1 PUOPAOKO 29 - SHEEYU BAIBEL (BSI)

Rathoki Soure donou Sapeina Pove Peiyu

¹ David veo nou vejüa buyu maikhe mai hisü paoe, “Anahpoutu Solomon hai Ramai nou dolouyu nasüre, ana puh hai nahlemai hi-e ae vah-a soulou sümo hie. Puhnou soure vah nasü dushore, daiolouzü puhnou soure ki nasü mai nou bure ki moe ana Ramai Mapao nou bure Rathoki-e.

² Südonou Enou soulousü koute hai avei Ramai vei Rathoki nasü poa soure donou sana, shahu, baosahu, hu, süü, chuh muhteitya, chuhva, ae lairei chuh alao soudapei khaitoue.

³ Enou sheeyu rathoki poa soure donou soudakhai peiyu pei hinou lah avei kini khaiyu hisü nou sana ae shahu taoli peipu khaitoue, daiolouzü Enou Ramai vei rathoki nasü leshi-e.

⁴ Enou veikayu sana hai metric ton kaihli jünou la-a peie ae sheesha touyu shahu hai poa panou Rathoki vei kivo hi zhainga southoure donou metric ton kaih ahai jünou la-a peie,

⁵ alia zhainga southouyu mainou poa vah soure sana ae shahu khesü Enou peie. Südonou zhou teithe thao mainou Mapao ye peinü shoa pove sheelapu nüyu mai bue?”

⁶ Süthaisü khü hinou peikho maitao, nuh teidei hi süthai-apei maitao, reihmai hi peicha maitao, ae veo vei peikho maitao nou lahkuku nou peinüyu khesü pove sheela peie.

⁷ Puletao nou Mapao vei Rathoki soure donou sana metric ton 170 jünou la-a peie, shahu hai metric ton 340 jünou la-a peie, baosahu hai metric ton 620 pha hai peie, ae hu kukhe hai metric ton 3,400 jünou la-a peie.

⁸ Ae muhtei chuh khesü maikhe mainou Mapao vei kini khaiyu buh hi pove thoupeie, sühisü Gershon puona Jehiel nou kho-a bue.

⁹ Süthaisü puletao nou peinüsho-a Mapao hi posheela peiyu donou maikhe mai hai asa shore. David veo-a alaosou lesa shore.

David nou Ramai ye Paoshoyu

¹⁰ Maisou vejüa buyu nghoujünou David veo nou haibüa Mapao ye paoshoe, “Oh Etao puopaoh Jakob vei Ramai Mapao, neye sü teisa nou paosholai!

¹¹ Ne hai dusho-e ae khouko busho-e, veilouyu ae ngalouyu alia aduso nasü ne baie, daiolouzü raki ae deiphao buyu na teitei sü nevei baie. Vedei khesü nevei baie, ae ha teitei pei sü nenou khasa-a bubaie.

¹² Kini ae tsükhouyu haisü ne hinou ve-a baie, ae ha teitei pei sü nenou khasa-a bue. Ne bah hisü mai taralia nenou khouko ae souduso peilou süyu sü bue.

¹³ Etao Ramai, Etao nou neye kalo paowe, ae nevei zhih aduso nasü paoshowe.

¹⁴ “Enou ae avei maitao nou halia neye peilou hoe, daiolouzü ha teitei hai nevei khaitoua baie, Etao nou neye peiyu haisü nenou Etao hi peikhai touyu nanou peidakhai-a baie,

¹⁵ Oh Mapao, nenou süwe süolouzü Etao puopaoh mai büa Etao hai shetumai ae hukhamai ali büa ta-a bubaie. Emai hrü hai teihao ali büa ta baiwe, ae athai jünou mailia tureipa louhoe.

¹⁶ Oh Mapao, Etao Ramai, Etao nou nevei sheeyu zhih nasü tsükhouyu donou nevei Rathoki soulai tea kini haitao hai pove peikhai toue, ana haitao teitei sü ne hinou ve-a baie ae nevei baie.

¹⁷ Oh avei Ramai, nenou maikhe mai vei tsüle sü zhuwe, ae acheche maiye sü nenou jüpawe touyu Enou süe. Avei tsüle sheesha toua Enou na haikhesü peinü sho-a ne hi posheela peikhai toue, ae nevei maitao-a neye peinü shoa puletao nou asasho-a ne hi posheela peiyu khesü Enou ngaore.

¹⁸ Oh Mapaowo, Etao vei puopao Abraham, Isaak ae Jakob vei Ramai, nevei maitao hi haibüa neye peinüyu tsüle panou teisa bukoute peio, ae teisa panou neye tsükhoua bukoute peilo.

¹⁹ Anahpoutu Solomon ye panou puhvei hrümai ae tsüle teitei nou peia nevei chikhatao ae kharochi khesü züa bupeio, ae Enou soulo tea souda peikhai touyu Rathoki nasü panou souchelo.”

²⁰ Süthaisü David nou maisou hisü paoe, “Neletao Ramai Mapao sü paosho khaio!” Maisou nou puletao vei puopaoh Ramai Mapao sü paosho-e, ae puletao nou pei pfüa nakou Mapao sü tsükhou-e alia veo-a tsükhoua khurü peie.

²¹ Thainesho sü puletao nou hrikhaona khesü dathaloua Mapao hi meidei-a posheela peie. Puletao nou Mapao hi posheela peiyu hrikhaona hai chode theli, nghitu theli, zhaotu theli, sütao hai meidei-a posheela peie, puletao nou darkhadzü-a alao sou pove sheela peie.

²² Süzhou teithe sü puletao nou Mapao nghoujünou touso-a savasho-a bue. Süzhou teithe puletao nou David nahpoutu Solomon ye avu ahai chena soua veo soure touyu shapaopa peie. Mapao zhih hinou puletao nou Solomon ye panou veo soure donou ae Zadok ye panou napao soure donou theadzü napeie.

²³ Süthaisü Mapao nou soushu peikhai touyu vebuh hisü Solomon nou puh puo David thaosü pa buloure. Puh hai veih shoyu veo mai ali souloue, ae Israel mai hrülai puh chi sü züe.

²⁴ Peikhomai hrülai ae reihmai hrülai alia David nahpoutu kukhe maitao-a Solomon ye panou veo soulai touyu sü mai hrülai nou ae-ao toupeie.

²⁵ Mapao nou Israel mai hrülaiye sü panou Solomon ye ngaopi-a khuhaoyu sü soupeie, ae puhnou puhye sü Israel maivei veo kukhe maitao jünou soudu sousopu peie.

David nou Veo Souyu hi Ko Matsütao

²⁶ Jesse nahpoutu David nou Israel mai hrülaiye khasa-a hrüe.

²⁷ Puhnou veo soua Israel maiye khasa-a hrüyu hai po raidai-e; po anai hai Hebron nuhdu hinou-e, ae po shiasü hai Jerusalem hinou-e.

²⁸ Puh hai maiso sho-a, ha toungi sho-a ae mainou khuhaosho-a tsüparai nou thai-e; ae puh nahpoutu Solomon nou puh thaosü veo kouloue.

²⁹ David veo vei vah haso teitei hai arai nou akhai koute hai rachipaola-apei mai asü- Samuel, Nathan ae Gad nou hrüko rükhai touyu vei larübvü hi rüthou khaitoue.

³⁰ Hrüko rükhai touyu larübvü hisünou puhnou kabüa nuh teidei khasa-a hrüe, puh hai daizhou koute du-so-e, ae puhvei hrümai hi vedaoyutao, Israel mai hi vepayutao, alia süpehao hinou buyu vedei kukhetao kabüa bue touyu veishi hai rüthou peikhai toue.