1 SAMUEL 10 - SHEEYU BAIBEL (BSI)

¹ Süthaisü Samuel nou oliv theadzü bvü ali poloua Saul pei hi lazü peie, puhye mü nou teipeie alia haibüa paoe, “Mapao nou neye panou Israel maiye khosa-a hrüre donou theadzü napeiwure. Nenou puhvei maitaoye khasa-a hrülai, ae puletaoye ngaobayu maitao bah hinou vupa peilai. Mapao nou neye panou puhvei maitao pei hi veo soure donou theadzü napeiwure touyu shee sü haibüe:

² Zhou teithe nenou Eye thaowua tara tayu thai, Benjamin maivei teidei Zelzah tea kua buyu nuh hi Rachel vei khü hinou mai ahai takou daolai, ae puhai nou ne hi haibüa paolai, ‘Ne hainou phoua buyu rheisühtao sü ngaoloure, ana chuo ne puo hai rheisühtao donou levea more, ana neye donou levea-a Anahpoutu donou E daipha soulai’ tea pao-a bure.

³ Ne hainou buh sühinou tachopoa Tabor hi sheeyu süübe buyu hi kouyu phaki, mai asü hai Bethel hi taho Ramai ye posheelare donou takou daolai. Puletao hi mai ali nou nghitu asü süthaisa-a talai, ae mai ali nou raokhao phe asü pfüa talai, alia kukhe mai nanou souheebvü ali hinou darkha zhaoh pfüa takou daolai.

⁴ Puletao nou nehaiye sashoa chalai, ae ne haiye raokhao phe ahai peilai, süsü puh bah hinou ne polo.

⁵ Süthaisü ne hai nou Philistin reihmaitao nou fühao soua buyu Gibeah hi Ramai vei Deichi vasü taopalai. Ae ne hai nou nuhdu hi talouyu phaki, ludu hinou rachipaola peiyu maime ali hai khubvü, shapoulei, gaigou ae beibei poa shusou ra-a ae chopoa deichi vanou takou daolai.

⁶ Teile sübü hinou Mapao vei rako nou ne hi koulou loulai, ae nenou puletaoye koa cho-a nou rachi sü paolai, süthai ne sü mai kukhe ali datawulai.

⁷ Haibüyu khesü ne hi vepare toulouzü, nenou sounüyu vah khesü soukhaio, daiolouzü Ramai nou neye kozho peilai.

⁸ Nenou Gilgal hisü ajünou rai-a velo, ae Enou tave sühinou neye daolai, alia meidei-a posheelare ae poukai nüvei sü Enou meidei-a posheela peilai. Enou tave neye panou daisoulai touyu khesü paopeimo koute teithe anai koute hai Eye koa bulo.”

⁹ Saul nou Samuel hinou tarata laire tea buyu phaki, Ramai nou puhvei hrümai sü souda peiwure. Ae Samuel nou puh hi paoyu chipao teitei sü süzhou teithe hai cheche-a vepare.

¹⁰ Saul ae puhvei kilai nanou Gibeah hi veyu phaki, puhai nou rachipaoyu maime ali takou dao-e. Süteilebü hinou Ramai vei rako nou puh hisü kou louloure, ae puh hai puletao hrohinou shusoua cho-a nou lou soure alia rachi paolare.

¹¹ Raichoki nou puhye süyu mainou puh hai rachipaolayu maiye koa rachipaolayu sü ngaolou khaie, puletao hai ali nou ali hi haibüa paoe, “Kish nahpoutu hai daipha soure? Saul hai rachipaola apei mai soutadou?”

¹² Süpehao hinou hrüyu maitao nou paoe, “Rachipaolayu kukhe maitao vei puo maitao sü kabüyu maikhai-e?” Südonou nada ali soua “Saul hai rachipaola apei mai ali soutavu?” tea potare.

¹³ Saul nou shusoua cho-a rachipaola cheyu thaisü puh hai deichi hinou buyu rathobu hisü patare.

¹⁴ Saul puo thaihou nou puh ae puhvei kilai neye ngaolou khaie, puhai hi “Ne hai daiki vetage?” tea noue. Saul nou chila peie, “Ahai rheisüh taoye phouta-e, ana ngaolou mokhaie, ahai nou Samuel ye ve daolai tea tare.”

¹⁵ “Puhnou ne hai hisü daitea paopeie?” tea Saul puo thaihou nanou noupue.

¹⁶ “Puhnou rheisühtao sü ngaoloure tea paopeie,” tea Saul nou chila peie, ana Samuel nou puhye panou veo koulaire tea paoyu chi khesü puh puo thaihou hisü paongao moe.

Saul ye panou Veo Soure donou Shapayu

¹⁷ Samuel nou maikhe maiye sü Mizpah rathoyu buh hi kuve jüloua

¹⁸ puletao hisü haibüa paoe, “Israel maivei Ramai Mapao nou paoe, ‘Enou neletaoye sü Ejipt hinou sapa peie, ae Enou Ejipt mai alia neletaoye souvea souchoroyu maitao bah hinou neletaoye khailupa peie.

¹⁹ Neletao nou veahoyu phaki alia kaozhou ashi daoyu phaki, neletaoye khailupa apeio Ramai nasü Enoue, ana zhou teithe hai neletao nou Eye malaiwua neletao hi veo mai ali peio tea kholoure. Südonou chuo neletao khü khü nou ae pfümounah nou Mapao nghoujü takou lalou khaio.’ ”

²⁰ Süthaisü Samuel nou khü alili nou nghoujülo panou takoue, ae Mapao nou Benjamin khü nasü dopa loure.

²¹ Süthaisü Samuel nou Benjamin khü sü panou nghoujülo hi pfümounah alili nou takoue, ae Mapao nou Matri pfümounah nasü dopa loure. Süthaisü Matri pfümounah hinou kihikha mai alili nou nghoujülo panou takouyu phaki, Kish nahpoutu Saul ye sü dopa loure. Puletao nou Saul ye zhuyu phaki, puhye sü phouhare,

²² südonou puletao nou Mapao hi noue, “Mai kukhe mai bupu hivu?” Mapao nou chila peie, “Saul hai na khaiyu buh hinou tutsüa bue.”

²³ Südonou puletao nou tuho Saul ye sü maikhe mai hi save-e, ae puh hai mai kukhe mai jünou puh pei hai kuvavua sah shohie.

²⁴ Samuel nou maikhe mai hi paoe, “Mapao nou dopei khaitouyu mai nasü hainare! Puhye raiyu Etao mai ali-a ha-e.” Maisou nou shusoua haibüa sha-e “Veo ye sü panou hrüsho theo!”

²⁵ Samuel nou maikhe mai hisü veo maivei zü ae veo mai nou soupfüre vahtao hai paopeie, ae süthaisü puhnou sütao hai larübvü ali hi rüthouloua sheeyu buh Mapao vei nghoujü hi pove khaipeie. Süthaisü puhnou maikhe maiye sü lahkuku ki hi seidakhai tawure.

²⁶ Saul-a lah puhvei ki buyu Gibeah nuhdu hisü dakhai tare, ae Ramai nou khouko pfüshoyu kamai tsüle daipeia panou puhye koa satare.

²⁷ Ana hazholia moyu kamai-a nou haibüa paoe, “Kabüa mai haina nou Etaoye donou haveih soupei loulai?” Puletao nou Saul ye ngaophou more, ae puhye sapeina ali-a pove peimoe.