1 PUOPAOKO 19 - SHEEYU BAIBEL (BSI)

David nou Ammon ae Sairia Maiye Pahda peiyu

¹ Phajütou thaisü, Ammon maivei veo Nahash hai thaitare, ae puh nahpoutu Hanun nou puh thaosü veo kouloure.

² David nou paoe, “Nahash nahpoutu Hanun ye chavei lathao-a hrüa bailai, daiolouzü puh puo ahai sü chavei-a hrüe.” Südonou David nou puhye le sou sava peire donou kopomaiye seiho-e. Kopomaitao nou Ammon maivei teidei hi veloua veo Hanun hi talouyu phaki,

³ Ammon maivei süthai-apei maitao nou veo hisü haibüa paoe, “David nou kopomaiye seive neye sousava peilai touyu hai ne puoye tsükhouyu donou-e tea ne tsüchovu? Puletao hai süna donou vemoe! Teidei hai nasü kabüa busa touyu khesü zhuloua soureih soure donou veloua baie.”

⁴ Südonou veo Hanun nou David vei kopaomaitao sü nüloua puletao vei mümai biwure alia puletao vei sabanü sü paipha peiwua seitawure.

⁵ Puletao hai ki hi dakhai vere sü haosho loure. David nou ko sükhesü choloukhaie, puhnou puletao hisü puletao vei mümai tsüpa dakhai loumo koute Jeriko nuhdu hinou buwo, ki hi dakhai veso tea kopomaiye seiho paopeie.

⁶ Hanun ae Ammon maitao hai David veo vei züphi souwure touyu süloukhaie, puletao nou Mesopotamia, Aram Maakah, ae Zobah hinou rheiluki ae rheiluki pfüyu maiye ngare donou shahu sühdou theshiadai hai seita-e.

⁷ Puletao nou rheiluki theshiahai ngakhai touyu tao ae Maakah veo vei reihmaitao sü tave Medeba pehinou fühao soua buloure. Alia Ammon mai-a reih soure donou nuh hinou buyu mai hrülai sü tapa souda-a bure.

⁸ David nou ko hai khesü choulouyu phaki puhnou Joab ae puhvei reihmai hrülai sü panou reih soure donou seitawure.

⁹ Ae Ammon maitao sünou puletao vei nuhbei, Rabbah hi taloure robomü hinou buh souda-a kholoure, alia puletaoye soukhare donou veyu veo maitao sünou vakou deikayu hinou kho-a buloure.

¹⁰ Ngaobayu reihmaitao nou puletaoye thailo ae pahlo vanou huloure donou souda-a buyu sü Joab nou zhingao loukhaie, puhnou Israel mai hrohinou soureih souveih kayu maitaoye sü dopaloua panou Sairia maiye dure donou khaiwure.

¹¹ Ae puhnou reihmai kukhe taoye sü puh thaihou Abishai panou sa-a Ammon maiye dure donou souda-a kholoure.

¹² Joab nou puh thaihou hi paoe, “Hakinou Sairia mainou reih veiloua Eye hukou louzü, Eye takou soukha peio, ae Ammon mainou neye reih hukou louzü E-a neye takou soukha peilai.

¹³ Khouchilo alia khuveilo! Etao soutaosou-a nou Etao vei maitao donou ae Ramai vei nuhdutao donou soureih soulai, ae Mapao ye panou kaozü nasü soupei theo.”

¹⁴ Joab ae puhvei maitao nou reih hukouyu phaki Sairia maitao sü tutare.

¹⁵ Sairia maitao nou tutayu sü Ammon mainou zhingao loukhaie, puletao hai Abishai hinou nuhdu hisü tudakhai loutare. Süthaisü Joab hai Jerusalem hi dakhai tare.

¹⁶ Sairia mai hai Israel mainou reih veiloure touyu sülou khaie, puletao nou teinghi palova Euphratis rei hilonou hrüa buyu Sairia maitaoye sü veo Hadadezer vei reihmaitao peicho Shobach panou reihmaitao sü saloua ve-e.

¹⁷ Hai ko sü David hi ve paopei khaie, puhnou Israel maivei reihmaitao sü save jüloua Jordan rei sü tachopa loure, ae Sairia maiye reih soure donou souda-a buloure. David veo nou sa-a Sairia maiye reih souta khaie,

¹⁸ Israel mainou Sairia maivei reihmaitao sü hupoa tare. David ae puhvei maitao nou Sairia maivei rheiluki pfüyu mai thenai southawure, alia phinou ta-a soureih souyu reihmai theraidai hai southawure. Puletao nou Sairia maivei reihmaitao peikhowo Shobach-a southawure.

¹⁹ Veo Hadadezer khenou peikhoyu maitao nou puletao hai Israel maitao jünou reih veilou hore touyu ngaoloukhai, puletao hai David veo koa kaona-a hrüre donou vo souloure ae puh khakhe hinou buloure. Südonou Sairia mainou Ammon maiye soukhapu nükhai more.