1 SAMUEL 11 - SHEEYU BAIBEL (BSI)

Saul nou Ammon Maiye Soukanghi Peiyu

¹ Khouh ali thaisü, Ammon maivei Veo Nahash nou puhvei reihmai me saloua Gilead maivei teidei hi buyu Jabesh nuhdu nasü reih hulou poloure. Süthaisü Jabesh mainou Veo Nahash hisü paoe, “Etaoye koa vo soupeio, sükulouzü Etao nou nevei khakhe hinou hrüa bailai.”

² Nahash nou haibüa chila peie, “Neletao nou Eye koa vo soulai toulouzü haibüyu zhai ali hinou soulai: süolouzü Enou neletao vei nghithou zhoulova hai reilapa khaitoulai, sübüa Israel mai hrülaiye hraongu soupeilai.”

³ Jabesh hi süthai-apei maitao nou paoe, “Etaoye teithe anai peio, sükua Etao nou Israel maivei teidei teitei hi ko seita peilai. Süthaisü mai ali-a Etaoye tave soukha peimo louzü, Etao nou ne phi hi velai.”

⁴ Kopomaitao nou tave Saul nou hrüyu Gibead nuhmai hisü ko paosü peikhaie, nuhmai hrülai sü shusoua kra-a bure.

⁵ Saul nou dou hi holoua ki hi chode ahai sü hupoa dakhai veyu phaki, maikhe mai hai kra-a buyu ngaolou khaie, puhnou noue, “Daivanou mai hrülai hai kra-a bue?” Puletao nou puh hisü Jabesh hinou veyu kopomaitao nou paoyu ko khesü paongao peie.

⁶ Saul nou ko sü choulou khaie, Ramai vei rako nou puh hisü koulou loure, ae puh hai rarou sholoure.

⁷ Puhnou chode ahai sü dathaloua souvava nou daodesa touloua Israel mainou hrüyu teidei teitei hisü kopomaiye panou poloua haibüa ko paota peie: “Mai taralia Saul ae Samuel ye thaifü moyu maiye sü chode haina büa soupeilai.” Süthaisü Israel mai hrülai hai Mapao nou haibüa sourai hai ngaopi loure, südonou puletao mai hrülai hai me ali souloua tave joloure.

⁸ Saul nou puletaoye sü Bezek hinou save jüloure, ae puletaoye maipei phouyu phaki, Israel mai hai 300,000 ae Judah hinou mai 30,000 hai ve jüloue.

⁹ Jabesh hinou veyu kopomaitao hisü puletao nou haibüa paoe, “Taho neletao vei nuhmai remai hisü dosho teithe hea pamo jünou neletaoye tave vupa peilai tea paopeio.” Jabesh mainou ko sü choulou khaie, puletao hai sayu nou paoshalou hore,

¹⁰ ae puletao nou Nahash hi haibüa paoe, “Dosho Etao nou tave nevei khakhe hisü peithoulai, ae nenou Etao hi dai sounüyu nasü souloua bailai.”

¹¹ Süzhou khei hai Saul nou puhvei reihmaitao hai me asü soua dade loure, ae tei thepayu phaki puletaoye ngaobayu Ammon maivei fühao hisü reih hulou puletaoye sü hea payu koute hai southa peie, ae southalou moa tupa louyu maitao hai mai alili nou turarou poa tare.

¹² Süthaisü Israel maitao nou Samuel hisü tave “Saul ye panou Etao vei veo soulai moe tea paoyu maitao sü daiki bue, puletaoye Etao bah hi thoupeio, puletaoye sü southawulai” tea khore.

¹³ Ana Saul nou puletao hi paoe, “Zhou teithe hai mai ali koute-a southa laimoe, daiolouzü zhou teithe hai Mapao nou Israel maiye vupa peiyu teithe-e.”

¹⁴ Samuel nou maikhe mai hi paoe, “Etao mai hrülai nou Gilgal hi taho Saul ye panou Eletao vei veo soure donou bakha ali shapapu laikhe.”

¹⁵ Südonou mai hrülai nou Gilgal hi taho sheeyu buh hinou Saul hai puletao vei veo soure tea shapapue. Puletao nou Mapao hi poukai nüvei meidei-a kaonayu posheela hai posheela peie, alia Saul ae Israel mai hrülai nou asashoa khonüh nüe.