1 PUOPAOKO 28 - SHEEYU BAIBEL (BSI)

David nou Rathoki donou Paodou Peiyu

¹ David veo nou Israel maiye khasa-a hrüyu mai hrülai, khü-khü hinou peikhomai, veo vei khehinou peikho maitao, veo vei nakhe zhupeiyu maitao, veo vei kikhaorü zhupeiyu maitao, matsüyu maitao ae soureih souveiyu mai hrülaiye sü Jerusalem hi kuve jüloure.

² David nou tashu laloua puletao hi haibüa paoe, “Avei nuh teidei hinou hrüyu thaihou-jürai maitaore, achi keipeio, Mapao vei Vo Sübvü khaire donou ae avei Ramai ye panou teisa bure donou ki ali soupeilai tea Enou tsücho-e, ae ki süna soure donou Enou soudakhai chewure.

³ Ana Ramai nou Eye sü panou puhvei ki nasü soubare, daiolouzü E hai soureih mai aliyu donou maiye alao southawure.

⁴ Sübüa buyuma Israel maivei Ramai Mapao nou Eye doloue, ae avei tyaosholea maitaoye panou Israel maiye teisa nou khosa-a hrülai touwe. Ramai nou Judah khü hinou süthai-apeio nasü dapaloue, ae Judah vei khü hinou apuo vei kihikhamaiye nou dopaloue, ae apuo vei kihikhamai hrohinou Israel mai hrülai pei hi veo panou soure donou Eye jüpa-a dokupaloue.

⁵ Ramai nou Eye nahpoutu alao peie, ae nahpoutu sütao hrohinou puhnou Solomon ye panou Mapao vei vedei Israel maiye panou khasa-a hrüre donou doloure.

⁶ “Mapao nou ahi paoe, ‘Nevei nahpoutu Solomon nou avei Rathoki sü soulai. Enou puhye sü panou anahpoutu soure donou doloure, ae Enou puh vei puo sü soulai.

⁷ Puhnou zhaodao büa avei kharochi ae chikha khesü soutaosoua zütoua bukoute louzü Enou puhvei vedei sü panou teisa bukoutere donou soupeilai.’

⁸ “Südonou chuo, avei maitaore, Etao Ramai nghoujünou ae haihi veloujüa buyu Mapao vei maitao nghoujünou Enou neletao hisü paowe, süolouzü veishoyu teidei hainasü neletao vei soua bukoute loure donou ae hai nasü vere bonakha hia kikaa soua peiloure donou, neletao Ramai Mapao nou peikhai touyu chikha khesü soutaosoua zütou touloua hrülo.”

⁹ Ae Solomon hisü puhnou haibüa paoe, “Anahpoutu Solomon, nevei puo Ramai ye sü phoulo, ae nevei tsüle teitei nou peia puh vei kuvah sü sounü shoa soulo; daiolouzü Ramai hai Etao vei tsüchoyu ae jüpayu teitei sü süa baiwe. Nenou puhye phou louzü, puhye sü nenou ngaoloulai, ana nenou puhye thaowulouzü puhnou neye teisa nou thaowua bailai.

¹⁰ Mapao nou neye panou puhvei sheeyu Rathoki nasü soure donou doloure touyu sü sülo. Südonou chuo vah sü souta khaio, soutaosoua lelaloua nou vah sü soukhaio.”

¹¹ Süthaisü David nou puh nahpoutu Solomon hi kabüa rathoki nasü soulai teanou choda khaitouyu veishi, navei khaiyu kidetao, kide kukhe teitei, alia sheesheelaibuh, sühi sünou mah sü khaipeiwe,

¹² ae puhnou rathoki sü kabüa soulai touyu ae süpehao hi soure kidetao, Ramai vei ki hi pove peiyu kinitao pokhaire kide, ae posheela na khe kabüa khailai teanou puhnou tsüchoda khaitouyu khesü paopeie.

¹³ Ae David nou napao maitao ae Levi maitaoye panou rathoki hi vah soure ae rathoki hi poa vah soure paikhaotao zhure donou vah dadezhi peikhai touyu hai-a puh hi peie.

¹⁴ Puhnou shahu ae sana kazhou thoua nou paikhao,

¹⁵ meivabvü ae meivabvü khaiyu buh,

¹⁶ Shahu taibel, ae Ramai hi posheela peiyu raokhao khaire vei sana taibel khesü soure donou paodoupeie.

¹⁷ Kazhou koute veiyu sana nou poa khaocha, khaoshao ae dzübvü sü soulai touyu alia shahu ae sana nou poa kabüa paikhao khesü soulai touyu hai puhnou paodou peie.

¹⁸ Süthaia puhnou sheesha touyu sana nou poa kainüvei pou meideire posheelabu, ae Mapao vei Vo Sübvü naye shouh topa hopfüa buyu cherabim khaona naye pfütare rheilouki nasü sana kazhou loua soulai touyu hai-a paodoupeie.

¹⁹ David veo nou paoe, “Haitao teitei sü Mapao nou Eye soulo tea paopeikhai touyu thaifüa tsüchoda-a larü hi rüthoupei khaitoue.”

²⁰ David veo nou puh nahpoutu Solomon hi paoe, “Khuveilo ae khouchilo. Vah sü soutakhaio, hataralia neye panou daichaoso. Ngaopiso moyuma chathai taso, daiolouzü Ramai Mapao, avei Ramai nou neye sü salai peilai. Nenou puhvei Rathoki nasü souche loumo koute puhnou neye thaokhai toulai moe.

²¹ Napao maitao ae Levi maitaoye panou kabüa Rathoki nasü soulai touyu vah hai dade zhipeiwure. Vah tyatyali hinou soulou süyu mai hrülai sünou neye soukhare donou bue, ae mai hrülai alia puletao vei peikho maitao hai nevei khakhe hinou bue.”