1 SAMUEL 1 - SHEEYU BAIBEL (BSI)

Elkanah alia Puhvei Kikhamai

¹ Ephraim maivei deichi hinou nuhdu ali Ramah tea bue. Sühisü Elkanah tea kuyu maipou ali hrüe. Puh hai Ephraim mai khü hinou hrüveyu Zuph vei pfümounah-e. Puh sü Jeroham nahpoutue alia Elihu tyao-e.

² Elkanah hai maipfü ahai bue, puhai zhih nou Hannah ae Peninnah touwe. Peninnah hai nahmai bue, ana Hannah hai nahmai hae.

³ Po patsü Elkanah hai puhnou buyu nuhdu hinou rathore donou ae Khoukhoulai Mapao hi posheelare donou Eli ae puhvei nahpoutu ahai, Hophni ae Phinehas nou Mapao vei napao soua buyu Shiloh nuhdu hisü tawe.

⁴ Elkanah nou posheela peiyu tsü sü puhnou sou zha ali hai Peninnah ye peiwe, ae puhvei nahmai ahai hi-a zha chükhei peiwe.

⁵ Puhnou Hannah ye leshi sho-a buyuma honapaiye sou zha alikhei peia baiwe, daiolouzü Mapao nou honapaiye sü panou nahmai hrümore.

⁶ Mapao nou honapaiye panou nahmai hrümoyu donou honapaiye ngaoba-a buyu Peninnah nou puhye jünüa ngaophou moyu vah khesü soupeia baiwe.

⁷ Po taoli hai, puletao nou Mapao vei ki hi veyu tsü sü Peninnah nou Hannah ye lesouvea peia baiwe, südonou Hannah nou ha touba-a kra-a bue.

⁸ Puh khapu Elkannah nou honapai hi noue, “Hannah, ne daisounou kra bue? Ne daisounou ha toubawe? Ne daisounou leveawe? E nahpoutu mai kirou buyu jünoua neye kopu hi mowu?”

Hannah ae Eli

^9-10 Vuli puletao nou Shiloh hi buyu Mapao vei ki hinou hatou louyu thai, Hannah nou kushuloua levea shopoa Mapao hinou kra-a veachi paoe. Süphaki napao Eli hai lah puhnou teisa nou buyu kikhu phi hinou bue.

¹¹ Hannah nou chaachou soua haibüa veachi paoe, “Oh Khoukhoulai Mapaowo, ne kilaipai Eye zhupeio! Enou veahoyu hai sü zhuloua Eye ngaipeiso! Nenou Eye nahpoutu ali peilouzü, Enou puhye sü poa neye puhvei hrümai teitei nou peilai, ae puh peishu sü panou bi khailai moe.”

¹² Hannah nou Mapao hi teile sholi veachi pao-a buyu sü Eli nou zhua nou bue.

¹³ Honapai nou pai pamoa lekhe hinou mü lüa veachi pao-a bue. Eli nou süsü ngaolou khaie, honapai hai zhaoh sozhi phare tea poloure.

¹⁴ Südonou Eli nou honapai hi paoe, “Ne teile kasho zhaoh sozhi-a bulaige? Ne zhaoh sopu khaiso.”

¹⁵ Ana Hannah nou puh hi chila peie, “Moe, apaopuwo, E zhaoh sozhi moe, E hai veashoa buyu naotumai ali baie. E zhaoh sokhai moe, ana Enou avei veahoyu sü Mapao hi pao-a bubaie.

¹⁶ Eye naotu ashi mai aliye tea chopeiso, daiolouzü Enou veaho shoyu donou haibüa veachi pao-a bubaie.”

¹⁷ Süthaisü Eli nou paoe, “Kaonayu sü ngaolou theo, ae nenou khoyu nasü Israel maivei Ramai ye panou peiyu sü soulou theo.”

¹⁸ Hannah nou napao Eli hi chila peie, “Ne kilai pfüpaiye ne hinou teisa panou zhuvea leshiyu sü ngaolo.” Süthaisü honapai nou buh sühinou tare, ae taho ha phoutou loure, alia leveapu more.

Samuel ye Nalouyu ae Mapao hi Popeiyu

¹⁹ Thainesho shona sü Elkanah ae puhvei kihikha maitao nou kushuloua Mapao ye tholoua lah puletao vei Ramah nuhdu hisü dakhai tare. Süzhou khei Elkanah nou puh chapfü Hannah ye koa züe, ae Mapao nou honapai vei veachi sü noupeiwure.

²⁰ Südonou honapai nou pou pfüloua nahpoutu ali naloure. Honapai nou puh zhih sü Samuel tea sapeie, daiolouzü honapai nou haibüa paoe, “Enou puhye sü Mapao hinou kholoue.”

²¹ Elkanah ae puhvei kihikhamai nou Shiloh hi taho po patsü Mapao ye tho-a posheela peire teile sü vere.

²² Ana zhouvu hai Hannah nou tamore, daiolouzü honapai nou puh chapu hisü haibüa paoe, “Nahtou nanou nao phalouzü Enou puhye saloua Mapao vei ki hi save peilai, ae puhye panou teisa sühinou puhvei kuvah soua bulai.”

²³ Elkanah nou chila peie, “Nenou veilai tea tsüchoyu nasü soulo, puhnou naonao phamo koute sü ne hi ko-a buwo. Mapao panou nevei chaachou soukhai touyu nasü vete louyu sü soulou theo.” Südonou Hannah hai Shiloh hi tamoa nahtou naye zhua ki hinou bure.

²⁴ Honapai nou puhye nao khoyu thai, puhye sa-a po asü payu chode ali, southou sühcho kirou ae darkha zhaoh souhee lekha ali pfüloua Shiloh hi buyu Mapao vei rathoki ki hisü tare. Süphaki Samuel hai nasho hie.

²⁵ Süthaisü puletao nou chode nasü dathaloua posheela peia nahtou naye sü Eli hi save peie.

²⁶ Ae honapai nou Eli hi paoe, “Oh apaopuwo, E buh hai hinou Mapao hi veachi pao-a buyu naotupai nasü E-e, ne Eye taiho taimosa!

²⁷ Enou nah hainaye donou puh hi veachi paoe, ae puhnou avei veachi sü noupeia Eye nahpoutu haina hai peie.

²⁸ Südonou chuo Enou nahpoutu hainaye sü Mapao hi popeiwe. Puhye panou hria bukisa sü Mapao vei kuvah panou soulai.” Süthaisü puletao nou Mapao ye buh sühinou tho-e.