-a buyu kaki mowu? Ana Enou veachi paopei louzü, Mapao nou teisüa teikhai teirü seive peilai. Hakinou haibüa teikhai teirü ashi velouzü, neletao nou Mapao hinou veo khoyu hai dushoyu mah souwure touyu sülou.”

¹⁸ Südonou Samuel nou veachi paoe, ae süzhou teithe hinou Mapao nou teisüyu ae teirü ashi sü seive peire. Süthaisü maikhe mai hai Mapao ae Samuel ye sü ngaopi sholoure,

¹⁹ ae puletao nou Samuel hi paoe, “Zhuvea nou Etaoye donou nevei Ramai Mapao hi veachi paopeia panou Etaoye thaiso, daiolouzü Etao nou mah alao souyu pei hisü nou Etao hi veo peio tea kho-a mah southou puwure touyu sü Etao nou süloure.”

²⁰ Samuel nou chila peie, “Ngaopiso, neletao nou vah ashi alao soukhai touyuma, Mapao hinou tavai taso, ana neletao vei hrümai ae tsüle teitei nou peia puhvei kuvah sü soulo.

²¹ Cheche moyu rah khesü thopu khaiso; puletao nou neletaoye sü soukha peilou hoe, moyuma khailupa peilou hoe, daiolouzü puletao hai cheche moyu rah baie.

²² Mapao nou neletaoye sü thaokhai toulai moe, daiolouzü puhnou neletaoye sü puhvei mai panou soulai tea chaachou souwure.

²³ Süpei hinou Eye panou neletaoye donou veachi pao peimoa Mapao hinou mah soure nasü, ahinou pa doushoa butheo. Enou neletaoye sü kabüa vah aveih ae kaozü nasü soulai touyu sü doupeilai.

²⁴ Neletao vei tsüle ae hrümai teitei nou peia Mapao chi zülo, ae puhvei kuvah hai chilee cheche-a soulo. Puhnou neletaoye donou vah haso aduli soupei khaitouyu khesü licholo.

²⁵ Ana neletao nou mahmo sü soupu khaikhai-a bulouzü, puhnou neletao ae neletao vei veo ye sü souha bailai.”