1 PUOPAOKO 23 - SHEEYU BAIBEL (BSI)

¹ David nou tsüpayu thai, puhnou puh nahpoutu Solomon ye panou veo kouloure.

Levi Maitao vei Vah

² Veo David nou Israel maitaoye süthai-apei maitao, napao maitao ae Levi mai hrülai kuve jüloue.

³ Po shirou ae süpei layu Levi maitaoye phouyu phaki, puletao mai hrülai hai mai theshiacha bue.

⁴ David veo nou puletao mai thekaidai hai panou rathoki sou-e, mai therou hai panou chilou kuyu hi larü rüe,

⁵ mai thedai hai panou reihkhaomai sou-e, alia mai thedai hai lou souyu bahsei khesü poa Mapao ye lou sou shore donou vahbu thoupeie.

⁶ David nou Levi maitao hai puletao puonahmai thaifüa me asü soua dade peie: Gershon, Kohath, ae Merari.

⁷ Gershon hai nahpoutu ahai bue: Ladan ae Shimei.

⁸ Ladan hai nahpoutu asü bue: Jehiel, puhnou peicho nasüe, Zetham, ae Joel.

⁹ Shimei-a nahpoutu asü bue: Shelomoth, Haziel ae Haran. Mai haitao nou Ladan pounah maitao hi peikho maitao-e.

^10-11 Shimei hai nahpoutu adai bue: Jahath, Zina, Jeush, ae Beriah. Jeush ae Beriah puhai hai nahmai poumoe, südonou puhai sü kihikhamai ali soua cho-a baie.

¹² Kohath hai nahpoutu adai bue: Amram, Izhar, Hebron, ae Uzziel.

¹³ Puh nahpoutu tsükana Amram hai Aaron ae Moses vei puo-e. (Aaron ae puhvei nahpoutu maitao sü panou sheesheelai hi vah soure donou pokupa khaiwure, sübüa puletaoye panou teisa Mapao nghoujünou kainüvei pou meidei-a posheelare donou ae maikhe maiye Mapao vei zhih hinou shiha peire donou pokupa khaiwure.

¹⁴ Ana Moses, Ramai vei maipuna, puhvei nahmaitao hai Levi maitao hrohinou koa phoua baie).

¹⁵ Moses hai nahpoutu ahai bue: Gershom ae Eliezer.

¹⁶ Gershom vei nahpoutu maitao hi süthai-apeio hai Shebuel nou-e.

¹⁷ Eliezer hai nahpoutu alikhei baie, puh zhih sü Rehabiah toue, ana Rehabiah hai nahmai alao bue.

¹⁸ Kohath nahpoutu ahai chena Izhar hai nahpoutu ali bue, puh zhih nou Shelomith toue, ae puhnou puhvei pounah maitao hi peicho nasüe.

¹⁹ Kohath nahpoutu asü chena, Hebron hai nahpoutu adai bue: Jeriah, Amariah, Jehaziel, ae Jekameam.

²⁰ Kohath nahpoutu adai chena Uzziel hai nahpoutu ahai bue, Mikah ae Isshiah.

²¹ Merari hai nahpoutu ahai bue, Mahli ae Mushi, Mahli-a nahpoutu ahai bue, Eleazar ae Kish,

²² ana Eleazar hai nahpoutu ha-a nou thaitare, nahnaotu mai likhei bubaie. Puhvei nah naotupai nou puletao vei proumai Kish nahpoutu maitao ki ve-e.

²³ Merari vei nahpoutu ahai chena Mushi hai nahpoutu asü bue: Mahli, Eder, ae Jeremoth.

²⁴ Mai haitao hai Levi vei tyaosholea maitao-e, ae puletao mai alili zhih sü lahkuku vei khü ae pfümounah thaifüa zhih rüthou khaitoue. Po kai hinou süpei payu mai hrülai hai Mapao vei Rathoki souyu hi vah souwe.

²⁵ David nou paoe, “Israel maivei Ramai Mapao nou puhvei maitao hi kaonayu sü peie, ae puhnou Jerusalem hi teisa nou bulai.

²⁶ Südonou Levi maitao sünou Mapao nou buyu Sahpao na moyuma rathoyu hi poa vah soure natao sü kaopoa tapu laimore.”

²⁷ David nou akhai khana soua paodou peiyu thaifüa Levi mainou po kai payu mai hrülai sü kuvah soure donou zhih rüthouloue,

²⁸ ae puletaoye vah haitao soure donou dade peie: Rathoyu hi napao Aaron vei tyaonah maitaoye soukha peiyu, kijü ae kihikha zhuyu, sheeyu natao sousheeyu ae Rathoki hi sousheere vahtao souyu,

²⁹ Ramai ye posheelare raokhao souyu, thoudzü posheelayu, khei thoumoa raokhao khaoyu, ae theadzü thouloua raokhao souyu sü puletao nou soulai; Ramai ye posheelayu natao sühdoure;

³⁰ shona ae koukhe tsüsü Ramai ye paosho-a lou sousholai;

³¹ ae Mapao ye Soteithe zhou, khouh ashu vei nüh, ae khonüh teitei hi meidei-a posheelayu hai chikha thaifüa soupeilai. Levi maitaoye panou Mapao thoyu hi teisa panou kuvah soure donou vahbu thoupeiwure.

³² Puletao hai Mapao nou buyu Sahpao ae Rathoki nasü zhulai, puletao vei kityarai maitaoye soukha peilai, alia Aaron vei tyaonah maitaoye rathoki hinou rathoyu phaki babou peilai.